ৰাজীৱ গান্ধী কিয় প্ৰধানমন্ত্ৰী হোৱাটো বিচৰা নাছিল ছোনিয়া গান্ধীয়ে?

কংগ্ৰেছ নেত্ৰী ছোনিয়া গান্ধীয়ে তেওঁৰ স্বামী তথা ভাৰতৰ প্ৰাক্তন প্ৰধানমন্ত্ৰী ৰাজীৱ গান্ধীক লৈ এক গুৰুত্বপূৰ্ণ মন্তব্য কৰিছে। ৰাজীৱ গান্ধীক যেতিয়া প্ৰধানমন্ত্ৰী হ’বলৈ কোৱা হৈছিল, তেতিয়া তেওঁ এই সিদ্ধান্তৰ সম্পূৰ্ণ বিৰোধিতা কৰিছিল বুলি প্ৰকাশ কৰিছে ছোনিয়া গান্ধীয়ে। তেওঁৰ আগন্তুক গ্ৰন্থ ‘Belonging: A Journey of Love’ত জীৱনৰ বহু ব্যক্তিগত আৰু ৰাজনৈতিক অভিজ্ঞতাৰ কথা প্ৰকাশ পাব। ছোনিয়া গান্ধীয়ে ইংগিত দিছে যে গ্ৰন্থখন প্ৰকাশ পোৱাৰ পিছত ৰাজনৈতিক আৰু সামাজিক মহলত যথেষ্ট চৰ্চা হ’ব পাৰে। তেওঁৰ মতে, কিতাপখনত এনে বহু কথা উল্লেখ কৰা হৈছে, যিবোৰে মানুহৰ মাজত নতুন বিতৰ্কৰ সৃষ্টি কৰিব পাৰে। তেওঁ কয়, “ইমান দশক ধৰি আন মানুহে মোৰ কাহিনী কৈ আহিছে। এতিয়া মোৰ নিজৰ কথা কোৱাৰ পাল।”

মঙলবাৰে ছ’চিয়েল মিডিয়াত প্ৰকাশ কৰা এটা ভিডিঅ’ত ছোনিয়া গান্ধীয়ে এই কথা কয়। তেওঁ উল্লেখ কৰে যে ৰাজীৱ গান্ধীক প্ৰধানমন্ত্ৰী হ’বলৈ কোৱা সময়ত তেওঁ এই সিদ্ধান্তৰ সম্পূৰ্ণ বিৰোধী আছিল। অৱশ্যে, সেই সময়ৰ পৰিস্থিতি আৰু তেওঁৰ ব্যক্তিগত অনুভৱৰ বিষয়ে গ্ৰন্থখনত বিতংভাৱে উল্লেখ কৰা হৈছে।

ছোনিয়া গান্ধীৰ মতে, কিতাপখন পঢ়াৰ পিছত কিছুমান মানুহে তেওঁৰ বিষয়ে থকা ধাৰণা সলনি কৰিব পাৰে। আনহাতে, কিছুমানৰ মতামত তেওঁৰ প্ৰতি নেতিবাচকো হ’ব পাৰে। কিন্তু ৰাজহুৱা জীৱনত থকা ব্যক্তি এগৰাকীৰ বিষয়ে মানুহৰ বিভিন্ন মতামত থকাটো স্বাভাৱিক বুলিও তেওঁ উল্লেখ কৰে।

১০ নৱেম্বৰত প্ৰকাশ পাব গ্ৰন্থখন

ছোনিয়া গান্ধীৰ আগন্তুক গ্ৰন্থখন ১০ নৱেম্বৰত প্ৰকাশ পাব। এই গ্ৰন্থখনত তেওঁৰ জীৱনৰ ব্যক্তিগত আৰু ৰাজনৈতিক দুয়োটা দিশৰ কথা স্থান পাব বুলি জানিব পৰা গৈছে। ইটালীত কটোৱা শৈশৱৰ পৰা আৰম্ভ কৰি ভাৰতীয় ৰাজনীতিৰ কেন্দ্ৰবিন্দুত উপনীত হোৱালৈকে তেওঁৰ জীৱনৰ বিভিন্ন অভিজ্ঞতাৰ বিষয়ে গ্ৰন্থখনত উল্লেখ থাকিব। ৰাজীৱ গান্ধীৰ সৈতে তেওঁৰ সম্পৰ্ক, প্ৰেম আৰু পৰিয়ালৰ সৈতে জড়িত স্মৃতিৰ লগতে ৰাজনৈতিক জীৱনৰ বিভিন্ন ঘটনাৱলীয়েও গ্ৰন্থখনত স্থান পাব বুলি আশা কৰা হৈছে। ছোনিয়া গান্ধীৰ এই মন্তব্যই ইতিমধ্যে তেওঁৰ গ্ৰন্থখনক লৈ মানুহৰ মাজত কৌতূহল বৃদ্ধি কৰিছে। বিশেষকৈ ৰাজীৱ গান্ধীৰ প্ৰধানমন্ত্ৰী হোৱা সন্দৰ্ভত তেওঁৰ মনোভাৱ আৰু সেই সময়ৰ পৰিস্থিতিৰ বিষয়ে গ্ৰন্থখনত কি কি কথা প্ৰকাশ পায়, তাক লৈ চৰ্চা আৰম্ভ হৈছে।

শেহতীয়াকৈ ছ’চিয়েল মিডিয়া প্লেটফৰ্ম Xত আত্মপ্ৰকাশ কৰে ছোনিয়া গান্ধীয়ে। তাত তেওঁ নিজৰ আগন্তুক গ্ৰন্থখনৰ বিষয়ে এটা ভিডিঅ’ শ্বেয়াৰ কৰে। প্ৰায় দুমিনিট দৈৰ্ঘ্যৰ এই ভিডিঅ’টোত ৰাজীৱ গান্ধীৰ সৈতে তেওঁৰ প্ৰথম চিনাকি আৰু প্ৰেমৰ দিনবোৰৰ স্মৃতি ৰোমন্থন কৰা দেখা যায়।

ছোনিয়া গান্ধীয়ে জনোৱা অনুসৰি, কেম্ব্ৰিজত থকা সময়তে ৰাজীৱ গান্ধীৰ সৈতে তেওঁৰ প্ৰথম চিনাকি হৈছিল। তেওঁলোকৰ প্ৰথম সাক্ষাৎ হোৱা ৰেষ্টুৰেণ্টখনৰ ফটোও ভিডিঅ’টোত দেখুওৱা হৈছে। Xত দিয়া প্ৰথমটো পোষ্টত ছোনিয়া গান্ধীয়ে লিখিছিল, “মোৰ প্ৰেমৰ যাত্ৰা আৰম্ভ হৈছিল কেম্ব্ৰিজৰ এখন সৰু গ্ৰীক ৰেষ্টুৰেণ্টৰ পৰা। ৰাজীৱ আৰু মই প্ৰেম, হাঁহি আৰু স্মৃতিৰে ভৰা এখন পৃথিৱী গঢ়ি তুলিছিলোঁ। ১০ নৱেম্বৰত মই সেই পৃথিৱীখন আপোনালোকৰ সৈতে ভাগ-বতৰা কৰিম।”

ছোনিয়া গান্ধীৰ এই বক্তব্যই তেওঁৰ জীৱনৰ বহু ব্যক্তিগত অধ্যায় পঢ়ুৱৈৰ সন্মুখলৈ অহাৰ ইংগিত দিছে। এতিয়া সকলোৰে দৃষ্টি ১০ নৱেম্বৰত প্ৰকাশ পাবলগীয়া গ্ৰন্থখনৰ ওপৰত। গ্ৰন্থখনত ৰাজীৱ গান্ধীৰ সৈতে তেওঁৰ জীৱনৰ কোনবোৰ বিশেষ ঘটনা আৰু ৰাজনৈতিক জীৱনৰ কি কি অজানা কথা প্ৰকাশ পায়, সেয়া জানিবলৈ পাঠকসকলৰ মাজত যথেষ্ট আগ্ৰহ দেখা গৈছে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ