ভাৰত-পাকিস্তানৰ মাজত দীৰ্ঘদিনৰ পৰা চলি থকা উত্তেজনাৰ প্ৰভাৱ পৰিছে দুয়োখন দেশৰ মাজৰ পাৰিবাৰিক আৰু বৈবাহিক সম্পৰ্কতো। কিন্তু ৰাজনৈতিক আৰু কূটনৈতিক বাধাৰ মাজতো ভাৰতীয় যুৱকৰ সৈতে বিবাহপাশত আবদ্ধ হোৱাৰ আশা এৰি দিয়া নাই বহু পাকিস্তানী যুৱতীয়ে। শেহতীয়াকৈ প্ৰায় ১৫০ গৰাকী পাকিস্তানী সিন্ধ যুৱতী আৰু তেওঁলোকৰ পৰিয়াল ভাৰতত উপস্থিত হৈছে। তেওঁলোকৰ উদ্দেশ্য হৈছে ভাৰতীয় যুৱকৰ সৈতে পূৰ্বনিৰ্ধাৰিত বিবাহ সম্পন্ন কৰা। আনহাতে, প্ৰায় ৩০০ গৰাকী পাকিস্তানী যুৱতী এতিয়াও ভাৰতলৈ আহিবলৈ অপেক্ষা কৰি আছে।
২০২৫ চনৰ পহেলগামত স*ন্ত্ৰাসবাদী আক্ৰমণৰ পিছত ভাৰত-পাকিস্তানৰ সম্পৰ্ক অধিক অৱনতি ঘটে। ইয়াৰ পিছত ভাৰতে পাকিস্তানী নাগৰিকসকলৰ ভিছা সম্পৰ্কে কঠোৰ সিদ্ধান্ত গ্ৰহণ কৰে। ভাৰতৰ বৈদেশিক পৰিক্ৰমা মন্ত্ৰালয়ে ২৪ এপ্ৰিল ২০২৫ত ঘোষণা কৰিছিল যে পাকিস্তানী নাগৰিকসকলক জাৰি কৰা বিদ্যমান বৈধ ভিছাসমূহ ২৭ এপ্ৰিলৰ পৰা বাতিল কৰা হ’ব। ইয়াৰ ফলত ভাৰতত বিবাহপাশত আবদ্ধ হ’বলৈ অপেক্ষা কৰি থকা বহু পাকিস্তানী যুৱতীৰ পৰিকল্পনা অনিশ্চিত হৈ পৰে। বিশেষকৈ পাকিস্তানৰ সিন্ধ প্ৰদেশৰ পৰা ভাৰতলৈ বিবাহৰ বাবে অহা পৰিয়ালসমূহে সমস্যাৰ সন্মুখীন হয়।
আগতে পাকিস্তানৰ সিন্ধ পৰিয়ালসমূহে ৱাঘা-আটাৰী সীমান্ত পথেৰে ভাৰতলৈ আহি বিবাহ অনুষ্ঠানত অংশগ্ৰহণ কৰিছিল। কিন্তু পৰিস্থিতি সলনি হোৱাৰ পিছত এই পথত তেওঁলোকৰ যাত্ৰা বন্ধ হৈ পৰে। ফলত বহু যুৱতীৰ বিবাহ স্থগিত হৈ থাকে। কিন্তু পৰিয়ালসমূহে হাৰ নামানি ভাৰত চৰকাৰৰ ওচৰত বিষয়টো উত্থাপন কৰে। এই ক্ষেত্ৰত পাকিস্তানৰ সিন্ধ প্ৰদেশৰ গোটকীস্থিত শ্বাদানী দৰবাৰৰ আধ্যাত্মিক নেতা সন্ত যুধিষ্ঠিৰলাল শ্বাদানীৰ সহায়ো বিচৰা হয়। শ্বাদানী দৰবাৰে ভাৰতত বিবাহপাশত আবদ্ধ হ’বলগীয়া পাকিস্তানী যুৱতী আৰু তেওঁলোকৰ পৰিয়ালৰ তালিকা প্ৰস্তুত কৰি ভাৰতৰ গৃহ মন্ত্ৰালয়ৰ ওচৰত বিষয়টো উত্থাপন কৰে।
প্ৰতিবেদন অনুসৰি, ভাৰত চৰকাৰে বিশেষ অনুমতি প্ৰদান কৰাৰ পিছত এই যুৱতীসকল আৰু তেওঁলোকৰ পৰিয়ালক আকাশপথে তৃতীয় দেশৰ জৰিয়তে ভাৰতলৈ অহাৰ অনুমতি দিয়া হয়। অৰ্থাৎ পাকিস্তানৰ পৰা পোনপটীয়াকৈ ভাৰতলৈ অহাৰ পৰিৱৰ্তে তেওঁলোকে অন্য দেশত ট্ৰেনজিট লৈ ভাৰতত প্ৰৱেশ কৰে। এইদৰে পাকিস্তানৰ পৰা অহা প্ৰায় ১৫০ গৰাকী যুৱতী আৰু তেওঁলোকৰ পৰিয়ালে ডুবাই, মাস্কাট, শ্ৰীলংকা, বাংলাদেশ আদি তৃতীয় দেশৰ জৰিয়তে ভাৰতত উপস্থিত হৈছে বুলি প্ৰতিবেদনত প্ৰকাশ পাইছে। অৰ্থাৎ মূল চৰ্তটো আছিল—ৱাঘা-আটাৰী স্থলপথ ব্যৱহাৰ নকৰি অনুমোদিত আকাশপথে তৃতীয় দেশৰ জৰিয়তে ভাৰতত প্ৰৱেশ কৰা। ভাৰতলৈ অহা পাকিস্তানী কইনাসকলৰ বিবাহ বিভিন্ন ভাৰতীয় চহৰত অনুষ্ঠিত হোৱাৰ কথা। শাদানী দৰবাৰৰ সৈতে জড়িত প্ৰতিনিধিৰ তথ্য অনুসৰি, নাগপুৰ, ৰায়পুৰ, যোধপুৰ, পুনে আদি চহৰত বহু বিবাহ অনুষ্ঠিত হ’ব।
১৫০ গৰাকী পাকিস্তানী যুৱতীয়ে ভিছা লাভ কৰি ভাৰতলৈ আহিবলৈ সক্ষম হ’লেও এতিয়াও প্ৰায় ৩০০ গৰাকী পাকিস্তানী যুৱতী ভাৰতলৈ আহি তেওঁলোকৰ ভাৰতীয় সংগীৰ সৈতে বিবাহপাশত আবদ্ধ হোৱাৰ অপেক্ষাত আছে। এই যুৱতীসকলৰ বাবেও ভাৰত চৰকাৰৰ পৰা ভিছা অনুমোদনৰ আবেদন কৰা হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
