চেক বাউন্সৰ গোচৰত বলীউডৰ অভিনেতা ৰাজপাল যাদৱক তীব্ৰ ধমক দিলে উচ্চতম ন্যায়ালয়ে। মঙলবাৰে মুখ্য ন্যায়াধীশ সূৰ্যকান্তৰ নেতৃত্বত গঠিত বিচাৰপীঠে গোচৰটোৰ শুনানি গ্ৰহণ কৰি ৰাজপাল যাদৱক বাকী থকা ধনৰ ভিতৰত কমেও ২ কোটি টকা উচ্চতম ন্যায়ালয়ৰ পঞ্জীয়নত জমা দিবলৈ নিৰ্দেশ দিয়ে। আদালতে স্পষ্ট কৰি দিয়ে যে এইটোৱেই ৰাজপাল যাদৱৰ বাবে শেষ সুযোগ। শুনানিৰ সময়ত আদালতে তেওঁৰ পূৰ্বৰ কাৰ্যকলাপক লৈ অসন্তুষ্টি প্ৰকাশ কৰাৰ লগতে তেওঁক বিশ্বাস কৰাটো কঠিন বুলি মন্তব্য কৰে।
মুখ্য ন্যায়াধীশ সূৰ্য কান্তে কঠোৰ মন্তব্য কৰি কয় যে ৰাজপাল যাদৱ বলীউডত অভিনয় আৰু নাটকৰ বাবে পৰিচিত, কিন্তু আদালততো তেওঁ একেধৰণৰ আচৰণ কৰি আছে। আদালতে প্ৰশ্ন কৰে—পূৰ্বৰ আচৰণৰ পিছত তেওঁক কোনে বিশ্বাস কৰিব? শুনানিৰ সময়ত ৰাজপাল যাদৱৰ অধিবক্তাই আদালতক আশ্বাস দিয়ে যে তেওঁ দুসপ্তাহৰ ভিতৰত কমেও ২ কোটি টকা উচ্চতম ন্যায়ালয়ৰ পঞ্জীয়নত জমা দিব। লগতে বাকী ধনৰ ক্ষেত্ৰত জামিনৰ ব্যৱস্থা কৰাৰ কথাও আদালতক অৱগত কৰা হয়। উল্লেখ্য যে চেক বাউন্সৰ গোচৰত ৰাজপাল যাদৱ অভিযোগকাৰী মুৰলী প্ৰডাকচনৰ ওচৰত প্ৰায় ৫ কোটি টকা ঋণী বুলি জানিব পৰা গৈছে।
আদালতে ৰাজপাল যাদৱক ধন জমা দিয়াৰ বাবে শেষ সুযোগ দিয়াৰ লগতে গ্ৰেপ্তাৰৰ পৰাও সাময়িক সকাহ প্ৰদান কৰিছে। অহা ৫ অক্টোবৰত পৰৱৰ্তী শুনানি অনুষ্ঠিত নোহোৱালৈকে তেওঁৰ গ্ৰেপ্তাৰৰ ওপৰত স্থগিতাদেশ অব্যাহত থাকিব। ইয়াৰ উপৰি আদালতে অভিনেতাগৰাকীক তেওঁৰ পাছপ’ৰ্ট জমা দিবলৈও নিৰ্দেশ দিছে। ইয়াৰ পূৰ্বে চেক বাউন্সৰ সাতটা গোচৰত ৰাজপাল যাদৱক তিনি মাহৰ কাৰাদণ্ডৰ শাস্তি দিয়া হৈছিল। দিল্লী উচ্চ ন্যায়ালয়ে তেওঁক ১০ ছেপ্টেম্বৰৰ ভিতৰত আত্মসমৰ্পণ কৰিবলৈ নিৰ্দেশ দিছিল।
ইয়াৰ পিছতে অভিনেতাগৰাকীয়ে উচ্চতম ন্যায়ালয়ৰ কাষ চাপে। ৮ ছেপ্টেম্বৰৰ শুনানিত উচ্চতম ন্যায়ালয়ে কৈছিল যে ৰাজপাল যাদৱ আৰু আন আবেদনকাৰীয়ে নিৰ্দিষ্ট সময়ৰ ভিতৰত ৫ কোটি টকা আদালতৰ পঞ্জীয়নত জমা কৰিলে আত্মসমৰ্পণৰ পৰা ৰেহাই পাব পাৰে। কিন্তু নিৰ্ধাৰিত ধন জমা কৰাত ব্যৰ্থ হোৱাৰ পিছতো আদালতে তেওঁক তাৎক্ষণিক গ্ৰেপ্তাৰৰ পৰা সুৰক্ষা প্ৰদান কৰে। এতিয়া ৫ অক্টোবৰৰ পৰৱৰ্তী শুনানিলৈকে এই সুৰক্ষা বাহাল থাকিব। আদালতৰ কঠোৰ মন্তব্য আৰু ২ কোটি টকা জমা দিয়াৰ নিৰ্দেশে গোচৰটোত নতুন গুৰুত্ব লাভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
