হাইলাকান্দিত চাকৰি আৰু ঠিকা দিয়াৰ নামত লাখ লাখ টকা সংগ্ৰহ কৰাৰ অভিযোগত অমিত কুমাৰ ৰায় নামৰ এজন বিজেপি নেতাক গ্ৰেপ্তাৰ কৰিছে আৰক্ষীয়ে। অভিযোগ অনুসৰি, জিলাখনৰ বহু লোকক চৰকাৰী চাকৰি দিয়াৰ লগতে বিভিন্ন ঠিকা-কাম দিয়াৰ প্ৰতিশ্ৰুতি দি তেওঁ লাখ লাখ টকা সংগ্ৰহ কৰিছিল। অভিযোগ অনুসৰি, অমিত কুমাৰ ৰায়ে মন্ত্ৰী-বিধায়ক তথা সাংসদৰ সৈতে থকা ফটো দেখুৱাই নিজৰ প্ৰভাৱৰ কথা প্ৰকাশ কৰিছিল। চাকৰি দিয়াৰ নামত আৰু বিভিন্ন ঠিকা-কাম পোৱাই দিয়াৰ প্ৰতিশ্ৰুতি দি বহু লোকৰ পৰা ধন লোৱাৰ অভিযোগ উত্থাপিত হৈছে।
কেৱল চাকৰি দিয়াৰ নামতেই নহয়, হাইলাকান্দিৰ বিভিন্ন ব্যৱসায়িক প্ৰতিষ্ঠানৰ পৰাও ঠিকা দিয়াৰ নামত বাকীকৈ সামগ্ৰী লৈ যোৱাৰ অভিযোগ আছে। পৰৱৰ্তী সময়ত দোকানৰ মালিকে ধন বিচৰাত তেওঁক ভয়-ভাবুকি দিয়াৰো অভিযোগ উত্থাপিত হৈছে। অভিযোগ অনুসৰি, নিজকে এগৰাকী সাংসদৰ প্ৰতিনিধি বুলি পৰিচয় দি ব্যৱসায়ীসকলক ভয় দেখুৱাইছিল অমিত কুমাৰ ৰায়ে।
এই ঘটনাক লৈ একাধিক ভুক্তভোগীয়ে অৱশেষত হাইলাকান্দি সদৰ আৰক্ষী থানাত পৃথক পৃথক গোচৰ ৰুজু কৰে। গোচৰৰ ভিত্তিত তদন্ত চলাই হাইলাকান্দি আৰক্ষীয়ে অমিত কুমাৰ ৰায়ক গ্ৰেপ্তাৰ কৰে। গ্ৰেপ্তাৰৰ পিছত আৰক্ষীয়ে অভিযুক্তজনক আদালতত হাজিৰ কৰায় আৰু আদালতৰ নিৰ্দেশ অনুসৰি তেওঁক ন্যায়িক জিম্মালৈ প্ৰেৰণ কৰা হয়। অৱশ্যে, অমিত কুমাৰ ৰায়ৰ বিৰুদ্ধে উত্থাপিত এই অভিযোগসমূহৰ সত্যতা তদন্ত সম্পূৰ্ণ হোৱাৰ পিছতহে স্পষ্ট হ’ব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
