আফ্ৰিকাত ইবোলাৰ সংহাৰ, এই পৰ্যন্ত ৫,৩০০ৰো অধিকৰ মৃত্যু

আফ্ৰিকাৰ কেইবাখনো দেশত ইব’লা ভাইৰাছে বিগত প্ৰায় ৫/৬ মাহৰ পৰাই সংহাৰ সৃষ্টি কৰি আহিছে। কিন্তু শেহতীয়াকৈ ইবোলাৰ এটা নতুন ভিন্নতা বা প্ৰজাতিয়ে আফ্ৰিকাত ভয়ংকৰ ৰূপ ধাৰণ কৰিছে। ২০২৬ চনৰ মে’ৰ পৰা কংগো গণতান্ত্ৰিক ৰিপাব্লিকত আৰম্ভ হোৱা এই সংক্ৰমণ অক্টোবৰলৈ কেনিয়া, নাইজেৰিয়া আৰু উগাণ্ডালৈও বিয়পি পৰাৰ তথ্য পোৱা গৈছে। এই পৰিস্থিতিৰ প্ৰতি লক্ষ্য ৰাখি বিশ্ব স্বাস্থ্য সংস্থাই ইব’লাৰ নতুন ভেকচিনৰ ক্লিনিকেল ট্ৰায়েলৰ অনুমোদন জনাইছে। বৰ্তমানৰ এই সংক্ৰমণৰ কাৰণ হৈছে বুণ্ডিবুগ্য’ ভাইৰাছ। এই বিশেষ ভিন্নতাৰ বিৰুদ্ধে এতিয়ালৈকে কোনো অনুমোদিত ভেকচিন উপলব্ধ হোৱা নাই। সেয়েহে নতুন ভেকচিন দুটাৰ পৰীক্ষাক লৈ স্বাস্থ্য বিশেষজ্ঞসকলৰ মাজত যথেষ্ট আশা সৃষ্টি হৈছে।

ইব’লা কি আৰু কিয় ইমান বিপজ্জনক?

ইব’লা হৈছে এবিধ অতি গুৰুতৰ আৰু সংক্ৰামক ৰোগ। এই ৰোগ আক্ৰান্ত ব্যক্তিৰ তেজ, বমি, মল বা শৰীৰৰ অন্যান্য তৰল পদাৰ্থৰ প্ৰত্যক্ষ সংস্পৰ্শৰ জৰিয়তে বিয়পে। ইব’লাত মৃত্যু হোৱা ব্যক্তিৰ মৃতদেহৰ সংস্পৰ্শলৈ আহিলেও সংক্ৰমণ ঘটিব পাৰে। প্ৰদত্ত তথ্য অনুসৰি, আফ্ৰিকাৰ এই প্ৰাদুৰ্ভাৱত ৫,৩০০ৰো অধিক লোকৰ মৃত্যু হৈছে।

ইব’লাৰ নতুন ভেকচিন কোনে প্ৰস্তুত কৰিছে?

অক্সফৰ্ড বিশ্ববিদ্যালয়, ভাৰতীয় ছিৰাম ইনষ্টিটিউট আৰু মডাৰ্নাৰ সহযোগত দুটা নতুন ভেকচিন প্ৰাৰ্থী প্ৰস্তুত কৰা হৈছে। কংগো গণতান্ত্ৰিক ৰিপাব্লিকৰ নেশ্যনেল ইনষ্টিটিউট ফৰ বায়’মেডিকেল ৰিচাৰ্চৰ নেতৃত্বত এই ভেকচিন দুটাৰ ক্লিনিকেল ট্ৰায়েল অনুষ্ঠিত হ’ব। বিশ্ব স্বাস্থ্য সংস্থাকে ধৰি কেইবাটাও আন্তঃৰাষ্ট্ৰীয় সংস্থাই এই পৰীক্ষাত সহযোগিতা আগবঢ়াব। পৰীক্ষা সফল হ’লে ভৱিষ্যতে বুণ্ডিবুগ্য’ ভাইৰাছৰ সংক্ৰমণ নিয়ন্ত্ৰণৰ ক্ষেত্ৰত এক ডাঙৰ অগ্ৰগতি লাভ কৰিব পৰা যাব।

ভাৰতৰ বাবে কিমান চিন্তাৰ বিষয়?

আফ্ৰিকাত ইব’লাৰ সংক্ৰমণ বৃদ্ধি পোৱাৰ পিছত ভাৰতৰ বাবেও সতৰ্কতা অৱলম্বন কৰাটো প্ৰয়োজনীয় হৈ পৰিছে। আফ্ৰিকাৰ পৰা অহা সংক্ৰমিত যাত্ৰীৰ জৰিয়তে ভাইৰাছ ভাৰতলৈ প্ৰৱেশ কৰাৰ সম্ভাৱনা সম্পূৰ্ণৰূপে নুই কৰিব নোৱাৰি। বিশ্ব স্বাস্থ্য সংস্থাৰ ২০২৬ চনৰ ২৩ অক্টোবৰৰ প্ৰতিবেদন অনুসৰি, ডি আৰ কংগোত সংক্ৰমণৰ আশংকা অতি বেছি। দেশখনৰ কাষৰীয়া অঞ্চলসমূহতো আশংকা অধিক। কিন্তু আফ্ৰিকাৰ অন্যান্য দেশ আৰু ভাৰতৰ দৰে বিশ্বৰ আন প্ৰান্তত সংক্ৰমণৰ আশংকা তুলনামূলকভাৱে কম। ভাৰত চৰকাৰেও এই সংক্ৰমণৰ প্ৰতি সতৰ্কতা বৃদ্ধি কৰিছে। ২০২৬ চনৰ ২৫ মে’ত কেন্দ্ৰীয় স্বাস্থ্যমন্ত্ৰী জে পি নাড্ডাই ইব’লাৰ প্ৰতি ভাৰতৰ প্ৰস্তুতিৰ পৰ্যালোচনা কৰিছিল। আন্তঃৰাষ্ট্ৰীয় বিমানবন্দৰ আৰু দেশৰ অন্যান্য প্ৰৱেশ পথত যাত্ৰীৰ স্বাস্থ্য পৰীক্ষা আৰু নিৰীক্ষণ বৃদ্ধি কৰা হৈছে।

ক’ভিডৰ দৰে ভয়ংকৰ নেকি ইব’লা?

ইব’লা সাধাৰণতে ক’ভিড-১৯ৰ দৰে বায়ুত ভাঁহি থকা ক্ষুদ্ৰ কণাৰ জৰিয়তে সহজে বিয়পি নাযায়। এই ভাইৰাছ মূলতঃ আক্ৰান্ত ব্যক্তিৰ তেজ, বমি, মল বা শৰীৰৰ অন্যান্য তৰল পদাৰ্থৰ প্ৰত্যক্ষ সংস্পৰ্শৰ জৰিয়তে সংক্ৰমিত হয়। সেয়েহে পৰিষ্কাৰ-পৰিচ্ছন্নতা বজাই ৰখা, আক্ৰান্ত ব্যক্তিৰ সংস্পৰ্শ এৰাই চলা আৰু প্ৰয়োজনীয় সুৰক্ষামূলক ব্যৱস্থা গ্ৰহণ কৰাটো অত্যন্ত গুৰুত্বপূৰ্ণ।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ