আজি, ১৭ ছেপ্টেম্বৰ। দেশজুৰি প্ৰধানমন্ত্ৰী নৰেন্দ্ৰ মোদীৰ ৭৬ সংখ্যক জন্মদিন উদযাপন কৰা হৈছে। ১৯৫০ চনৰ ১৭ ছেপ্টেম্বৰত গুজৰাটৰ বদনগৰত জন্মগ্ৰহণ কৰিছিল নৰেন্দ্ৰ মোদীয়ে। জন্মদিনৰ এই বিশেষ দিনটোত মোদীৰ সৈতে জড়িত এটা পুৰণি আৰু আমোদজনক কাহিনী আকৌ এবাৰ চৰ্চালৈ আহিছে। এই কাহিনীটো জড়িত হৈ আছে ৰিলায়েন্সৰ প্ৰতিষ্ঠাপক ধীৰুভাই আম্বানীৰ সৈতে। ২০১৬ চনত নৰেন্দ্ৰ মোদীৰ জন্মদিন উপলক্ষে ধীৰুভাই আম্বানীৰ পুত্ৰ অনিল আম্বানীয়ে এই কাহিনীটো ৰাজহুৱা কৰিছিল।
অনিল আম্বানীৰ মতে, নব্বৈৰ দশকত ধীৰুভাই আম্বানীয়ে নৰেন্দ্ৰ মোদীক নিজৰ ঘৰলৈ ৰাতিৰ আহাৰৰ বাবে আমন্ত্ৰণ জনাইছিল। সেই সময়ত দুয়োৰে মাজত দীঘলীয়া সময় ধৰি বিভিন্ন বিষয়ক লৈ কথা-বতৰা হৈছিল। অনিল আম্বানীয়ে দাবী কৰা অনুসৰি, সেই সাক্ষাতৰ পিছত ধীৰুভাই আম্বানীয়ে নৰেন্দ্ৰ মোদীৰ বিষয়ে এটা বিশেষ মন্তব্য কৰিছিল। তেওঁ গুজৰাটী ভাষাত কৈছিল— “লাম্ভি জাতি ন’ ঘোডো ছে, নেতা ছে—পি এম বনছে।” ইয়াৰ অৰ্থ আছিল— “এইগৰাকী দীঘলীয়া ৰেচৰ ঘোঁৰা। তেওঁ এজন নেতা আৰু এদিন প্ৰধানমন্ত্ৰী হ’ব।”
এই কাহিনীটোৰ আটাইতকৈ আকৰ্ষণীয় কথাটো হ’ল—ধীৰুভাই আম্বানীয়ে যেতিয়া এই মন্তব্য কৰিছিল তেতিয়া নৰেন্দ্ৰ মোদীয়ে গুজৰাটৰ মুখ্যমন্ত্ৰীও হোৱা নাছিল। ২০০১ চনত নৰেন্দ্ৰ মোদী গুজৰাটৰ মুখ্যমন্ত্ৰী হৈছিল। তাৰ বহু আগতেই ধীৰুভাই আম্বানীয়ে তেওঁৰ নেতৃত্বৰ সম্ভাৱনা অনুভৱ কৰিছিল বুলি অনিল আম্বানীয়ে দাবী কৰিছিল। ২০১৪ চনৰ লোকসভা নিৰ্বাচনৰ পিছত নৰেন্দ্ৰ মোদী ভাৰতৰ প্ৰধানমন্ত্ৰী হয়। অনিল আম্বানীয়ে ২০১৬ চনৰ জন্মদিনৰ বাৰ্তাত কৈছিল যে ২০১৪ চনৰ নিৰ্বাচনৰ ফলাফল দেখাৰ পিছত তেওঁৰ পিতৃ ধীৰুভাই আম্বানীৰ সেই পুৰণি কথাটো তেওঁৰ মনত পৰিছিল। প্ৰধানমন্ত্ৰী নৰেন্দ্ৰ মোদীৰ ৭৬ সংখ্যক জন্মদিনৰ দিনা নব্বৈৰ দশকৰ এই পুৰণি কাহিনীটোৱে পুনৰ চৰ্চা লাভ কৰিছে। বিশেষকৈ মোদী সেই সময়ত কোনো মুখ্যমন্ত্ৰীও নোহোৱাৰ পিছতো ধীৰুভাই আম্বানীয়ে তেওঁৰ ৰাজনৈতিক ভৱিষ্যৎ সম্পৰ্কে এনে মন্তব্য কৰিছিল বুলি কোৱা কথাটোৱেই কাহিনীটোক অধিক আকৰ্ষণীয় কৰি তুলিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
