মধ্যপ্ৰদেশৰ সাগৰ জিলাৰ গোপালগঞ্জ থানা এলেকাত এজন টেক্সি চালকৰ ঘৰৰ পৰা উদ্ধাৰ হোৱা ৩ কোটিৰো অধিক নগদ ধনে এতিয়া সমগ্ৰ ঘটনাটোকে অধিক ৰহস্যময় কৰি তুলিছে। আৰক্ষীয়ে মূলতঃ ছ’চিয়েল মিডিয়াত এটা পি*ষ্টল প্ৰদৰ্শন কৰা এখন ফটোৰ তদন্ত চলাবলৈ গৈছিল। কিন্তু তালাচীৰ সময়ত অ*স্ত্ৰৰ সলনি উদ্ধাৰ হয় আলমাৰীত লুকুৱাই থোৱা বিপুল পৰিমাণৰ নগদ ধন। আৰক্ষীৰ হিচাপ অনুসৰি উদ্ধাৰ হোৱা ধনৰ পৰিমাণ হৈছে ৩ কোটি ২ লাখ ১৪ হাজাৰ টকা।
কেনেকৈ পোহৰলৈ আহিল বিপুল নগদ ধন?
ঘটনাটো সাগৰ জিলাৰ গোপালগঞ্জ থানা এলেকাৰ তিলি তিগাড্ডা অঞ্চলৰ। আৰক্ষীয়ে সৌৰভ আহিৰৱাৰৰ ঘৰত অভিযান চলাইছিল। ছ’চিয়েল মিডিয়াত সৌৰভ আৰু তেওঁৰ ভাতৃৰ পি*ষ্টল এটা হাতত লৈ থকা ছবি বা ভিডিঅ’ পোহৰলৈ অহাৰ পিছতে আৰক্ষীয়ে অ*স্ত্ৰৰ সন্ধানত তেওঁলোকৰ গতিবিধি পৰীক্ষা কৰিছিল। আৰক্ষীৰ দলটো সৌৰভৰ ঘৰত উপস্থিত হৈ তালাচী চলোৱাৰ সময়ত এটা লক কৰা আলমাৰী দেখা পায়। আলমাৰীটো খোলাৰ বাবে চাবি বিচৰাত পৰিয়ালৰ লোকে চাবি নাই বুলি জনায়। ইয়াৰ পিছত আৰক্ষীয়ে আলমাৰীটো খুলি দিয়ে। তাত বেগত ভৰাই থোৱা বহু সংখ্যক নোটৰ বাণ্ডিল উদ্ধাৰ হয়। নগদ ধনৰ পৰিমাণ ইমানেই বেছি আছিল যে ঘটনাস্থলীতে টকা গণনা কৰা মেচিন অনা হৈছিল। গণনাৰ অন্তত আৰক্ষীয়ে মুঠ ৩,০২,১৪,০০০ টকা জব্দ কৰা বুলি প্ৰকাশ কৰিছে।
জব্দকৃত ধনৰ মালিক কোন?
এই ঘটনাৰ আটাইতকৈ ডাঙৰ প্ৰশ্নটোৱেই হৈছে—এজন টেক্সি চালকৰ ঘৰত ইমান বিপুল পৰিমাণৰ নগদ ধন কিয় আছিল আৰু প্ৰকৃততে এই টকা কাৰ? আৰক্ষীৰ জেৰাত পৰিয়ালৰ লোকে দাবী কৰিছিল যে টকাখিনি তেওঁলোকৰ আত্মীয় ৰমেশ কুমাৰ আহিৰৱাৰৰ। বিভিন্ন প্ৰতিবেদনত ৰমেশ আহিৰৱাৰক পূৰ্বতে PWDৰ অভিযন্তা হিচাপে কাম কৰা আৰু বৰ্তমান মধ্যপ্ৰদেশৰ গ্ৰাম্য পথ উন্নয়ন সংস্থা MPRRDAত চুক্তিভিত্তিকভাৱে CGM হিচাপে কাম কৰা বুলি উল্লেখ কৰা হৈছে। কিন্তু এই দাবীয়ে গোচৰটোক আৰু অধিক জটিল কৰি তুলিছে। কাৰণ ৰমেশ আহিৰৱাৰে সংবাদ মাধ্যমৰ আগত উদ্ধাৰ হোৱা ধনৰ সৈতে তেওঁৰ কোনো সম্পৰ্ক নাই বুলি স্পষ্টভাৱে কৈছে। তেওঁ দাবী কৰিছে যে তেওঁৰ নাম কিয় এই ঘটনাত জড়িত কৰা হৈছে, সেই বিষয়েও তেওঁ অৱগত নহয়। ফলত এতিয়া তদন্তকাৰী সংস্থাৰ সন্মুখত মূল প্ৰশ্ন হৈছে—টকাখিনি প্ৰকৃততে কাৰ আৰু ক’ৰ পৰা আহিল?
এই ঘটনাৰ আন এটা গুৰুত্বপূৰ্ণ দিশ হৈছে যে আৰক্ষীয়ে প্ৰথমে নগদ ধনৰ সন্ধানত অভিযান চলোৱা নাছিল। ছ’চিয়েল মিডিয়াত সৌৰভৰ হাতত পিষ্টল সদৃশ বস্তু থকা ছবি পোহৰলৈ অহাৰ পিছত আৰক্ষীয়ে সম্ভাব্য অবৈধ অ*স্ত্ৰৰ সন্ধানত তালাচী চলাইছিল। কিন্তু অভিযানত কোনো পিষ্ট*ল উদ্ধাৰ হোৱা নাই। পৰিয়ালৰ দাবী অনুসৰি ছবিখনত দেখা পিষ্ট*লটো প্ৰকৃত পি*ষ্টল নহয়, বৰং পি*ষ্টলৰ দৰে দেখাত এটা লাইটাৰহে আছিল। এই দাবীও আৰক্ষীয়ে তদন্তৰ আওতালৈ আনিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
