গুৱাহাটীৰ গঢ়লত সংঘটিত নিমিষা ঠাকুৰীয়া নামৰ ২২ বছৰীয়া যুৱতীগৰাকীৰ মৃত্যুৰ ঘটনাক লৈ চাঞ্চল্য অব্যাহত আছে। ঘটনাটোৰ তদন্ত আগবঢ়াৰ সমান্তৰালভাৱে দণ্ডাধীশৰ ৰিপোৰ্টত পোহৰলৈ অহা বুলি উল্লেখ কৰা কেতবোৰ তথ্যই আৰু অধিক ভয়ংকৰ আৰু শিহৰণকাৰী। তথ্য অনুসৰি, যুৱতীগৰাকীৰ ওঁঠ, গল, বুকু আৰু গোপন অংগত আঘাতৰ চিন পোৱা গৈছে বুলি প্ৰাপ্ত তথ্যত প্ৰকাশ। নিশা গুৰুতৰভাৱে আহত অৱস্থাত যুৱতীগৰাকীক গঢ়ল প্ৰাথমিক স্বাস্থ্য কেন্দ্ৰলৈ (PHC) লৈ যোৱা হৈছিল। পিছত তেওঁক উন্নত চিকিৎসাৰ বাবে GMCHলৈ স্থানান্তৰ কৰা হয় যদিও চিকিৎসকে মৃ*ত ঘোষণা কৰে।
পোহৰলৈ আহিছে নতুন তথ্য
ঘটনাৰ তদন্তত সংশ্লিষ্ট হোমষ্টেৰ ১০ নম্বৰ কোঠাটোক লৈও তথ্য পোহৰলৈ আহিছে। দিয়া তথ্য অনুসৰি, নিমিষা-আছিকে হোমষ্টেৰ ১০ নম্বৰ কোঠাটো বুক কৰিছিল। নিশা দুয়োজনে এক প্লেট Egg curry থালী অৰ্ডাৰ কৰিছিল বুলিও হোমষ্টেৰ কৰ্মচাৰীয়ে মন্তব্য কৰে। আনহাতে, নিশা প্ৰায় ৩ বজাত আছিকে হোমষ্টেৰ কৰ্মচাৰীক কান্দি কান্দি মাতিছিল বুলিও কৰ্মচাৰীজনেয়ে মন্তব্য কৰা বুলি জানিব পৰা গৈছে। নিমিষা আৰু আছিক মাজে-সময়ে এই হোমষ্টেলৈ আহিছিল বুলিও কৰ্মচাৰীজনে উল্লেখ কৰে। এই তথ্যসমূহে ঘটনাৰ সময়ৰ গতিবিধি আৰু হোমষ্টেত নিমিষা আৰু আছিকৰ উপস্থিতিৰ বিষয়ে তদন্তকাৰী আৰক্ষীক কিছু গুৰুত্বপূৰ্ণ সূত্ৰ দিব পাৰে।
ইপিনে, ঘটনাটো সন্দৰ্ভত আৰক্ষীয়ে প্ৰকাশ কৰা তথ্য অনুসৰি, নিশা প্ৰায় ৪ বজাত গঢ়লত এই ঘটনাৰ তথ্য লাভ কৰে আৰক্ষীয়ে। সংকটজনক অৱস্থাত নিমিষা ঠাকুৰীয়াক চিকিৎসালয়ত ভৰ্তি কৰোৱা হৈছিল যদিও পিছত GMCHৰ চিকিৎসকে তেওঁক মৃ*ত ঘোষণা কৰে। ঘটনাটোৰ সৈতে জড়িত বুলি অভিযোগ উত্থাপিত হোৱা যুৱকজনক আৰক্ষীয়ে ইতিমধ্যে আটক কৰিছে। বৰ্তমান তেওঁ আৰক্ষীৰ জিম্মাত আছে আৰু আৰক্ষীয়ে জেৰা চলাই আছে। সমগ্ৰ ঘটনাটোৰ পুংখানুপুংখ তদন্ত অব্যাহত আছে বুলি আৰক্ষীয়ে জানিবলৈ দিছে।
পিতৃৰ ভাষ্যত ঘটনাৰ বিৱৰণ
নিমিষাৰ পিতৃয়ে জানিবলৈ দিয়া মতে, সন্ধিয়া প্ৰায় ৫ বজাত বান্ধৱীৰ ঘৰলৈ যাম বুলি কৈ নিমিষা ঘৰৰ পৰা ওলাই গৈছিল। স্কুটাৰত তেল ভৰোৱা আৰু আনুসংগিক খৰচৰ বাবে পিতৃৰ পৰা নিমিষাই ২,০০০ টকা লৈছিল। নিশা দেৰি হ’লে বান্ধৱীৰ হোষ্টেলতে থাকিব বুলি নিমিষাই পৰিয়ালক জনাইছিল। নিশা প্ৰায় ১০ বজাতো নিমিষাই হোষ্টেলতে থাকিব বুলি ঘৰত জনোৱা বুলি পিতৃয়ে কয়। কিন্তু নিশা প্ৰায় ২ বজাত নিমিষাই মাতৃলৈ ফোন কৰে। সেই ফোনকলত নিমিষাই, ‘মা, মোক বুকুত গুৰিয়াইছে’ আৰু ‘মই উশাহ লোৱাত কষ্ট পাইছো’ বুলি কোৱা বুলি পিতৃয়ে জানিবলৈ দিয়ে। পৰিয়ালৰ মতে, সেইটোৱেই আছিল নিমিষাৰ সৈতে হোৱা শেষ কথোপকথন।
আজাৰা, মালিগাঁৱত তীব্ৰ প্ৰতিবাদ
ঘটনাটোৰ পিছতে মালিগাঁৱতো তীব্ৰ প্ৰতিবাদ সাব্যস্ত হয়। প্ৰতিবাদকাৰীসকলে ঘটনাটোৰ ন্যায়সংগত তদন্ত আৰু দোষীৰ কঠোৰ শাস্তিৰ দাবী জনায়। প্ৰতিবাদকাৰীসকলে ‘লাভ জেহাদ বন্ধ কৰক’ আৰু ‘নিমিষা কাণ্ডৰ ঘাতক আছিক আলীক চৰম শাস্তি দিয়ক’ আদি শ্লোগান দিয়ে। ইফালে, আৰক্ষীৰ তদন্ত অব্যাহত আছে। নিমিষাৰ মৃত্যুৰ প্ৰকৃত কাৰণ, তেওঁৰ শৰীৰত আঘাত কেনেকৈ আৰু কেতিয়া হৈছিল, ঘটনাস্থলত উপস্থিত আন লোকসকলৰ ভূমিকা আছিল নেকি—এই সকলো দিশ তদন্তৰ পিছতহে স্পষ্ট হ’ব।
এই প্ৰতিবেদন যুগুতাইছে মানসজ্যোতিয়ে
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
