বিহাৰৰ বৈশালী জিলাত সংঘটিত হৈছে এক শোকাৱহ নাও দুৰ্ঘটনা। ৰাঘোপুৰ থানা এলেকাৰ ৰামপুৰ শ্যামচান্দ গাঁৱৰ সমীপত নদীৰ মাজত এখন নাও বাগৰি পৰাৰ ফলত ১১ জন লোকৰ সলিল সমাধি ঘটে। দুৰ্ঘটনাৰ সময়ত নাওখনত শিশুসহ প্ৰায় ২০ জন যুৱক আছিল। তেওঁলোক এখন সৰু নাৱেৰে অন্য এখন গাঁৱলৈ ভোজ খাবলৈ গৈ থকা অৱস্থাতে এই অঘটন সংঘটিত হয়।
প্ৰাথমিক তথ্য অনুসৰি, নাওখনত ক্ষমতাতকৈ অধিক লোক উঠাৰ ফলত দুৰ্ঘটনাটো সংঘটিত হোৱা বুলি সন্দেহ কৰা হৈছে। নদীৰ প্ৰচণ্ড সোঁতত নাওখনে ভাৰসাম্য হেৰুৱাই উলটি পৰে। ইয়াৰ ফলত নাওখনত থকা লোকসকল গভীৰ পানীত পৰে। এই ঘটনাৰ পিছতে সমগ্ৰ অঞ্চলটোত হাহাকাৰ পৰিস্থিতিৰ সৃষ্টি হয়।
ৰামপুৰ শ্যামচান্দ গাঁৱৰ প্ৰায় ২০ জন যুৱক-যুৱতী আৰু শিশুৱে এখন সৰু নাৱেৰে কাষৰীয়া অঞ্চলত ভোজ খাবলৈ গৈ আছিল। কিন্তু নদীৰ মাজভাগত উপস্থিত হোৱাৰ পিছতে নাওখন প্ৰচণ্ড সোঁতৰ সন্মুখীন হয়। ফলত নাওখনৰ ভাৰসাম্য নোহোৱা হৈ পৰে আৰু কিছু সময়ৰ ভিতৰতে উলটি যায়। নাওখনত থকা লোকসকলে নিজকে বচাবলৈ চেষ্টা কৰে যদিও গভীৰ পানী আৰু নদীৰ প্ৰবল সোঁতৰ বাবে পৰিস্থিতি অধিক ভয়াৱহ হৈ পৰে।
দুৰ্ঘটনাৰ খবৰ লাভ কৰাৰ লগে লগে ৰাঘোপুৰ আৰক্ষী আৰু জিলা প্ৰশাসনৰ বিষয়াসকল ঘটনাস্থলীত উপস্থিত হয়। উদ্ধাৰ অভিযানত স্থানীয় লোক আৰু ডুবাৰুৱেও সহযোগ কৰে। বহু চেষ্টা কৰাৰ পিছত এতিয়ালৈকে শিশুসহ ১১ জনৰ মৃতদেহ উদ্ধাৰ কৰা হৈছে। ঘটনাটোৰ ভয়াৱহতা বিবেচনা কৰি প্ৰশাসনে SDRFৰ এটা দল নিয়োগ কৰে। আন কোনো লোক সন্ধানহীন হৈ আছে নেকি, সেই বিষয়ে জানিবলৈ উদ্ধাৰ অভিযান অব্যাহত আছে। উদ্ধাৰ হোৱা মৃ*তদেহসমূহ মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰা হৈছে। লগতে মৃ*ত লোকসকলৰ আনুষ্ঠানিক চিনাক্তকৰণৰ প্ৰক্ৰিয়াও চলি আছে।
এই শোকাৱহ দুৰ্ঘটনাৰ খবৰ বিয়পি পৰাৰ পিছতে ৰামপুৰ শ্যামচান্দ গাঁৱত শোকৰ পৰিৱেশে বিৰাজ কৰে। আপোনজনক হেৰুৱাই পৰিয়ালসমূহ শোকত ভাগি পৰিছে। গাঁওবাসীৰ মাজতো গভীৰ দুখ আৰু উদ্বেগৰ সৃষ্টি হৈছে। জিলা প্ৰশাসনে ঘটনাটোক লৈ গভীৰ শোক প্ৰকাশ কৰাৰ লগতে ক্ষতিগ্ৰস্ত পৰিয়ালসমূহলৈ সমবেদনা জ্ঞাপন কৰিছে। প্ৰশাসনৰ তৰফৰ পৰা চৰকাৰী সাহায্য আৰু দুৰ্যোগ সাহায্য পুঁজিৰ জৰিয়তে সম্ভৱপৰ সহায় আগবঢ়োৱাৰ আশ্বাস দিয়া হৈছে।
ইফালে, আৰক্ষীয়ে দুৰ্ঘটনাটোৰ কাৰণ অনুসন্ধান কৰিবলৈ তদন্ত আৰম্ভ কৰিছে। নাওখনত কিয় ক্ষমতাতকৈ অধিক লোক উঠিছিল আৰু দুৰ্ঘটনাটো সংঘটিত হোৱাৰ আঁৰত আন কোনো কাৰণ আছিল নেকি, সেই দিশসমূহো পৰীক্ষা কৰা হ’ব। এই ঘটনাই পুনৰ এবাৰ নাওযাত্ৰাৰ সময়ত সুৰক্ষাৰ নিয়ম মানি চলা আৰু নাওখনৰ নিৰ্ধাৰিত ক্ষমতাতকৈ অধিক যাত্ৰী কঢ়িয়াই নিয়াৰ বিপদৰ কথা সোঁৱৰাই দিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
