বিহাৰৰ ছিৱান জিলাৰ জামো থানাৰ অন্তৰ্গত আলমাপুৰ গাঁৱত অৱস্থিত এটা ঘৰত ফটকা নিৰ্মাণ কৰি থকা অৱস্থাত সংঘটিত হয় এক ভয়ংকৰ বিস্ফোৰণ। এই দুৰ্ঘটনাত এতিয়ালৈকে পাঁচজন লোকৰ মৃ*ত্যু হোৱাৰ লগতে কেইবাজনো লোক আহত হৈছে। বিস্ফোৰণৰ ফলত ঘৰটোৰ এটা বৃহৎ অংশ বেয়াকৈ ক্ষতিগ্ৰস্ত হৈ ধ্বংসাৱশেষত পৰিণত হয়। ঘটনাৰ পিছতে সমগ্ৰ অঞ্চলটোত আতংকৰ সৃষ্টি হয়।
বিস্ফোৰণৰ ভয়ংকৰ দৃশ্যৰ বৰ্ণনা কৰি এজন প্ৰত্যক্ষদৰ্শীয়ে কয়, “ইয়াত কাৰোবাৰ হাত পৰি আছিল, আন ঠাইত কাৰোবাৰ ভৰি। ধ্বংসাৱশেষৰ মাজত মৃ*তদেহ পৰি আছিল। আমি জীৱনত কেতিয়াও এনে দৃশ্য দেখা নাই।” ঘটনাৰ খবৰ পোৱাৰ পিছতে আৰক্ষী আৰু প্ৰশাসনৰ দল ঘটনাস্থলীত উপস্থিত হৈ উদ্ধাৰ অভিযান আৰম্ভ কৰে। ছিৱানৰ জিলা দণ্ডাধীশ বিজয় প্ৰকাশ মীনা আৰু আৰক্ষী অধীক্ষক ভাৰত ছোনীয়েও ঘটনাস্থলীত উপস্থিত হৈ পৰিস্থিতিৰ বুজ লয়।
প্ৰাপ্ত তথ্য অনুসৰি, আলমাপুৰ গাঁৱৰ আমিৰুদ্দিনৰ ঘৰত ফটকা নিৰ্মাণৰ কাম চলি আছিল। সেই সময়তে হঠাৎ এক শক্তিশালী বিস্ফোৰণ সংঘটিত হয়। বিস্ফোৰণৰ শব্দ বহু দূৰলৈ শুনা যায় আৰু ঘৰটোৰ এটা বৃহৎ অংশ ভাঙি পৰে। বিস্ফোৰণৰ শব্দ শুনি ওচৰ-পাঁজৰৰ লোক ঘটনাস্থলীলৈ দৌৰি আহে। তাৰ পিছতে আৰক্ষী আৰু প্ৰশাসনৰ লোক উপস্থিত হৈ উদ্ধাৰ অভিযান আৰম্ভ কৰে। প্ৰত্যক্ষদৰ্শীৰ মতে, বিস্ফোৰণৰ পিছত ঘটনাস্থলীত অতি কৰুণ আৰু ভয়ংকৰ পৰিস্থিতিৰ সৃষ্টি হৈছিল। ঘৰৰ ধ্বংসাৱশেষৰ মাজত মৃ*তদেহ আৰু শৰীৰৰ বিভিন্ন অংগ সিঁচৰতি হৈ পৰি আছিল। বিস্ফোৰণৰ তীব্ৰতা ইমানেই বেছি আছিল যে ঘৰটোৰ যথেষ্ট ক্ষতিসাধন হয়।
প্ৰশাসনৰ তথ্য অনুসৰি, দুৰ্ঘটনাটোত প্ৰথমে তিনিজন লোকৰ মৃ*ত্যু হোৱা বুলি নিশ্চিত কৰা হৈছিল। পৰৱৰ্তী সময়ত মৃ*তকৰ সংখ্যা বৃদ্ধি পাই পাঁচজন হয়। ঘটনাৰ সময়ত ঘৰটোত কিমানজন লোক উপস্থিত আছিল আৰু কিমানজন আহত হৈছে, সেই সন্দৰ্ভত প্ৰশাসনে তথ্য সংগ্ৰহ কৰি আছে।
ইফালে, আৰক্ষী অধীক্ষক ভাৰত ছোনীয়ে কয় যে স্থানীয় বাসিন্দাৰ পৰা লাভ কৰা তথ্য অনুসৰি, বিস্ফোৰণৰ সময়ত ঘৰটোত সাতজন লোক উপস্থিত আছিল। অৱশ্যে, ঘটনাৰ সৈতে জড়িত সকলো তথ্য পৰীক্ষা কৰি থকা হৈছে। আহত লোকসকলৰ চিকিৎসাৰ ব্যৱস্থা কৰাৰ লগতে ঘটনাস্থলীত উদ্ধাৰ অভিযান চলোৱা হয়। এই দুৰ্ঘটনাই গাঁওখনৰ বহু পৰিয়াললৈ গভীৰ শোক কঢ়িয়াই আনিছে।
ঘটনাৰ পিছতে আৰক্ষী বিভাগে ব্যৱস্থা গ্ৰহণ কৰি জামো থানাৰ ভাৰপ্ৰাপ্ত বিষয়া ধীৰাজ কুমাৰ আৰু চৌকিদাৰ চন্দ্ৰিকা মাঝিক নিলম্বন কৰে।গোটেই ঘটনাটোৰ তদন্তৰ বাবে মহাৰাজগঞ্জৰ এছডিপিঅ’ অমনৰ নেতৃত্বত এটা তদন্তকাৰী দল গঠন কৰা হৈছে। আৰক্ষী অধীক্ষক আৰু জিলা দণ্ডাধীশে ঘটনাস্থলীত উপস্থিত হৈ পৰিস্থিতিৰ বুজ লোৱাৰ লগতে তদন্তৰ অগ্ৰগতিৰ বিষয়ে খবৰ লয়।
ঘৰটোত ফটকা নিৰ্মাণৰ বাবে প্ৰয়োজনীয় অনুমতি লোৱা হৈছিল নে নাই, সেই বিষয়েও আৰক্ষীয়ে তদন্ত অব্যাহত ৰাখিছে। ফটকা নিৰ্মাণৰ অনুজ্ঞাপত্ৰ আৰু অন্যান্য নথি-পত্ৰ পৰীক্ষা কৰাৰ পিছতহে এই সন্দৰ্ভত স্পষ্ট তথ্য পোহৰলৈ আহিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
