ৰাতিপুৱা সাৰ পোৱাৰ পিছত প্ৰথমে দাঁত ব্ৰাছ সকলোৱে কৰে। দন্ত চিকিৎসকে কয় যে দিনটোত কমেও দুবাৰকৈ দাঁত ব্ৰাছ কৰিব লাগে। ৰাতিপুৱা আৰু ৰাতি খাদ্য খোৱাৰ পিছত দাঁত ব্ৰাছ কৰাটো এটা স্বাস্থ্যকৰ অভ্যাস। অৱশ্যে বহু লোকৰ মুখৰ দুৰ্গন্ধ এতিয়াও থাকে। কিয় এনেকুৱা হয় জানেনে?
মুখৰ দুৰ্গন্ধক হেলিট’ছিছ বোলে। ইয়াৰ আঁৰত কিছুমান কাৰণ আছে যিবোৰ কেৱল দাঁত ব্ৰাছ কৰিলেই আঁতৰাব নোৱাৰি। মুখৰ দুৰ্গন্ধৰ পৰা কেনেকৈ মুক্তি পাব পাৰি তাৰ কিছু সহজ উপায় আগবঢ়োৱা হ’ল।
মুখৰ দুৰ্গন্ধৰ আটাইতকৈ ডাঙৰ কাৰণ হ’ল নিয়মিতভাৱে ফ্লছ নকৰা। খোৱাৰ পিছত দাঁতৰ মাজৰ ফাঁকত আবদ্ধ হৈ পৰা খাদ্যই বেক্টেৰিয়াৰ জন্ম দিয়ে। আবদ্ধ হৈ থকা খাদ্যখিনি লাহে লাহে পচিবলৈ আৰম্ভ কৰে। ইয়াৰ ফলত মুখৰ দুৰ্গন্ধ হয়।
মুখৰ দুৰ্গন্ধ ৰোধ কৰিবলৈ নিয়মিতভাৱে ফ্লছ কৰিব লাগে। পাতল ফ্লছৰ টুকুৰাৰে দাঁত ফ্লছ কৰক, যাৰ ফলত খাদ্যৰ ধ্বংসাৱশেষ আঁতৰাই পেলোৱা হয়।
নিয়মিতভাৱে দাঁত ব্ৰাছ আৰু ফ্লছ কৰাৰ পিছতো যদি আপোনাৰ মুখৰ দুৰ্গন্ধ ওলায়, তেন্তে ইয়াৰ কাৰণ হ’ব পাৰে আপোনাৰ জিভাৰ বেক্টেৰিয়া। জিভাত আৰু ডিঙিৰ পিছফালে চালফাৰ উৎপাদনকাৰী বেক্টেৰিয়া দ্ৰুতগতিত বৃদ্ধি পায়। এই বেক্টেৰিয়াই খাদ্যত থকা প্ৰটিন ভাঙি পেলায়, যাৰ ফলত মুখৰ দুৰ্গন্ধৰ সৃষ্টি হয়।
পানী কমকৈ খালেও মুখৰ গোন্ধ ওলাব পাৰে। যেতিয়া আপোনাৰ শৰীৰত পানীলগা হয় তেতিয়া লালা উৎপাদন কমি যায়। ইয়াৰ ফলত মুখৰ দুৰ্গন্ধ হ’ব পাৰে।
তদুপৰি নিয়মিতভাৱে কফি খালেও মুখৰ দুৰ্গন্ধ আহিব পাৰে। কাৰণ কেফেইনে লালা উৎপাদন হ্ৰাস কৰে। ই আপোনাৰ মুখৰ ভিতৰৰ অংশ শুকুৱাই পেলায়। যাৰ ফলত মুখৰ দুৰ্গন্ধ হ’ব পাৰে।
বেছি ধূমপান কৰিলেও মুখৰ ভিতৰৰ অংশ শুকাই যায়। যাৰ ফলত মুখৰ দুৰ্গন্ধ হ’ব পাৰে। ধূমপান এৰিলে এই দুৰ্গন্ধও নাইকিয়া হৈ যাব। বেছিকৈ পিঁয়াজ আৰু নহৰু খালে মুখৰ দুৰ্গন্ধ হ’ব পাৰে। সেইবাবেই এনে খাদ্য খোৱাৰ পিছত মুখখন ভালদৰে ধুব লাগে।
মুখৰ দুৰ্গন্ধ কম কৰিবলৈ নিয়মিতভাৱে দাঁত ব্ৰাছ আৰু ফ্লছ কৰিব লাগে। লগতে প্ৰচুৰ পৰিমাণে পানী খাব লাগে। এই পদ্ধতিসমূহ পালন কৰাৰ পিছত যদি মুখৰ দুৰ্গন্ধ কমি নাযায়, তেন্তে দন্ত চিকিৎসকৰ পৰামৰ্শ লোৱাটোৱেই উত্তম। শৰীৰৰ অন্যান্য সমস্যাৰ বাবেও মুখৰ দুৰ্গন্ধৰ সৃষ্টি হ’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
