কোনো আগতীয়া খবৰ নিদিয়াকৈ দক্ষিণাত্যৰ ৰবি তেজা(!) ডিব্ৰুগড়লৈ আহিল, ডিব্ৰুগড়ৰ বিমান বন্দৰত ৰবি তেজা(!)ক দেখি সকলোৰে হুলস্থূল লাগিল। খবৰটো ডিব্ৰুগড়ৰ পৰা আৰম্ভ কৰি সমগ্ৰ অসমতে বায়ুৰ দৰে বিয়পি পৰিল। ডিব্ৰুগড়ত গামোচাৰে ৰবি তেজা(!)ক উপচায় পেলোৱা হ’ল। জীৱনত কেতিয়াও নোপোৱা আতিথ্যৰে ৰবি তেজা(!)য়ো অভিভূত হৈ পৰিল। অসমীয়াৰ আবেগ, সন্মানৰ প্ৰতীক, অসমীয়াৰ পৰিচয় অজস্ৰ গামোচাৰে ভৰি পৰিল ৰবি তেজা(!)ৰ কান্ধ।
দক্ষিণ ভাৰতৰ জনপ্ৰিয় অভিনেতা তথা ছুপাৰষ্টাৰ ৰবি তেজা(!) অসমলৈ অহাৰ খবৰ বিয়পি পৰাৰ লগে লগে ডিব্ৰুগড়ত সৃষ্টি হ’ল একপ্ৰকাৰৰ উৎসৱমুখৰ পৰিৱেশ। বিমানবন্দৰৰ পৰা ডিব্ৰুগড় চহৰলৈ যিকোনো ঠাইতে তেওঁক দেখা পোৱা লোকসকলে ৰবি তেজা(!) বুলি ভাবি ওচৰ চাপি আহিল। কোনোবাই গামোচা পিন্ধালে, কোনোবাই চেল্ফি ল’লে, আন কোনোবাই আকৌ অভিনেতাজনৰ সৈতে কথা পাতিবলৈ চেষ্টা কৰিলে।
কেৱল সাধাৰণ লোকেই নহয়, ঘটনাটোক লৈ একাংশ সংবাদ মাধ্যম আৰু ছ’চিয়েল মিডিয়াতো যথেষ্ট চৰ্চা আৰম্ভ হ’ল। সকলোৱে ধৰি ল’লে যে দক্ষিণাত্যৰ জনপ্ৰিয় তাৰকা ৰবি তেজাই অসমত পদাৰ্পণ কৰিছে। ইফালে, ৰবি তেজা(!)য়ো বিশেষ একো নকৈ হাঁহি হাঁহি নমস্কাৰ কৰি ফটো উঠি থাকিল। মাজে মাজে ‘অসম বৰ ধুনীয়া’, ‘অসমলৈ আহি বৰ ভাল লাগিছে’ আদি দুটামান কথাও কোৱা বুলি জানিব পৰা যায়। ফলত উপস্থিত লোকসকলৰ সন্দেহৰ কোনো কাৰণেই নাথাকিল।
পিছে কিছুসময় পিছত ৰাজস্থানৰ শ্ৰাৱণ মাহেলা নামৰ এজন ব্যক্তিয়ে ফেচবুকত দিয়া এখন ফটোতহে ওলাল উৰহী গছৰ ওৰ। ডিব্ৰুগড়ত ব্যাপক ব্যস্ততাৰ সৃষ্টি কৰা সেইজন পিছে জনপ্ৰিয় অভিনেতা ৰবি তেজা নহয়। তেওঁ ৰাজস্থানৰ শ্ৰাৱণ মাহেলা নামৰ এজন ব্যক্তিহে। অৰ্থাৎ কেৱল চেহেৰাৰ কিছু মিল থকাৰ বাবেই এজন ব্যক্তিক ৰবি তেজা বুলি ধৰি লৈ ডিব্ৰুগড়ত সৃষ্টি হৈছিল এই হুলস্থূলীয়া পৰিৱেশ।
ঘটনাটোৱে এতিয়া ছ’চিয়েল মিডিয়াতো বিভিন্ন প্ৰতিক্ৰিয়াৰ সৃষ্টি কৰিছে। বহুতে এই ঘটনাক লৈ হাঁহি-ধেমালি কৰিলেও, আন একাংশই বিষয়টোৰ আন এটা গুৰুত্বপূৰ্ণ দিশৰ প্ৰতি আঙুলিয়াই দিছে—অসমীয়া গামোচাৰ মৰ্যাদা। অসমীয়াৰ বাবে গামোচা কেৱল এখন সাধাৰণ কাপোৰ নহয়। ই অসমীয়া সমাজ-সংস্কৃতি, সন্মান আৰু আদৰৰ এক অন্যতম প্ৰতীক। কোনো সন্মানীয় ব্যক্তি বা অতিথিক গামোচাৰে আদৰণি জনোৱাটো অসমৰ এক সুন্দৰ পৰম্পৰা। কিন্তু সেইবুলি যাকে-তাকে, য’তে-ত’তে আৰু কোনো ধৰণৰ পৰিচয় নিশ্চিত নকৰাকৈ গামোচা পিন্ধাই দিয়াটো কিমান যুক্তিসংগত, সেই প্ৰশ্নও এই ঘটনাই উত্থাপন কৰিছে।
বিশেষকৈ কোনো জনপ্ৰিয় ব্যক্তি অসমলৈ অহা বুলি খবৰ ওলালেই উত্তেজনাত সকলো কথা পৰীক্ষা নকৰাকৈ বিশ্বাস কৰাৰ পৰিৱৰ্তে প্ৰথমে তেওঁৰ পৰিচয় নিশ্চিত কৰাটো প্ৰয়োজন। সামাজিক মাধ্যমৰ যুগত এটা ভুল তথ্য অতি কম সময়তে হাজাৰ হাজাৰ লোকৰ মাজলৈ বিয়পি পৰে। এই ঘটনাটো তাৰেই এটা উদাহৰণ হিচাপে চৰ্চালৈ আহিছে।
বিমানবন্দৰৰ পৰা ডিব্ৰুগড় চহৰলৈকে যিসকলে তেওঁক ৰবি তেজা বুলি ভাবি গামোচা পিন্ধালে আৰু চেল্ফি ল’লে, তেওঁলোকৰ বাবে অৱশ্যেই ঘটনাটো এতিয়া কিছু অস্বস্তিকৰ হৈ পৰিছে। বিশেষকৈ সংবাদ মাধ্যম আৰু ছ’চিয়েল মিডিয়াত বিষয়টোৱে যথেষ্ট চৰ্চা লাভ কৰাৰ পিছত ভুলটো অধিক স্পষ্ট হৈ পৰিছে।
এই ঘটনাই অৱশ্যে এটা কথাও দেখুৱাই দিলে—অসমীয়া মানুহে অতিথিক কিমান মৰম আৰু উষ্মাৰে আদৰি লয়। কিন্তু সেই মৰম-আদৰ যেন তথ্য নিশ্চিত কৰাৰ আগতেই অতিৰিক্ত উৎসাহলৈ পৰিণত নহয়, সেই কথাও মনত ৰখা উচিত। ৰবি তেজা আহিছে বুলি শুনিয়েই সকলো ফালে যি উৎসাহ দেখা গ’ল, সেয়া হয়তো অসমীয়া মানুহৰ অতিথিপৰায়ণতাৰেই প্ৰতিফলন। কিন্তু আৱেগৰ লগতে অলপ সতৰ্কতাও প্ৰয়োজন।
কাৰণ, গামোচা এখন হয়তো সৰু যেন লাগে, কিন্তু অসমীয়া জাতিৰ বাবে ইয়াৰ মূল্য আৰু মৰ্যাদা বহুত ডাঙৰ। সেয়ে কেৱল কোনোবাই পৰিচিত অভিনেতাৰ দৰে দেখাইছে বুলিয়েই নহয়, স্থান-কাল-পাত্ৰ চাই, পৰিচয় নিশ্চিত কৰি তেহে সন্মানৰ গামোচাখন ডিঙিত পিন্ধোৱাটোৱেই অধিক শোভন।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
