গুৱাহাটী মহানগৰীত পুনৰ সংঘটিত হৈছে এক লোমহৰ্ষক হ*ত্যাকাণ্ড। ধাৰাপুৰৰ এগৰাকী যুৱতীৰ মৃ*তদেহ উদ্ধাৰ হৈছে গড়লস্থিত এটা হোমষ্টেত। যুৱতীগৰাকী ধাৰাপুৰৰ দ্বীপ ঠাকুৰীয়া নামৰ লোকজনৰ জ্যেষ্ঠ কন্যা নিমিষা ঠাকুৰীয়াৰ বুলি চিনাক্ত হৈছে। প্ৰাপ্ত তথ্য অনুসৰি, নিমিষা ঠাকুৰীয়াক বন্ধু আছিক আলীয়ে নিশা প্ৰায় ১১ বজাত গড়লস্থিত হোমষ্টেটোলৈ নিছিল। আনহাতে মাতৃয়ে সদৰী কৰা অনুসৰি, ঘৰৰ পৰা সন্ধিয়া ৫ বজাতে এগৰাকী বান্ধৱীৰ ঘৰলৈ যাম বুলি ঘৰৰ পৰা ওলাই গৈছিল নিমিষাই।
উল্লেখ্য যে ঘৰৰ পৰা ওলাই যোৱাৰ কিছু সময় পিছতে নিমিষাই মাতৃলৈ ফোন কৰিছিল। সেই ফোনকলত আছিক আলীয়ে নিমিষাক শাৰীৰিকভাৱে অত্যাচাৰ কৰা বুলি অভিযোগ কৰাৰ কথা পৰিয়ালৰ ফালৰ পৰা জানিবলৈ দিয়ে। ফোনকলটোত নিমিষাক বুকুত গুৰিওৱাৰ কথা ব্যক্ত কৰে নিমিষাৰ মাতৃয়ে। ইয়াৰ পিছতে নিমিষাৰ ফোনটো চুইচ অফ হৈ পৰে। ফলত পৰিয়ালৰ মাজত উদ্বেগৰ সৃষ্টি হয়। পৰিয়ালে ততাতৈয়াকৈ ঘটনাটোৰ বিষয়ে স্থানীয় আজাৰা আৰক্ষীক অৱগত কৰে।
ইপিনে আৰক্ষীয়ে সদৰী কৰা মতে আছিক আলীয়ে আন দুজন যুৱকৰ সৈতে আজাৰা PHCলৈ নিমিষাক ভৰ্তি কৰায় যদিও আজাৰা PHCত নিমিষাক মৃত ঘোষণা কৰে চিকিৎসকে। পৰিয়ালৰ অভিযোগ লাভ কৰাৰ পিছতে আৰক্ষীয়ে ঘটনাটোৰ তদন্ত আৰম্ভ কৰে। ইতিমধ্যে ঘটনাৰ মূল অভিযুক্ত আছিক আলীৰ লগতে আন দুজন যুৱককো আটক কৰিছে আৰক্ষীয়ে। আছিক আলীয়েই নিমিষাক হত্যাৰ অভিযোগ উত্থাপন কৰিছে নিমিষাৰ পিতৃয়ে।
ইতিমধ্যে নিমিষাৰ মৃ*তদেহ মৰণোত্তৰ পৰীক্ষাৰ বাবে গুৱাহাটী চিকিৎসা মহাবিদ্যালয় হাস্পতাললৈ (GMCH) প্ৰেৰণ কৰা হৈছে। মৰণোত্তৰ পৰীক্ষাৰ প্ৰতিবেদন লাভ কৰাৰ পিছত মৃ*ত্যুৰ প্ৰকৃত কাৰণ সন্দৰ্ভত অধিক তথ্য পোহৰলৈ অহাৰ সম্ভাৱনা আছে। ইতিমধ্যে আৰক্ষীয়ে আছিক আলীৰ লগতে আন দুজন যুৱকক আটক কৰি জেৰা অব্যাহত ৰাখিছে।
এই ঘটনাৰ আঁৰত প্ৰকৃততে কি হৈছিল, নিমিষাৰ সৈতে আৰু কোনোবা আছিল নেকি বা নিমিষাৰ হ*ত্যাত কোন কোন জড়িত আছিল—এই সকলো দিশ আৰক্ষীয়ে তদন্ত কৰি আছে। আৰক্ষীৰ তদন্ত সম্পূৰ্ণ হোৱাৰ পিছতহে ঘটনাটোৰ প্ৰকৃত ৰহস্য উদঘাটন হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
