যিমানেই আলোচনা নকৰক কিয় চীনে কেতিয়াও শুধৰণি নকৰে। লাডাখক লৈ চীনে পুনৰ নিজৰ মন্তব্যৰে আন্তঃৰাষ্ট্ৰীয় পৰ্যায়ত বিতৰ্কৰ সৃষ্টি কৰিবলৈ বিচাৰিছে। শেহতীয়াভাৱে দেশখনে লাডাখৰ ২৮টাকৈ স্থান নিজৰ বুলি ভিত্তিহীন দাবী কৰিছে। এই ২৮টা কৌশলগত স্থান আৰু ভৌগোলিক অঞ্চলৰ নাম আনুষ্ঠানিকভাৱে নিৰ্ধাৰণ কৰাক লৈ ভাৰতৰ বিৰুদ্ধে আপত্তি প্ৰকাশ কৰিছে চীনে। এই অঞ্চলসমূহ নিজৰ বুলি পুনৰ দাবী কৰি ভাৰতৰ এই পদক্ষেপক অবৈধ আৰু অগ্ৰহণযোগ্য আখ্যা দিছে চীনা চৰকাৰে। ভাৰত-চীন সীমান্তক লৈ চলি থকা মতানৈক্যৰ মাজতে চীনৰ এই মন্তব্যই পুনৰ চৰ্চা লাভ কৰিছে।
চীনৰ বৈদেশিক মন্ত্ৰালয়ৰ মুখপাত্ৰ মাও নিঙে কয় যে চীনে ভাৰতৰ দ্বাৰা গঠন কৰা লাডাখ কেন্দ্ৰীয় শাসিত অঞ্চলক কেতিয়াও স্বীকৃতি দিয়া নাই। লাডাখৰ ২৮টা স্থান আৰু ভৌগোলিক অঞ্চলৰ নাম ভাৰতৰ গৃহ মন্ত্ৰালয়ে আনুষ্ঠানিকভাৱে নিৰ্ধাৰণ কৰাৰ সন্দৰ্ভত সাংবাদিকে সোধা প্ৰশ্নৰ উত্তৰত তেওঁ এই মন্তব্য কৰে। মাও নিঙে সাংবাদিকৰ আগত ভিত্তিহীনভাৱে ‘ভাৰতৰ এই পদক্ষেপ অবৈধ আৰু ইয়াৰ কোনো বৈধতা নাই’ বুলি মন্তব্য কৰে। তেওঁ লগতে দাবী কৰে যে ভাৰত-চীন সীমান্তৰ পশ্চিম অংশৰ সংশ্লিষ্ট অঞ্চলসমূহ সদায় চীনৰ অধীনত আছিল।
বিগত ২ অক্টোবৰত ভাৰতে লাডাখৰ ২৮টা স্থান আৰু ভৌগোলিক বৈশিষ্ট্য থকা অঞ্চলৰ নাম আনুষ্ঠানিকভাৱে নিৰ্ধাৰণ কৰিছিল। এই স্থানসমূহৰ ভিতৰত প্ৰকৃত নিয়ন্ত্ৰণ ৰেখা (LAC)ৰ ওচৰত থকা গোগ্ৰা আৰু হট স্প্ৰিংছৰ দৰে গুৰুত্বপূৰ্ণ অঞ্চলসমূহো আছে। ভাৰত চৰকাৰে লাডাখ প্ৰশাসনৰ সৈতে আলোচনা কৰি এই পদক্ষেপ গ্ৰহণ কৰিছে। ইয়াৰ মূল উদ্দেশ্য হৈছে অঞ্চলসমূহৰ সঠিক পৰিচয় নিশ্চিত কৰা, চৰকাৰী মানচিত্ৰত স্থানসমূহৰ নাম সুশৃংখলভাৱে অন্তৰ্ভুক্ত কৰা আৰু স্পৰ্শকাতৰ সীমান্ত অঞ্চলৰ বিষয়ে জনসাধাৰণক অধিক সচেতন কৰা। গোগ্ৰা আৰু হট স্প্ৰিংছ ভাৰত-চীন সীমান্তৰ অতি গুৰুত্বপূৰ্ণ স্থান। ২০২০ চনত দুয়োখন দেশৰ সেনাৰ মাজত উত্তেজনা বৃদ্ধি পোৱাৰ সময়ত এই অঞ্চলসমূহ সংঘাতৰ কেন্দ্ৰ হৈ পৰিছিল। প্ৰকৃত নিয়ন্ত্ৰণ ৰেখাৰ ওচৰত ভাৰতীয় সেনাৰ টহলদাৰীৰ বাবেও এই স্থানসমূহৰ বিশেষ গুৰুত্ব আছে।
পূব লাডাখত ভাৰত আৰু চীনৰ মাজত সীমান্তকেন্দ্ৰিক উত্তেজনা ২০২০ চনৰ ৫ মে’ত পাংগং হ্ৰদৰ ওচৰত দুয়োখন দেশৰ সেনাৰ মাজত হোৱা সংঘৰ্ষৰ পাছত অধিক বৃদ্ধি পাইছিল। ইয়াৰ পাছত সীমান্তত দুয়োখন দেশৰ সেনা মোতায়েন কৰা হৈছিল আৰু দীৰ্ঘদিন ধৰি অচলাৱস্থা অব্যাহত আছিল। ২০২২ চনত দুয়োখন দেশে কিছুমান সংঘাতপূৰ্ণ অঞ্চলৰ পৰা সেনা প্ৰত্যাহাৰৰ প্ৰক্ৰিয়া আৰম্ভ কৰিছিল। তথাপি সীমান্তক লৈ দুয়োখন দেশৰ মাজত মতানৈক্য সম্পূৰ্ণৰূপে দূৰ হোৱা নাই।
ভাৰত চৰকাৰে লাডাখৰ যিবোৰ স্থানৰ নাম আনুষ্ঠানিকভাৱে নিৰ্ধাৰণ কৰিছে, সেইবোৰৰ ভিতৰত আছে— আলিছাগিৰি পৰ্বতশৃংগ, ব্ৰাংছা, চাপচিংগল গিৰিপথ, কনিষ্ক শৃংগ, কৰুণ পীৰ পৰ্বত, কুকছেল, মাৰ্তণ্ড গিৰি, পাৰপিক হিমবাহ, স্কামৰি হিমবাহ, শ্চমিৰিক গিৰিপথ, শকোৰগা উপত্যকা, জোৰাৱৰ শৃংগ, দেহৰা কম্পাছ, দ্ৰক কাৰ্পো, জলমোৰি, কুমাৰায়ণ পইণ্ট, পাংগুলুং, ৰিনচেন জাংপো, চাক্যশ্ৰী গিৰি, গুৰু ৰিনপোছে, শ্যামল লুংপা, য়াংপা নদী, মাৰ্পা লোৎসাৱা ৰি, মিলাৰেপা কাংৰি, শিৱ ৰি আৰু মহেশ্বৰ ৰি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
