অসমৰ শেহতীয়া বান পৰিস্থিতি সন্দৰ্ভত মনৰ বেদনা প্ৰকাশ কৰিছে আনন্দ মিশ্ৰই। বিহাৰৰ বাক্সাৰ সমষ্টিৰ বিধায়ক তথা প্ৰাক্তন IPS বিষয়া আনন্দ মিশ্ৰই বন্যাৰ্তলৈ ইতিমধ্যেই আগবঢ়াইছে ২ লাখ টকাৰ আৰ্থিক সাহায্য। সামাজিক মাধ্যমযোগে এই কথা ঘোষণা কৰি তেওঁ কয়- মই নিজৰ এটা মাহৰ সম্পূৰ্ণ দৰমহা, অৰ্থাৎ ২ লাখ টকা, অসমৰ বানপীড়িত ৰাইজৰ বাবে আগবঢ়ালো।
আনন্দ মিশ্ৰই লগতে কয় যে অসমৰ সৈতে তেওঁৰ সম্পৰ্ক কেৱল পেছাগত নহয়, অসম তেওঁৰ বাবে আৱেগৰ বিষয়। IPS হিচাপে অসমত কৰ্মৰত হৈ থকাৰ সময়ত ৰাজ্যখনৰ মানুহৰ মৰম, স্নেহ আৰু সহযোগিতা লাভ কৰিছিল। সেই স্মৃতিকে সুঁৱৰি তেওঁ কয় যে-অসমৰ কঠিন সময়ত কাষত থিয় হোৱাটো তেওঁৰ নৈতিক দায়িত্ব আছিল। তেওঁ কয়, “অসম মোৰ দ্বিতীয় ঘৰ। বানৰ এই দুৰ্যোগত বহু পৰিয়ালে নিজৰ ঘৰ-বাৰী, জীৱিকা আৰু সপোন হেৰুৱাইছে।” আনন্দ মিশ্ৰই লগতে কয় যে- ‘এতিয়া ৰাজনীতিৰে জড়িত হৈ পৰিছো, তালৈ বন্যাৰ্তৰ বাবে কাম কৰিবলৈ গলে একাংশই ৰাজনীতি কৰিবলৈ যোৱা বুলি সমালোচনা কৰিব, যাৰ বাবে ইচ্ছা কৰিও যাব পৰা নাই’
আনন্দ মিশ্ৰই নিজৰ এমাহৰ দৰমহা অসমৰ মুখ্যমন্ত্ৰীৰ সাহায্য পুঁজিলৈ আগবঢ়োৱাৰ কথা ঘোষণা কৰি আন সকলো সামৰ্থ্যবান ব্যক্তি, জনপ্ৰতিনিধি, উদ্যোগপতি আৰু সমাজসেৱককো আগবাঢ়ি আহিবলৈ আহ্বান জনায়। তেওঁ সামাজিক মাধ্যমযোগে কয় যে, “এই সৰু অৱদানৰ জৰিয়তে যদি কোনো এটা পৰিয়ালৰ কষ্ট অলপো লাঘৱ হয়, তেন্তে সেইয়াই মোৰ বাবে ডাঙৰ প্ৰাপ্তি।” আনন্দ মিশ্ৰই লগতে অসমবাসীক সাহস নেহেৰুৱাবলৈ আহ্বান জনায়। তেওঁ বিশ্বাস প্ৰকাশ কৰে যে, ৰাজ্য চৰকাৰ, প্ৰশাসন, স্বেচ্ছাসেৱী সংগঠন আৰু সাধাৰণ জনতাৰ সমূহীয়া প্ৰচেষ্টাৰে অসমৰ এই সংকট অতিক্ৰম কৰা সম্ভৱ। উল্লেখযোগ্য যে, আনন্দ মিশ্ৰই IPS বিষয়া হিচাপে অসমৰ বিভিন্ন জিলাত দায়িত্ব পালন কৰি জনসাধাৰণৰ মাজত বিশেষ জনপ্ৰিয়তা লাভ কৰিছিল। চাকৰি এৰি ৰাজনীতিত প্ৰৱেশ কৰাৰ পিছতো অসমৰ সৈতে তেওঁৰ আত্মীয়তা অটুট আছে।
অসমৰ বানৰ বাতৰি সঠিকভাৱে সম্প্ৰচাৰ নকৰাৰ বাবে ৰাষ্ট্ৰীয় সংবাদমাধ্যমসমূহকো তীব্ৰ সমালোচনা কৰে আনন্দ মিশ্ৰই। তেওঁ কয় যে- অসমৰ বানৰ বাতৰি যেনেকৈ সম্প্ৰচাৰ কৰিব লাগিছিল ৰাষ্ট্ৰীয় সংবাদ মাধ্যমে সেই দৰে সম্প্ৰচাৰ কৰা নাই, যাৰবাবে বানৰ খবৰ তেওঁৱো বহু দেৰিকৈহে লাভ কৰিছে, যাৰ বাবে তেওঁ দুঃখিত।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
