জুবিন গাৰ্গৰ ৰহস্যজনক মৃত্যুৰ গোচৰক কেন্দ্ৰ কৰি ৰাজ্যত অব্যাহত আছে চৰ্চা। এই গোচৰৰ অন্যতম অভিযুক্ত অমৃতপ্ৰভা মহন্তই জামিন লাভ কৰি কাৰাগাৰৰ বাহিৰলৈ ওলাই আহিলেও এতিয়াও তেওঁৰ আইনী জটিলতা শেষ হোৱা নাই। আদালতে বান্ধি দিয়া চৰ্ত অনুসৰি আজি তেওঁ আদালতত হাজিৰ হ’ব লাগিব। গোচৰৰ শুনানিৰ প্ৰতিটো দিনাই আদালতত উপস্থিত থকাৰ বাধ্যবাধকতা থকাৰ লগতে জামিনৰ চৰ্ত উলংঘা কৰিলে পুনৰ বিপদত পৰিব পাৰে অমৃতপ্ৰভা।
আজি আদালতত হাজিৰ অমৃতপ্ৰভা
প্ৰাপ্ত তথ্য অনুসৰি, জুবিন গাৰ্গৰ মৃত্যুৰ গোচৰত অমৃতপ্ৰভা মহন্তক শুনানিৰ দিনা আদালতত ব্যক্তিগতভাৱে উপস্থিত থাকিবলৈ নিৰ্দেশ দিয়া হৈছে। দৈনিক ফাষ্টট্ৰেক আদালতত গোচৰটোৰ শুনানি চলি থকাৰ সময়ত তেওঁ আদালতৰ নিৰ্দেশ মানি চলিব লাগিব। জামিন লাভ কৰাৰ অৰ্থ এইটো নহয় যে গোচৰৰ পৰা তেওঁ সম্পূৰ্ণৰূপে মুক্তি লাভ কৰিছে। বৰং বিচাৰ প্ৰক্ৰিয়া চলি থকাৰ সময়ত আদালতে বান্ধি দিয়া প্ৰতিটো চৰ্ত পালন কৰাটো তেওঁৰ বাবে বাধ্যতামূলক।
হাফলং উপ কাৰাগাৰৰ পৰা ওলাই অহাৰ পাছতো অমৃতপ্ৰভা মহন্তৰ বাবে আইনী প্ৰত্যাহ্বান অব্যাহত আছে। আদালতৰ চৰ্ত উলংঘা কৰিলে তেওঁৰ জামিন বাতিল হোৱাৰ আশংকা থাকিব পাৰে। বিশেষকৈ গোচৰৰ সৈতে জড়িত কোনো প্ৰমাণ নষ্ট কৰা, তদন্ত বা বিচাৰ প্ৰক্ৰিয়াত বাধাৰ সৃষ্টি কৰা অথবা আদালতৰ নিৰ্দেশ অমান্য কৰাৰ পৰা তেওঁ বিৰত থাকিব লাগিব। জামিনৰ চৰ্ত ভংগ কৰাৰ অভিযোগ উত্থাপিত হ’লে আদালতে বিষয়টো পৰীক্ষা কৰি প্ৰয়োজনীয় ব্যৱস্থা গ্ৰহণ কৰিব পাৰে।
আজি অধিবক্তাৰ লগত ফাষ্টট্ৰেক আদালতলৈ আহে জুবিন ঘটনাৰ অভিযুক্ত অমৃতপ্ৰভা। কটকটীয়া নিৰাপত্তা বেষ্টনী গঢ়ি তোলা হৈছে আদালতৰ চৌপাশ। পূৰ্বে কোনো দিনে নেদেখা নিৰাপত্তাৰ বেহু গঢ়ি তুলিছে ফাষ্টট্ৰেক আদালতত।
ইয়াৰ মাজতে অমৃতপ্ৰভা আৰু অধিবক্তাৰ আদালতত অহাৰ লগে লগে সাংবাদিকে আগুৰি ধৰি বিভিন্ন প্ৰশ্ন সুধিবলৈ চেষ্টা কৰে। অমৃতপ্ৰভা আৰু অধিবক্তাৰ বিৰুদ্ধেও সাংবাদিকক ধমকৰ অভিযোগ উত্থাপন হৈছে। ‘Don’t Do this, ৰাস্তা উলিয়াই দিয়ক…এইদৰে কৈ অমৃতপ্ৰভাক আদালতৰ ভিতৰলৈ লৈ গ’ল অধিবক্তাই।
আজি জুবিন গাৰ্গৰ মৃত্যুৰ গোচৰৰ শুনানিত অমৃতপ্ৰভা মহন্ত জুবিন গাৰ্গৰ ঘনিষ্ঠ বন্ধু ৰাজা বৰুৱা আৰু ৰাজেশ ভূঞাৰ সৈতে অমৃতপ্ৰভা মহন্তৰ আদালতত মুখামুখি হোৱাৰ বিষয়টোৱেও বিশেষ চৰ্চা লাভ কৰিছে। গোচৰৰ শুনানিত সংশ্লিষ্ট লোকসকলৰ উপস্থিতি আৰু আদালতৰ কাৰ্যবিধিৰ ওপৰত নিৰ্ভৰ কৰিব পৰৱৰ্তী পৰিস্থিতি।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
