১৬ বছৰ বয়সতে স্তনপানৰ কৰিছিল অভিনয়

১৯৮৫ চনত মুক্তি লাভ কৰা ৰাজ কাপুৰৰ ছবি ‘ৰাম তেৰী গংগা মেইলী’ কেৱল কাহিনীৰ বাবেই নহয়, ছবিখনৰ কেইবাটাও দৃশ্যৰ বাবেও সেই সময়ত ব্যাপক চৰ্চালৈ আহিছিল। বিশেষকৈ অভিনেত্ৰী মন্দাকিনীৰ জলপ্ৰপাতৰ দৃশ্য আৰু ৰে’লত কেঁচুৱাক স্তনপান কৰোৱা যেন লগা দৃশ্য দুটাই দৰ্শকৰ মাজত যথেষ্ট চৰ্চা আৰু বিতৰ্কৰ সৃষ্টি কৰিছিল। ছবিখনৰ জৰিয়তে মন্দাকিনীয়ে বলীউডত এক বিশেষ পৰিচয় লাভ কৰিছিল। গংগা নামৰ চৰিত্ৰটোত তেওঁৰ নিৰীহ চেহেৰা আৰু অভিনয়ে দৰ্শকৰ মন জয় কৰিছিল। কিন্তু ছবিখনৰ দৃশ্যসমূহক লৈ বছৰ বছৰ ধৰি বিভিন্ন আলোচনা চলি আহিছে। এতিয়া ছবিখন মুক্তি পোৱাৰ প্ৰায় চাৰি দশকৰ পাছত অভিনেত্ৰীগৰাকীয়ে সেই সময়ৰ কিছু কথা প্ৰকাশ কৰিছে।

ANIৰ সৈতে হোৱা এক সাক্ষাৎকাৰত মন্দাকিনীয়ে কয় যে ‘ৰাম তেৰী গংগা মাইলী’ৰ শ্বুটিং আৰম্ভ কৰাৰ সময়ত তেওঁৰ বয়স মাত্ৰ ১৬ বছৰ আছিল। সেই সময়ত তেওঁ চলচ্চিত্ৰ জগতৰ বাবে একেবাৰে নতুন আছিল। উত্তৰ প্ৰদেশৰ মেৰুটৰ পৰা অহা মন্দাকিনীৰ বাবে বলীউড আছিল সম্পূৰ্ণ নতুন এখন পৃথিৱী। ছবিখনৰ কোনো দৃশ্য পৰৱৰ্তী সময়ত ইমান চৰ্চিত হ’ব পাৰে বুলি তেওঁ সেই সময়ত কল্পনাও কৰা নাছিল। ‘ৰাম তেৰী গংগা মাইলী’ৰ ‘তুঝে বুলায়েইন য়ে মেৰী বাহেন’ গীতটোত মন্দাকিনীক বগা শাৰী পিন্ধি জলপ্ৰপাতৰ তলত দেখা গৈছিল। এই দৃশ্যটো হিন্দী চিনেমাৰ অন্যতম পৰিচিত দৃশ্য হিচাপে পৰিগণিত হয়।

মন্দাকিনীয়ে কয় যে দৃশ্যটো শ্বুট কৰাৰ আগতেই ৰাজ কাপুৰে তেওঁক সম্পূৰ্ণ দৃশ্যটো বুজাই দিছিল। তেওঁৰ মতে, ৰাজ কাপুৰৰ ব্যৱহাৰ অতি স্বাভাৱিক, মৰমীয়াল আৰু কোমল আছিল। সেয়েহে দৃশ্যটো শ্বুট কৰাৰ সময়ত তেওঁ কোনো অস্বস্তি বা অশ্লীলতাৰ অনুভৱ কৰা নাছিল। মন্দাকিনীয়ে কয় যে ছবিখনৰ মূল ধাৰণাটো আছিল গংগাৰ বিশুদ্ধতা আৰু নিৰ্দোষিতা। কাহিনীটোত গংগাৰ বিশুদ্ধতাক বিভিন্ন পৰিস্থিতিৰ মাজেৰে পৰীক্ষা কৰা হৈছিল যদিও চৰিত্ৰটোৰ ভিতৰৰ নিৰ্মলতা বজাই ৰখাৰ কথাই ছবিখনত গুৰুত্ব লাভ কৰিছিল। অভিনেত্ৰীগৰাকীয়ে লগতে কয় যে শ্বুটিঙৰ সময়ত কেতিয়াবা তেওঁৰ সংকোচ অনুভৱ হৈছিল আৰু তেনে সময়ত তেওঁ ৰাজ কাপুৰৰ সৈতে কথা পাতিছিল।

ছবিখনৰ আন এটা বহুচৰ্চিত দৃশ্য আছিল ৰে’লত মন্দাকিনীৰ চৰিত্ৰটোৱে কেঁচুৱাক স্তনপান কৰাই থকা যেন দেখুওৱা দৃশ্য। এই দৃশ্যটোৰ বিষয়ে মন্দাকিনীয়ে কয় যে বাস্তৱতে তাত কোনো স্তনপান কৰা হোৱা নাছিল। কেমেৰাৰ এংগেল আৰু দৃশ্যটোৰ উপস্থাপনৰ বাবেই দৰ্শকৰ এনে ধাৰণা হৈছিল। তেওঁ বুজাই কয় যে তেওঁ লো-কাট পোছাক পিন্ধিছিল আৰু কেঁচুৱাটোক শৰীৰৰ ওচৰত ধৰি ৰাখিছিল। কেমেৰাৰ বিশেষ এংগেলৰ বাবে দৃশ্যটো এগৰাকী মাতৃয়ে কেঁচুৱাক স্তনপান কৰাই থকাৰ দৰে দেখা গৈছিল। কিন্তু বাস্তৱত তেনে একো হোৱা নাছিল বুলি তেওঁ স্পষ্ট কৰে।

‘ৰাম তেৰী গংগা মাইলী’ৰ সফলতাৰ পিছত মন্দাকিনী অতি কম সময়ৰ ভিতৰতে জনপ্ৰিয় অভিনেত্ৰী হৈ পৰিছিল। ছবিখনৰ জলপ্ৰপাতৰ দৃশ্যটোও দৰ্শকৰ মাজত অত্যন্ত জনপ্ৰিয় হৈছিল। মন্দাকিনীয়ে প্ৰকাশ কৰা মতে, পৰৱৰ্তী সময়ত বহু প্ৰযোজক আৰু পৰিচালকে তেওঁক একে ধৰণৰ দৃশ্য পুনৰ সৃষ্টি কৰিবলৈ অনুৰোধ কৰিছিল। কিন্তু তেওঁ সেই প্ৰস্তাৱসমূহ গ্ৰহণ কৰা নাছিল। তেওঁৰ মতে, কেৱল সাহসী বা বিতৰ্কিত দৃশ্যৰ বাবে এখন ছবি সফল নহয়। এখন ভাল ছবিৰ বাবে শক্তিশালী কাহিনী, পৰিচালকৰ দৃষ্টিভংগী, ছবিখনৰ উপস্থাপন আৰু গুৰুত্বপূৰ্ণ বাৰ্তা আটাইতকৈ প্ৰয়োজনীয়। ‘ৰাম তেৰী গংগা মাইলী’ৰ বিপুল সফলতাৰ পিছত মন্দাকিনীয়ে বলীউডৰ কেইবাগৰাকীও জনপ্ৰিয় অভিনেতাৰ সৈতে কাম কৰে। মিথুন চক্ৰৱৰ্তী আৰু গোবিন্দৰ সৈতে তেওঁ ‘ডান্স ডান্স’, ‘কমাণ্ডো’ আৰু ‘জাল’ আদি ছবিত অভিনয় কৰিছিল।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ