চ্যুয়িংগাম চোবাই নিৰাময় কৰিব পাৰি কৰ্কট ৰোগ, এই কথাটো অবিশ্বাস্য যেন লাগিলেও গৱেষকসকলে দিছে এই সন্দৰ্ভত এক আশাৰ সঞ্চাৰ। প্ৰকৃততে বিজ্ঞানীসকলে এটা “বায়’ইঞ্জিনিয়াৰিং চ্যুয়িগাম” প্ৰস্তুত কৰিছে যিয়ে মূৰ আৰু ডিঙিৰ কৰ্কট ৰোগৰ সৈতে জড়িত কিছুমান মৌখিক ভাইৰাছ আৰু বেক্টেৰিয়া হ্ৰাস কৰিব পাৰে। গৱেষণাৰ পৰা দেখা গৈছে যে মৌখিক মানৱ পেপিলোমা ভাইৰাছ (HPV)ৰ মাত্ৰা ৯৩% পৰ্যন্ত হ্ৰাস কৰিব পাৰে এই চ্যুয়িংগামে। থানেৰ কিমছ হাস্পতালৰ মূৰ আৰু ডিঙিৰ অংকোচাৰ্জাৰী পৰামৰ্শদাতা ডাঃ হিতেশ সিংভীয়ে কয় যে-‘এই সন্দৰ্ভত পোহৰলৈ অহা তথ্যসমূহ ৰোমাঞ্চকৰ। কিন্তু আমি ইয়াক নতুন ৰোগীৰ বাবে ক্ষন্তেকীয়া সমাধান নহয়, প্ৰাৰম্ভিক বৈজ্ঞানিক অগ্ৰগতি হিচাপেহে চোৱা উচিত।’
চিকিৎসকসকলে আঙুলিয়াই দিয়ে যে এই অধ্যয়নে মূৰ আৰু ডিঙিৰ কৰ্কট ৰোগত মৌখিক মাইক্ৰ’বায়’মৰ ক্ৰমবৰ্ধমান ভূমিকাক উজ্জ্বল কৰি তুলিছে। বিজ্ঞানীসকলৰ মতে বেক্টেৰিয়া আৰু ভাইৰাছকে ধৰি মুখত থকা অণুজীৱই দীৰ্ঘম্যাদীভাৱে মুখৰ স্বাস্থ্যত প্ৰভাৱ পেলাব পাৰে আৰু সম্ভাৱনাময়ভাৱে কৰ্কট ৰোগৰ বিকাশত অৰিহণা যোগাব পাৰে। এই অণুজীৱসমূহক চিকিৎসামূলক চ্যুইংগামৰ দ্বাৰা লক্ষ্য কৰি ল’লে কৰ্কট ৰোগৰ চিকিৎসাত নতুন সম্ভাৱনাৰ সৃষ্টি হ’ব পাৰে আৰু এদিন বৰ্তমানৰ কৰ্কট ৰোগ প্ৰতিৰোধ কৌশলৰ পৰিপূৰক হ’ব পাৰে।
মূৰ আৰু ডিঙিৰ কৰ্কট ৰোগৰ প্ৰকাৰৰ ওপৰত নিৰ্ভৰ কৰি HPVৰ ভূমিকা যথেষ্ট বেলেগ বেলেগ হয়। ভাৰতত মাত্ৰ ৪% মুখগহ্বৰৰ কৰ্কট ৰোগ HPV সংক্ৰমণৰ সৈতে জড়িত। ইয়াৰ বিপৰীতে প্ৰায় ৩০% অৰ’ফেৰিঞ্জিয়াল কেন্সাৰ (টনচিল আৰু জিভাৰ গুৰি) HPV সম্পৰ্কীয়। বিদেশত প্ৰায় ৬০% অৰ’ফেৰিঞ্জিয়াল কেন্সাৰ ৰোগী নিয়মীয়া HPV সংক্ৰমণৰ সৈতে জড়িত।
চ্যুয়িংগামে এবাৰতে কেন্সাৰ নিৰাময় কৰে নেকি?
HPVৰ সংস্পৰ্শলৈ অহাৰ লগে লগে কৰ্কট ৰোগ নহয়। ক্ষতিকাৰক মৌখিক অণুজীৱবোৰ প্ৰায়ে বৃদ্ধি পায় আৰু কেন্সাৰলৈ পৰিৱৰ্তন হোৱাৰ আগতে দীৰ্ঘ সময়ৰ বাবে স্থায়ী HPV সংক্ৰমণ ঘটে। ইয়াৰ পৰা অনুমান কৰিব পাৰি যে ভাইৰাছ বা মাইক্ৰ’বায়’লজিকেল লোড হ্ৰাস কৰা যিকোনো থেৰাপী ফলপ্ৰসূ হ’বলৈ দীৰ্ঘ সময়ৰ বাবে নিয়মিতভাৱে ব্যৱহাৰ কৰিব লাগিব। গতিকে এনে চিকিৎসামূলক চ্যুয়িংগাম এবাৰ ব্যৱহাৰ কৰিলে ৰোগ নিৰাময় নহ’ব। HPV আৰু অন্যান্য ক্ষতিকাৰক মৌখিক অণুজীৱ হ্ৰাস কৰিবলৈ নিয়মিত ব্যৱহাৰ অতি প্ৰয়োজনীয় হ’ব।
কেন্সাৰ প্ৰতিৰোধৰ বাবে কি কৰিব পাৰি?
এই চ্যুয়িংগামটোৱে লেবত আশাব্যঞ্জক ফলাফল দেখুৱাইছে যদিও মানুহৰ কৰ্কট ৰোগ প্ৰতিৰোধৰ ক্ষেত্ৰত ইয়াৰ ফলপ্ৰসূতা এতিয়াও প্ৰমাণিত হোৱা নাই। মূৰ আৰু ডিঙিৰ কৰ্কট ৰোগ প্ৰতিৰোধৰ বাবে এজন ব্যক্তিয়ে দৈনন্দিন জীৱনত তলত দিয়া অভ্যাসকে ধৰি কেইবাটাও অভ্যাস গ্ৰহণ কৰিব লাগে।
HPV ভেকচিন লোৱা
ধঁপাত আৰু অত্যধিক মদ্যপান পৰিহাৰ কৰা
মুখৰ পৰিষ্কাৰ-পৰিচ্ছন্নতাৰ যত্ন লোৱা
কোনো লক্ষণ দেখা পালে মেডিকেল চেকআপ লোৱা
এই সকলোবোৰেই মূৰ আৰু ডিঙিৰ কৰ্কট ৰোগৰ আশংকা হ্ৰাস কৰাৰ ক্ষেত্ৰত অতি ফলপ্ৰসূ উপায়।
তথাপিও চ্যুয়িংগাম ধাৰণাটোৱে কেন্সাৰ গৱেষণাৰ এক উল্লেখযোগ্য পৰিৱৰ্তনক প্ৰতিনিধিত্ব কৰে। কেৱল পূৰ্বৰ অৱস্থাৰ চিকিৎসাৰ ওপৰত গুৰুত্ব দিয়াৰ পৰিৱৰ্তে বিজ্ঞানীসকলে এতিয়া মুখৰ স্বাস্থ্য উন্নত কৰা আৰু কৰ্কট ৰোগৰ প্ৰাৰম্ভিক পৰ্যায়ত ৰোগ প্ৰতিৰোধ কৰাত অধিক গুৰুত্ব দিছে। যদিহে ভৱিষ্যতে ক্লিনিকেল ট্ৰায়েলে ইয়াৰ সুৰক্ষা আৰু কাৰ্যকাৰিতা নিশ্চিত কৰে, তেন্তে এই চিকিৎসামূলক চ্যুয়িংগাম HPV সম্পৰ্কীয় কৰ্কট ৰোগ প্ৰতিৰোধৰ বাবে এক বৃহত্তৰ কৌশলৰ অংশ হ’ব পাৰে। কিন্তু মানুহে নিজৰ মুখৰ স্বাস্থ্যৰ প্ৰতি গুৰুত্ব দিব লাগে আৰু কোনো ধৰণৰ সংক্ৰমণক আওকাণ নকৰিব লাগে।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
