পুনৰ নীলা ড্ৰামৰ প্ৰসংগ, পিছে নীলা ড্ৰামত এইবাৰ ওলাল টকাৰ পাহাৰ

উত্তৰ প্ৰদেশৰ প্ৰয়াগৰাজ জিলাৰ নবাবগঞ্জ অঞ্চলৰ বৰাইপুৰ ৰামনগৰ গাঁৱত দুজন ভাতৃৰ বিপুল পৰিমাণৰ ধন-সম্পত্তিক লৈ সৃষ্টি হৈছে তীব্ৰ চাঞ্চল্য। ৰাজেশ যাদৱ ওৰফে বাবলু আৰু তেওঁৰ ভাতৃ ৰাকেশ যাদৱৰ ঘৰত আৰক্ষীয়ে অভিযান চলাই কোটি কোটি টকাৰ নগদ ধন উদ্ধাৰ কৰাৰ লগতে তেওঁলোকৰ নামত থকা বহু স্থাৱৰ সম্পত্তিৰ তথ্য লাভ কৰিছে। প্ৰাথমিক তথ্য অনুসৰি, দুয়ো ভাতৃৰ মুঠ সম্পত্তিৰ মূল্য ৮০ কোটি টকাৰো অধিক হ’ব পাৰে বুলি অনুমান কৰা হৈছে। কিন্তু প্ৰশ্ন হৈছে, পূৰ্বে পুনেৰ এগৰাকী সোণৰ ব্যৱসায়ীৰ অধীনত কাম কৰা এই দুই ভাতৃয়ে ইমান বৃহৎ পৰিমাণৰ ধন-সম্পত্তি কেনেকৈ আহৰণ কৰিলে? এই প্ৰশ্নৰ উত্তৰ বিচাৰি আৰক্ষী আৰু আয়কৰ বিভাগে তদন্ত অব্যাহত ৰাখিছে। অৱশ্যে, উদ্ধাৰ হোৱা ধনৰ প্ৰকৃত পৰিমাণ আৰু সম্পত্তিৰ মুঠ মূল্য সম্পৰ্কে এতিয়াও চূড়ান্ত তথ্য প্ৰকাশ পোৱা নাই।

বাৰাণ্ডাৰ তলত পুতি থৈছিল কোটি কোটি টকা

ঘটনাটো পোহৰলৈ আহে ২৮ আৰু ২৯ অক্টোবৰৰ মাজনিশা। আৰক্ষীয়ে এখন এজাহাৰৰ ভিত্তিত তদন্ত কৰিবলৈ ৰাজেশ আৰু ৰাকেশ যাদৱৰ ঘৰত উপস্থিত হয়। তালাচী চলোৱাৰ সময়ত আৰক্ষীয়ে তেওঁলোকৰ ঘৰৰ বাৰাণ্ডাৰ তলত মাটিত পুতি থোৱা তিনিটা নীলা ৰঙৰ ড্ৰাম উদ্ধাৰ কৰে। ড্ৰামকেইটাৰ ভিতৰত ৫০০ টকীয়া নোটৰ বাণ্ডিল ভৰাই ৰখা হৈছিল। নোটৰ বাণ্ডিলবোৰ পলিথিন আৰু কাপোৰেৰে মেৰিয়াই থোৱা আছিল।

এইদৰে মাটিৰ তলত লুকুৱাই ৰখা বিপুল পৰিমাণৰ নগদ ধন উদ্ধাৰ হোৱাৰ পিছতে ঘটনাটোৱে বিশেষ চৰ্চা লাভ কৰে। পিছত তদন্তত আয়কৰ বিভাগেও যোগদান কৰে। প্ৰাৰম্ভিক অনুমান অনুসৰি, উদ্ধাৰ হোৱা নগদ ধনৰ পৰিমাণ প্ৰায় ৫ কোটি টকা হ’ব পাৰে। অৱশ্যে, স্থানীয় একাংশ লোকৰ মতে, ধনৰ পৰিমাণ ইয়াতকৈ বহু বেছি হ’ব পাৰে। উদ্ধাৰ হোৱা নগদ ধনৰ সঠিক পৰিমাণ নিৰ্ধাৰণৰ কাম চলি আছে।

৪৮ঠাইত ক্ৰয় কৰিছিল ভূমি

নগদ ধন উদ্ধাৰৰ পিছত দুই ভাতৃৰ সম্পত্তিৰ বিষয়ে অধিক তথ্য সংগ্ৰহ কৰিবলৈ আৰম্ভ কৰে আৰক্ষী আৰু আয়কৰ বিভাগে। তদন্তত তেওঁলোকৰ নামত থকা বহু মাটি আৰু অন্যান্য স্থাৱৰ সম্পত্তিৰ তথ্য পোহৰলৈ আহে। সূত্ৰৰ তথ্য অনুসৰি, ৰাজেশ যাদৱে বিগত তিনিটা বছৰত, বিশেষকৈ ২০২৪ চনৰ পিছত, নিজৰ লগতে পৰিয়ালৰ বিভিন্ন সদস্যৰ নামত ৪৮টা মাটিৰ টুকুৰা পঞ্জীয়ন কৰিছিল।

তেওঁলোকৰ মুঠ প্ৰায় ২২ বিঘা মাটি থকাৰ কথাও জানিব পৰা গৈছে। এই মাটি আৰু অন্যান্য স্থাৱৰ সম্পত্তিৰ মূল্য প্ৰায় ২০ কোটি টকা হ’ব পাৰে বুলি অনুমান কৰা হৈছে। কিন্তু তেওঁলোকে এই বিপুল পৰিমাণৰ সম্পত্তি ক্ৰয় কৰিবলৈ প্ৰয়োজনীয় ধন ক’ৰ পৰা লাভ কৰিছিল, সেই বিষয়ে এতিয়াও স্পষ্ট তথ্য পোৱা হোৱা নাই। সেয়েহে সম্পত্তিৰ উৎস আৰু আয়ৰ সৈতে ইয়াৰ সামঞ্জস্য আছে নে নাই, সেই দিশতো তদন্ত চলি আছে।

কোটি টকাৰ মাটিত নিৰ্মাণ কৰিছে বজাৰ

কেৱল মাটি ক্ৰয় কৰাই নহয়, ৰাজেশ যাদৱে ব্যৱসায়িক সম্পত্তি গঢ়ি তোলাৰ কামো আৰম্ভ কৰিছিল বুলি জানিব পৰা গৈছে। তথ্য অনুসৰি, তেওঁ প্ৰায় ১.৫ কোটি টকা ব্যয় কৰি ক্ৰয় কৰা মাটিত ১৫খন দোকান থকা এটা দুমহলীয়া বজাৰ নিৰ্মাণ কৰি আছে। ইয়াৰ উপৰি দাদনপুৰ, মুবাৰকপুৰ, মেন্দৰা আৰু শান্তিপুৰমকে ধৰি বিভিন্ন অঞ্চলত তেওঁৰ মাটি থকা বুলি সূত্ৰই প্ৰকাশ কৰিছে। শেহতীয়াকৈ তেওঁলোকে কেইবাখনো বাহন ক্ৰয় কৰাৰ লগতে ডিজে বেণ্ডৰ ব্যৱসায়তো ধন বিনিয়োগ কৰিছিল বুলি জানিব পৰা গৈছে। দুয়ো ভাতৃৰ সম্পত্তিৰ পৰিসৰ দেখি তদন্তকাৰী বিষয়াসকলেও তেওঁলোকৰ উপাৰ্জনৰ উৎসৰ বিষয়ে অনুসন্ধান আৰম্ভ কৰিছে।

ৰাজেশ আৰু ৰাকেশ যাদৱৰ অতীতৰ বিষয়ে লাভ কৰা তথ্য অনুসৰি, দুয়ো ভাতৃয়ে পূৰ্বে মহাৰাষ্ট্ৰৰ পুনেত সোণৰ ব্যৱসায়ৰ সৈতে জড়িত এগৰাকী ব্যৱসায়ীৰ অধীনত কাম কৰিছিল। ক’ভিড-১৯ মহামাৰীৰ সময়ত তেওঁলোকে পুনে এৰি নিজৰ গাঁৱলৈ উভতি আহে। ইয়াৰ পিছতে তেওঁলোকৰ জীৱন-যাপন আৰু সম্পত্তিৰ পৰিমাণত উল্লেখযোগ্য পৰিৱৰ্তন হোৱা বুলি স্থানীয় সূত্ৰই দাবী কৰিছে। গাঁৱলৈ উভতি অহাৰ পিছত তেওঁলোকে মাটি ক্ৰয় কৰাৰ লগতে এটা বিলাসী ঘৰ নিৰ্মাণ কৰে। ইয়াৰ উপৰি দুখন ট্ৰেক্টৰ, এখন পিকআপ ট্ৰাক আৰু এখন বলেৰো বাহন ক্ৰয় কৰে বুলি জানিব পৰা গৈছে। কেৱল সেয়াই নহয়, তেওঁলোকে ডিজে আৰু চিমেণ্টৰ ব্যৱসায়ো আৰম্ভ কৰিছিল বুলি সূত্ৰৰ পৰা জানিব পৰা গৈছে।

কেনেকৈ পোহৰলৈ আহিল সম্পত্তিৰ ৰহস্য?

দুই ভাতৃৰ বিপুল সম্পত্তিৰ তথ্য আৰক্ষীৰ ওচৰলৈ কেনেকৈ আহিল, সেই বিষয়েও দুটা পৃথক কথা চৰ্চালৈ আহিছে। এটা সূত্ৰৰ মতে, কিছুদিন পূৰ্বে ৰাজেশ আৰু ৰাকেশৰ সৈতে তেওঁলোকৰ এজন চুবুৰীয়াৰ কাজিয়া হৈছিল। সেই বিবাদৰ পিছতে চুবুৰীয়াজনে আৰক্ষীক দুই ভাতৃৰ হাতত বিপুল পৰিমাণৰ ধন-সম্পত্তি থকা বুলি অৱগত কৰে। আন এটা সূত্ৰৰ মতে, ৰাজেশ যাদৱে মহিন্দ্ৰা থাৰ গাড়ী ক্ৰয় কৰিবলৈ বিচাৰিছিল। কিন্তু কনিষ্ঠ ভাতৃ ৰাকেশ যাদৱে এই সিদ্ধান্তৰ বিৰোধিতা কৰে। ফলত দুয়োৰে মাজত তীব্ৰ বিবাদৰ সৃষ্টি হয়।

এই বিবাদৰ পিছতে ৰাকেশে আৰক্ষীক তেওঁলোকৰ ধন-সম্পত্তিৰ বিষয়ে তথ্য দিয়া বুলি চৰ্চা হৈছে। অৱশ্যে, ঘটনাটোৰ প্ৰকৃত কাৰণ আৰু আৰক্ষীৰ ওচৰলৈ তথ্য কেনেকৈ আহিল, সেই বিষয়ে আনুষ্ঠানিকভাৱে নিশ্চিত তথ্য লাভ কৰা হোৱা নাই। আৰক্ষীয়ে অভিযান চলোৱাৰ পূৰ্বে গাঁৱৰ বিদ্যুৎ সংযোগ বন্ধ কৰিছিল বুলিও কিছুমান সূত্ৰই দাবী কৰিছে। তাৰ পিছতে ঘৰত তালাচী চলাই মাটিৰ তলত লুকুৱাই ৰখা নগদ ধন উদ্ধাৰ কৰা হয়।

এই ঘটনাৰ আটাইতকৈ গুৰুত্বপূৰ্ণ প্ৰশ্নটো হৈছে, ৰাজেশ আৰু ৰাকেশ যাদৱে পুনেৰ পৰা নিজৰ গাঁৱলৈ উভতি অহাৰ সময়ত বিপুল পৰিমাণৰ নগদ ধন কেনেকৈ লগত আনিছিল? একাংশ সূত্ৰৰ দাবী অনুসৰি, ক’ভিড-১৯ মহামাৰীৰ পূৰ্বে দুই ভাতৃয়ে প্ৰায় ১৯ বছৰ ধৰি পুনেত কাম কৰিছিল। তেওঁলোকে কাম কৰা সোণৰ ব্যৱসায়ীজনৰ প্ৰতিষ্ঠানত কোনো এটা সময়ত অভিযান চলোৱা হৈছিল বুলি জানিব পৰা গৈছে। দাবী অনুসৰি, সেই সময়ত ব্যৱসায়ীজনে নোটৰ বাণ্ডিল বস্তাত ভৰাই দুই ভাতৃৰ কোঠাত লুকুৱাই ৰাখিছিল। পৰৱৰ্তী সময়ত সোণৰ ব্যৱসায়ীজনক আৰক্ষীয়ে গ্ৰেপ্তাৰ কৰিছিল বুলিও সূত্ৰই প্ৰকাশ কৰিছে। ইফালে, ৰাজেশ আৰু ৰাকেশে বিপুল পৰিমাণৰ নগদ ধন লৈ নিজৰ গাঁৱলৈ উভতি অহা বুলি অভিযোগ উত্থাপন হৈছে।

কিন্তু এই দাবীসমূহৰ সত্যতা এতিয়াও আনুষ্ঠানিকভাৱে নিশ্চিত হোৱা নাই। ধনখিনি কাৰ আছিল, ইয়াৰ উৎস কি আৰু পুনেৰ পৰা প্ৰয়াগৰাজলৈ কেনেকৈ অনা হৈছিল, সেই সকলোবোৰ দিশ তদন্তৰ পিছতহে স্পষ্ট হ’ব।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ