ৰাজস্থানৰ ৰাজধানী জয়পুৰত সংঘটিত ৪১.৭০ লাখ টকাৰ ডকাইতিৰ ঘটনাৰ ৰহস্যভেদ কৰিছে আৰক্ষীয়ে। ৰামনগৰীয়া থানা এলেকাৰ অক্ষয় পাত্ৰ চৌহদৰ সমীপত তিনিদিন পূৰ্বে সংঘটিত হৈছিল এই ডকাইতি। ঘটনাৰ তদন্ত চলাই আৰক্ষীয়ে নদবাইৰ লালপুৰ নিবাসী ২২ বছৰীয়া অংশু কুমাৰী জাটাভক গ্ৰেপ্তাৰ কৰিছে। তেওঁৰ পৰা ২৬.৮০ লাখ টকা উদ্ধাৰ কৰা হৈছে। আৰক্ষীৰ তথ্য অনুসৰি, এই ডকাইতিৰ আঁৰত অংশুৰ প্ৰেমিক আৰু তেওঁৰ দুই বন্ধুও জড়িত। অৱশ্যে তেওঁলোক বৰ্তমান পলাতক হৈ আছে। আৰক্ষীয়ে মষ্ট্ৰম, পুষ্পেন্দ্ৰ মীনা আৰু সুমিত জংগম নামৰ তিনিজন অভিযুক্তক বিচাৰি অভিযান অব্যাহত ৰাখিছে।
ঘটনাটো সংঘটিত হৈছিল ১৪ ছেপ্টেম্বৰৰ পুৱা প্ৰায় ১০:৩০ বজাত। অক্ষয় পাত্ৰ মন্দিৰৰ সমীপত থকা বেংক অব ইণ্ডিয়াৰ ATMৰ পৰা বেংকৰ কৰ্মচাৰীয়ে নগদ ধন উলিয়াই আনিছিল। ঠিক সেই সময়তে বাইকত অহা দুজন অ*স্ত্ৰধাৰী যুৱকে কৰ্মচাৰীসকলক বন্দুক দেখুৱাই ভাবুকি দিয়ে। তাৰ পিছতে তেওঁলোকৰ পৰা ৪১.৭০ লাখ টকা লুটি লৈ ঘটনাস্থলীৰ পৰা পলায়ন কৰে। ঘটনাৰ পিছতে আৰক্ষীয়ে তদন্ত আৰম্ভ কৰে। তদন্তৰ অংশ হিচাপে ১,০০০ৰো অধিক চিচিটিভি কেমেৰাৰ ফুটেজ পৰীক্ষা কৰা হয়। ফুটেজ বিশ্লেষণ কৰি আৰক্ষীয়ে জানিব পাৰে যে অংশু কুমাৰীয়ে ডকাইতিৰ কেইবাদিনো পূৰ্বৰে পৰা ATMটোৰ আশে-পাশে ঘূৰি তথ্য সংগ্ৰহ কৰি আছিল।
আৰক্ষীৰ জেৰাত অংশুৱে ডকাইতিৰ পৰিকল্পনাৰ সন্দৰ্ভত কেইবাটাও তথ্য প্ৰকাশ কৰা বুলি জানিব পৰা গৈছে। আৰক্ষীৰ মতে, অংশুৰ প্ৰেমিক কৰাউলীৰ বাসিন্দা মষ্ট্ৰমে বেংকৰ এজন কৰ্মচাৰীক চিনি পাইছিল। সেই কৰ্মচাৰীৰ পৰা তেওঁ জানিব পাৰিছিল যে অক্ষয় পাত্ৰ ATMৰ পৰা সাধাৰণতে মহিলা কৰ্মচাৰীয়ে ধন উলিয়াই আনে। লগতে সেই সময়ত তেওঁলোকৰ লগত কোনো নিৰাপত্তাৰক্ষী নথকাৰ কথাও জানিব পাৰিছিল। এই তথ্যৰ ভিত্তিতে ধন লুট কৰাটো সহজ হ’ব বুলি তেওঁলোকে ভাবিছিল।
ইয়াৰ পিছত মষ্ট্ৰমে তেওঁৰ প্ৰেমিকা অংশুক তেওঁৰ দুই বন্ধু পুষ্পেন্দ্ৰ মীনা আৰু সুমিত জংগমৰ সৈতে চিনাকি কৰাই দিয়ে। আৰক্ষীৰ মতে, অংশুৰ কোঠাতেই তেওঁলোকে মিলিত হৈ সমগ্ৰ ডকাইতিৰ পৰিকল্পনা ৰচনা কৰে। পৰিকল্পনা অনুসৰি অংশুক বেংকৰ কৰ্মচাৰীসকলৰ গতিবিধিৰ ওপৰত নজৰ ৰাখিবলৈ পঠিওৱা হয়। ১৪ ছেপ্টেম্বৰত বেংকৰ কৰ্মচাৰীসকলে নগদ ধন লৈ ATMৰ পৰা ওলাই যোৱাৰ সময়ত অংশুৱে ফোনযোগে সহযোগীসকলক খবৰ দিয়ে। কিছু সময়ৰ পিছতে বাইকত অহা দুজন অভিযুক্তই বন্দুক দেখুৱাই কৰ্মচাৰীসকলৰ পৰা ৪১.৭০ লাখ টকা লুটি লৈ পলায়ন কৰে।
প্ৰাৰম্ভিক তদন্তত আৰক্ষীয়ে অংশু আৰু তেওঁৰ সহযোগীসকল ঋণত ডুবি থকাৰ তথ্য লাভ কৰিছে। ঋণ পৰিশোধৰ বাবে ধনৰ প্ৰয়োজন হোৱাৰ বাবেই তেওঁলোকে এই ডকাইতিৰ পৰিকল্পনা কৰিছিল বুলি আৰক্ষীৰ প্ৰাথমিক তদন্তত পোহৰলৈ আহিছে। তদন্তত অংশুৱে এই কথাও উল্লেখ কৰে যে প্ৰেমিক মষ্ট্ৰমৰ উন্নত ভৱিষ্যতৰ বাবে তেওঁলোকে এই পৰিকল্পনা কৰিছিল। আনহাতে, ১৪ ছেপ্টেম্বৰ তাৰিখটোও পৰিকল্পিতভাৱে বাছনি কৰা হৈছিল বুলি আৰক্ষীয়ে জানিবলৈ দিছে। ইয়াৰ আগৰ তিনিটা দিন বন্ধ থকাৰ বাবে বেংকৰ হাতত তুলনামূলকভাৱে অধিক নগদ ধন থাকিব বুলি তেওঁলোকে অনুমান কৰিছিল।
বৰ্তমান আৰক্ষীয়ে অংশু কুমাৰীক গ্ৰেপ্তাৰ কৰাৰ লগতে তেওঁৰ পৰা ২৬.৮০ লাখ টকা উদ্ধাৰ কৰিছে। পলাতক মষ্ট্ৰম, পুষ্পেন্দ্ৰ মীনা আৰু সুমিত জংগমক বিচাৰি আৰক্ষীৰ অভিযান অব্যাহত আছে। ঘটনাটোৰ সৈতে জড়িত আন তথ্য আৰু উদ্ধাৰ কৰিবলগীয়া ধনৰ সন্ধানো চলি আছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
