হোটেল বিলাস ইন কাণ্ডই ৰাজ্যজুৰি সৃষ্টি কৰা চাঞ্চল্যৰ মাজতে অৱশেষত মুখ খুলিলে ঘনকান্ত গগৈৰ পত্নী জোনমণি গগৈয়ে। পল্টন বজাৰ আৰক্ষী থানাত আৰক্ষীৰ সোধা-পোছাৰ সন্মুখীন হোৱাৰ পিছতে সাংবাদিকৰ আগত প্ৰথমবাৰৰ বাবে প্ৰতিক্ৰিয়া প্ৰকাশ কৰে জোনমণি গগৈয়ে। এই ঘটনাক লৈ তেওঁ কেইবাটাও বিস্ফোৰক দাবী উত্থাপন কৰাৰ লগতে স্বামী ঘনকান্ত গগৈৰ পক্ষত বিভিন্ন যুক্তি দাঙি ধৰে।
আৰক্ষীৰ জেৰাৰ অন্তত পল্টন বজাৰ আৰক্ষী থানাৰ পৰা ওলাই অহাৰ সময়ত জোনমণি গগৈয়ে কয় যে ঘটনাৰ সৈতে জড়িত সকলো নথি-পত্ৰ তেওঁ আৰক্ষীক জমা দিছে। আনহাতে, তেওঁৰ মোবাইল ফোনটোও আৰক্ষীয়ে জব্দ কৰিছে বুলি জানিবলৈ দিয়ে।
হেলেনা ভৰালীৰ পৰিয়ালেই ফোন কৰি মাতিছিল ঘনকান্তক!
হোটেল বিলাস ইন কাণ্ড সন্দৰ্ভত জোনমণি গগৈয়ে কৰা আটাইতকৈ গুৰুত্বপূৰ্ণ দাবীটো হৈছে, হেলেনা ভৰালীৰ পৰিয়ালৰ ফালৰ পৰাই ঘনকান্ত গগৈক ফোন কৰি মাতি পঠিওৱা হৈছিল। তেওঁৰ ভাষ্য অনুসৰি, ঘনকান্তই ফোনযোগেই বিষয়টোৰ আলোচনা কৰি সমাধান কৰিব বিচাৰিছিল। কিন্তু হেলেনা ভৰালীৰ পৰিয়ালে ফোনত কথা পাতিবলৈ অমান্তি প্ৰকাশ কৰি মুখামুখিকৈ আলোচনা কৰাৰ ইচ্ছা প্ৰকাশ কৰিছিল।
জোনমণিৰ দাবী, ঘনকান্তই বাৰে বাৰে ফোনতে সকলো কথা পাতি ল’বলৈ কৈছিল। কিন্তু পৰিয়ালটোৰ তৰফৰ পৰা তেওঁক হোটেল বিলাস ইনলৈ আহিবলৈ কোৱা হৈছিল। আনকি জোৰ-জবৰদস্তি কৰিয়েই তেওঁক তালৈ মাতি পঠিওৱা হৈছিল বুলিও অভিযোগ কৰে জোনমণি গগৈয়ে।
ঘনকান্তক আক্ৰমণ কৰিছিল হেলেনা ভৰালীৰ পৰিয়ালে!
সাংবাদিকৰ আগত জোনমণি গগৈয়ে আন এক গুৰুতৰ অভিযোগ উত্থাপন কৰি কয় যে হেলেনা ভৰালীৰ পৰিয়ালৰ লোকসকলে ঘনকান্ত গগৈক আক্ৰমণ কৰিছিল। কথা পাতিবলৈ মাতি নি তেওঁক প্ৰহাৰ কৰা হৈছিল বুলি দাবী কৰে জোনমণিয়ে।
তেওঁৰ মতে, ঘনকান্তৰ শৰীৰত আক্ৰমণৰ চিন স্পষ্ট হৈ আছিল। আনকি মুখমণ্ডলতো আঘাতৰ দাগ আৰু আঁচোৰৰ চিন এতিয়াও দেখা যায় বুলি উল্লেখ কৰে জোনমণি গগৈয়ে। গুলীচালনা কৰিবলৈ যোৱা নাছিল ঘনকান্ত, হোটেল ঘূৰাই দিব বিচাৰিছিল!
জোনমণিয়ে জানিবলৈ দিয়া মতে, ঘনকান্ত গগৈৰ ব্যৱসায় ভালদৰে চলি থকা নাছিল। লোকচানৰ সন্মুখীন হোৱাৰ বাবেই তেওঁ কিছু ধন পৰিশোধ কৰিব পৰা নাছিল। ব্যৱসায়িক পৰিস্থিতি বেয়া হৈ পৰাৰ ফলত আৰ্থিক সমস্যাৰো সৃষ্টি হৈছিল বুলি দাবী কৰে তেওঁ।
নিউজ চেনেল খোলাৰ পৰিকল্পনা কৰিছিল ঘনকান্তই!
ইফালে, ঘনকান্ত গগৈৰ ব্যক্তিগত জীৱন আৰু পৰিকল্পনা সন্দৰ্ভতো কিছু কথা প্ৰকাশ কৰে জোনমণি গগৈয়ে। তেওঁৰ মতে, ঘনকান্তই এটা নিউজ চেনেল খোলাৰ পৰিকল্পনা কৰিছিল। আনহাতে, কেমেৰা সংযুক্ত চশমাযোৰ তেওঁ কোনো বিশেষ উদ্দেশ্যত নহয়, সাধাৰণভাৱেই ব্যৱহাৰ কৰিছিল বুলি দাবী কৰে জোনমণিয়ে।
বৰাৰ চাৰ্ভিছ কাণ্ডৰ পিছতেই প্ৰথমে ফোন কৰিছিল!
জোনমণি গগৈয়ে লগতে কয় যে বৰাৰ চাৰ্ভিছ কাণ্ডৰ পিছতেই ঘনকান্তই প্ৰথমে তেওঁলৈ ফোন কৰিছিল। এই সন্দৰ্ভত আৰু অধিক তথ্য আৰক্ষীক অৱগত কৰা হৈছে বুলিও ইংগিত দিয়ে।
উল্লেখ্য যে হোটেল বিলাস ইন কাণ্ডক কেন্দ্ৰ কৰি ইতিমধ্যে বিভিন্ন অভিযোগ-প্ৰতিঅভিযোগৰ সৃষ্টি হৈছে। ঘনকান্ত গগৈৰ পত্নী জোনমণি গগৈয়ে আৰক্ষীৰ সন্মুখত দিয়া ভাষ্য আৰু সাংবাদিকৰ সন্মুখত দিয়া ভাষ্যই তদন্তত কিমান সহায় কৰে সেয়া সময়ত লক্ষণীয় হ’ব ।
(এই তথ্য যুগুতাইছে বৰষা মিশ্ৰই)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
