অসমীয়া সংগীত জগতৰ মহানায়ক জুবিন গাৰ্গৰ জীৱনৰ সৈতে জড়িত বহু স্মৃতিৰ ভিতৰত যোৰহাটৰ এখন ঘৰ বিশেষভাৱে উল্লেখযোগ্য। এই ঘৰখন আছিল জুবিন গাৰ্গৰ প্ৰাণৰ বন্ধু প্ৰয়াত জয়ন্ত বৰপাত্ৰৰ। কেৱল এটা বাসগৃহ হিচাপে নহয়, এই ঘৰখন জুবিনৰ সৃষ্টিশীলতাৰ এক গুৰুত্বপূৰ্ণ সাক্ষী হৈ ৰৈছে। জয়ন্ত বৰপাত্ৰৰ এই ঘৰখনতেই জুবিন গাৰ্গৰ প্ৰথম তথা কালজয়ী এলবাম ‘অনামিকা’ৰ বহু অমৰ সুৰ আৰু হৃদয়স্পৰ্শী শব্দৰ সৃষ্টি হৈছিল। সেই সময়ত জুবিনে এখন ৰঙা চাইকেল লৈ সঘনাই জয়ন্ত বৰপাত্ৰৰ ঘৰলৈ আহ-যাহ কৰিছিল। দিনৰ পিছত দিন, আনকি বহু ৰাতিও তেওঁ এই ঘৰখনতে অতিবাহিত কৰিছিল।
বন্ধু জয়ন্ত বৰপাত্ৰৰ ঘৰৰ এটা সৰু কোঠাই আছিল জুবিন দাৰ সংগীত জীৱনৰ প্ৰাৰম্ভিক সময়ৰ সৃষ্টিৰ অন্যতম স্থান। সেই সময়ত কোনো অত্যাধুনিক ষ্টুডিঅ’ বা বৃহৎ আয়োজনৰ প্ৰয়োজন হোৱা নাছিল। সাধাৰণ পৰিৱেশতে জুবিন দাই নিজৰ মনৰ ভাব, অনুভূতি আৰু সুৰক গীতৰ ৰূপ দিছিল। কেতিয়াবা সৰু কাগজৰ টুকুৰাত, আনকি চিগাৰেটৰ বাকচৰ পিঠিতো জুবিন দাই মনলৈ অহা শব্দ আৰু সুৰ লিখি ৰাখিছিল বুলি উল্লেখ কৰা হয়। সেই সৰু কোঠাটোৰ স্বতঃস্ফূৰ্ত পৰিৱেশতেই লাহে লাহে গঢ় লৈ উঠিছিল ‘অনামিকা’ৰ বহু স্মৰণীয় সৃষ্টি। এজন উদীয়মান শিল্পীৰ প্ৰতিভা আৰু দুজন ঘনিষ্ঠ বন্ধুৰ মাজৰ গভীৰ বন্ধুত্বৰ উমে সেই সৰু কোঠাটোক যেন এক সৃষ্টিৰ ক্ষেত্ৰলৈ পৰিণত কৰিছিল। সেয়েহে ‘অনামিকা’ কেৱল এটা সংগীত এলবাম নহয়, জুবিন দা আৰু তেওঁৰ বন্ধুত্বৰ বহু স্মৃতি কঢ়িয়াই ফুৰা এক বিশেষ অধ্যায় বুলিও ক’ব পাৰি।
জুবিন গাৰ্গ আৰু জয়ন্ত বৰপাত্ৰৰ বন্ধুত্ব আছিল অত্যন্ত অন্তৰংগ। তেওঁলোকৰ দৈনন্দিন জীৱনৰ সৰু সৰু কথাতো এই বন্ধুত্বৰ গভীৰতা প্ৰকাশ পাইছিল। জুবিনে যেতিয়ালৈকে নিশ্চিত নহৈছিল যে বন্ধু জয়ন্তই ভাত খাইছে, তেতিয়ালৈকে তেওঁ নিজেও ভাত নোখোৱাকৈ থাকিছিল বুলি জানিব পৰা যায়। “জয়ন্তই ভাত খালে নে নাই?”—এই প্ৰশ্নটো জুবিনৰ বাবে যথেষ্ট গুৰুত্বপূৰ্ণ আছিল। এই বন্ধুত্ব কেৱল দুজন ব্যক্তিৰ মাজতে সীমাবদ্ধ নাছিল। সময়ৰ লগে লগে দুয়োটা পৰিয়ালৰ মাজতো এক গভীৰ আত্মীয়তাৰ সম্পৰ্ক গঢ় লৈ উঠিছিল।
জয়ন্ত বৰপাত্ৰৰ ভগ্নী সুৰভি বৰপাত্ৰ গোহাঁই আৰু মনালিছা বৰপাত্ৰ গগৈক জুবিন দাই নিজৰ ভগ্নী আৰু বায়েকৰ দৰে মৰম আৰু সন্মান কৰিছিল। একেদৰে জয়ন্তৰ মাতৃকো জুবিন দাই নিজৰ জন্মদাত্ৰী মাতৃৰ দৰেই শ্ৰদ্ধা আৰু সন্মান জনাইছিল বুলি জয়ন্ত বৰপাত্ৰৰ পৰিয়ালে অসম Live24ৰ যোৰহাটৰ সাংবাদিক চন্দন কলিতাৰ আগত অতীতৰ সেই মধুৰ স্মৃতিবোৰ ৰোমন্থন কৰে।
যোৰহাটৰ সেই সাধাৰণ ঘৰখনতেই সংগীত জগতৰ মহানায়কগৰাকীয়ে সংগীত জীৱনৰ প্ৰাৰম্ভিক সময়ছোৱা বহু সৃষ্টিৰ সাক্ষী আছিল। সেয়ে সেই ঘৰখন এতিয়া কেৱল এখন ঘৰেই নহয়, জুবিন গাৰ্গৰ সৃষ্টিশীল যাত্ৰা, ‘অনামিকা’ৰ জন্ম আৰু জয়ন্ত বৰপাত্ৰৰ সৈতে তেওঁৰ গভীৰ বন্ধুত্বৰ বহু স্মৃতিৰ সৈতে জড়িত এক আবেগিক স্থান হিচাপে এই ঘৰখনৰ বিশেষ তাৎপৰ্য আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
