আজি সুধাকণ্ঠ ড° ভূপেন হাজৰিকাৰ জন্ম শতবাৰ্ষিকী। জালুকবাৰীৰ সমন্বয় তীৰ্থ আটক-ধুনীয়াকৈ সজাই-পৰাই তোলা হৈছে। গীতে-মাতে শ্ৰদ্ধাৰ্ঘ জনোৱা হৈছে সুধাকণ্ঠ ড০ ভূপেন হাজৰিকাক। ১৯২৬ চনৰ ৮ ছেপ্টেম্বৰত শদিয়াত জন্মগ্ৰহণ কৰা সুধাকণ্ঠ ড০ ভূপেন হাজৰিকাই নিজৰ সুৰ, সংগীত আৰু কথাৰে কেৱল অসমকেই নহয়, সমগ্ৰ উত্তৰ-পূৰ্বাঞ্চলৰ সংস্কৃতিক দেশ-বিদেশত পৰিচিত কৰাইছিল।
গীতিকাৰ, গায়ক, সুৰকাৰ, কবি, চলচ্চিত্ৰ নিৰ্মাতা আৰু সমাজসচেতন শিল্পী হিচাপে ভূপেন হাজৰিকাৰ অৱদান আছিল বহুমুখী। তেওঁৰ সৃষ্টিত প্ৰতিফলিত হৈছিল সাধাৰণ মানুহৰ জীৱন, দুখ-কষ্ট, আশা-আকাংক্ষা, সাম্য, ভাতৃত্ববোধ আৰু মানৱতাৰ বাৰ্তা। সেইবাবেই তেওঁৰ গীত কেৱল মনোৰঞ্জনৰ মাধ্যম হৈ নাথাকি সমাজৰ কথাও কোৱা এক শক্তিশালী মাধ্যম হিচাপে পৰিগণিত হৈছিল।
শৈশৱৰে পৰা সংগীতৰ প্ৰতি বিশেষ আগ্ৰহী ভূপেন হাজৰিকাই অতি কম বয়সতে গীত ৰেকৰ্ড কৰিছিল। পৰৱৰ্তী সময়ত কাশী আৰু আমেৰিকাত উচ্চ শিক্ষা গ্ৰহণ কৰি তেওঁ সংগীত আৰু সংস্কৃতিৰ জগতত নিজৰ এক সুকীয়া পৰিচয় গঢ়ি তোলে। অসমৰ লোকসংগীত আৰু লোকজীৱনৰ সুৰক আধুনিক সংগীতৰ সৈতে সংযোগ কৰি তেওঁ সৃষ্টি কৰিছিল এক অনন্য সংগীতধাৰা।
শদিয়াত থাকোঁতে ভূপেন হাজৰিকাৰ ঘৰৰ লগত আদিবাসী মানুহৰ খুউব মিলা-প্ৰীতি আছিল। ঘৰৰপৰা বহু দূৰৈত থকা বনুং গাঁওখনৰ মানুহে আহি কেঁচুৱা ভূপেনক চোৱা-চিতা কৰিছিল। তেওঁলোকে শান্তিপ্ৰিয়াক বৰ মৰম কৰিছিল। একোজনী আদিবাসী ছোৱালীয়ে পঞ্চলিছডাল জুইশলা কাঠী দিলে পঞ্চলিছদিন কাম কৰি দিছিল। বোধহয় তেওঁলোক বিনিময় প্ৰথাত বিশ্বাস কৰিছিল। ড’ ভূপেন হাজৰিকাৰ ঘৰত মৰমতে মতা নাম আছিল বৰ মইনা | ভূপেন হাজৰিকা ডাঙৰ হ‘লত ফুৰাবলৈ পেৰামবুলেটৰ (কেঁচুৱা ফুৰোৱা গাড়ী) কিনিবলৈ দেউতাক নীলকান্ত হাজৰিকাৰ ধন নাছিল। তেতিয়া ওচৰৰে চাহাব এজনে দেউতাকক মাতি নি তেওঁৰ ঘৰত থকা গাড়ী এখন উপহাৰস্বৰূপে দিছিল। সেইখন গাড়ীতে আদিবাসী ছোৱালীবিলাকে কেঁচুৱা ভূপেনক ঘূৰাই লৈ ফুৰাইছিল।
মাক-দেউতাকে তেওঁৰ নামটো ভূপেন্দ্ৰ কুমাৰ হাজৰিকা বুলি ৰাখিছিল। পিছে ঘৰত সদায়েই ডাঙৰ মইনা বুলি মাতিছিল। ভূপেন হাজৰিকা আছিল এনে এগৰাকী ব্যক্তি, যি সংগীতৰ জৰিয়তে আমাৰ সমাজখন সংস্কাৰ কৰিব বিচাৰিছিলি।
বৃক্কৰ সমস্যা আৰু আনুষংগিক জটিলতাত ভুগি ড॰ হাজৰিকাই ২০১১ চনৰ ৫ নৱেম্বৰৰ দিনা মুম্বাইৰ কোকিলাবেন ধীৰুভাই আম্বানি চিকিৎসালয়ত ইহলীলা সম্বৰণ কৰে। মৃত্যুৰ সময়ত তেওঁৰ বয়স আছিল ৮৫ বছৰ। মৃত্যুৰ পিছত হাজৰিকাৰ নশ্বৰদেহ গুৱাহাটীলৈ অনা হয় আৰু ৯ নৱেম্বৰৰ দিনা অন্তিম সংস্কাৰ কৰা হয়, য’ত প্ৰায় ৫ লাখ জনতাই ভাগ লয়। তেওঁৰ সমাধিক্ষেত্ৰ জালুকবাৰীত গুৱাহাটী বিশ্ববিদ্যালয়ৰ কাষত প্ৰতিষ্ঠা কৰা হয়। সমাধিক্ষেত্ৰখনত ‘সোণোৱালী সোঁৱৰণি’ নামৰ এক তিনি মহলীয়া সংগ্ৰহালয়ো আছে, য’ত ভূপেন হাজৰিকাৰ জীৱনৰ লগত জড়িত সামগ্ৰী আৰু আলোকচিত্ৰ আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
