পশ্চিমবংগৰ বাঘ স্থানান্তৰকৰণ কাৰ্যসূচীত পুনৰ এক জটিল পৰিস্থিতিৰ সৃষ্টি হোৱা দেখা গৈছে। অসমৰ পৰা বিগত সপ্তাহত ঘূৰাই নিয়া তিনিবছৰীয়া বাঘিনী ‘ডুৱাৰ্ছ ৰাণী’ পুনৰ অসমলৈ যাত্ৰা কৰাৰ তথ্য লাভ কৰিছে বন বিভাগে। পশ্চিমবংগৰ বক্সা ব্যাঘ্ৰ সংৰক্ষিত বনাঞ্চলৰ বিশেষ নিৰাপত্তাযুক্ত আৱদ্ধ স্থান অতি কৌশলেৰে দ্বিতীয়বাৰৰ বাবে এৰিছে বাঘিনীজনীয়ে।
বন বিভাগৰ বিষয়াসকলে সদৰী কৰা অনুসৰি, ৯ নৱেম্বৰৰ দুপৰীয়া বাঘিনীজনীয়ে ২.২ হেক্টৰ ভূমিৰ কংক্ৰিটৰ দেৱালেৰে আৱদ্ধ স্থানৰ পৰা কৌশলেৰে ওলাই আহে। আশ্চৰ্যজনকভাৱে, বাঘিনীজনীয়ে নিৰাপত্তাৰ বাবে নিৰ্মিত কংক্ৰিটৰ বেৰাৰ তলেৰে সুৰংগ খান্দি বাহিৰলৈ ওলাই যায়। বেৰাখনৰ কংক্ৰিটৰ ভেটিটো প্ৰায় ২ ফুট ডাঠ আৰু ৪ ফুট গভীৰ আছিল। কিন্তু এই শক্তিশালী ভেটিৰ তলতো সুৰংগ খান্দি পলায়ন কৰিবলৈ সক্ষম হয় বাঘিনীজনী। দুপৰীয়া প্ৰায় ২ বজাত বন বিভাগৰ কৰ্মচাৰীয়ে বাঘিনীজনী আৱদ্ধ স্থানত নথকাৰ কথা জানিব পাৰে।
বাঘিনীজনীৰ গাত লগোৱা ৰেডিঅ’ কলাৰটো এতিয়াও সক্ৰিয় হৈ আছে। ইয়াৰ সংকেতৰ সহায়ত বন বিভাগে বাঘিনীজনীৰ গতিবিধি অনুসৰণ কৰি আছে। সূত্ৰ অনুসৰি, বাঘিনীজনীয়ে বালা নদী পাৰ হৈ পুনৰ অসম অভিমুখে যাত্ৰা কৰিছে। বক্সা ব্যাঘ্ৰ সংৰক্ষিত বনাঞ্চলৰ ২৭ মাইল বনগাঁও অঞ্চলৰ ওচৰত বাঘিনীজনীৰ শেষ অৱস্থান ধৰা পৰিছে। বাঘিনীজনীক বিচাৰি উলিয়াবলৈ প্ৰায় ৬০জন বনকৰ্মী, তিনিটা হাতী আৰু বন বিভাগৰ জ্যেষ্ঠ বিষয়াক নিয়োগ কৰা হৈছে। অৱশ্যে বনাঞ্চলৰ কিছুমান অঞ্চলত ৰেডিঅ’ সংকেত দুৰ্বল হোৱাৰ বাবে বাঘিনীজনীৰ সন্ধান উলিওৱাত অসুবিধাৰ সৃষ্টি হৈছে।
বাৰে বাৰে অসমলৈ যাত্ৰা ‘দুৱাৰ্ছ ৰাণী’ৰ
বিহাৰৰ বাল্মীকি ব্যাঘ্ৰ সংৰক্ষিত বনাঞ্চলৰ পৰা পশ্চিমবংগৰ প্ৰথমটো বাঘ স্থানান্তৰকৰণ কাৰ্যসূচীৰ অধীনত ‘দুৱাৰ্ছ ৰাণী’ক বক্সালৈ অনা হৈছিল। কিন্তু বক্সালৈ অনাৰ পিছৰে পৰা বাঘিনীজনীয়ে বাৰে বাৰে সেই স্থান এৰাৰ চেষ্টা চলাই আহিছে। ইয়াৰ পূৰ্বে ২৪ অক্টোবৰত বাঘিনীজনীয়ে বক্সাৰ পৰা ১০০ কিলোমিটাৰতকৈ অধিক দূৰত্ব অতিক্ৰম কৰি অসমত প্ৰৱেশ কৰিছিল। প্ৰায় ১০ দিন ধৰি সন্ধান চলোৱাৰ পিছত পশ্চিমবংগ আৰু অসমৰ বন বিভাগৰ যৌথ অভিযানত ৩ নৱেম্বৰত বাঘিনীজনীক বিচাৰি উলিওৱা হয়। অসমৰ কোকৰাঝাৰ জিলাৰ দতমা অঞ্চলৰ গিলাগুৰিত বাঘিনীজনীক ট্ৰেংকুলাইজাৰ প্ৰয়োগ কৰি অচেতন কৰা হৈছিল। তাৰ পিছত পুনৰ বক্সালৈ ঘূৰাই আনি বিশেষ আৱদ্ধ স্থানত ৰখা হৈছিল।
কিন্তু পুনৰ সেই স্থান এৰাৰ ঘটনাই বাঘ স্থানান্তৰকৰণ কাৰ্যসূচীৰ সফলতা আৰু বক্সা ব্যাঘ্ৰ সংৰক্ষিত বনাঞ্চলত বাঘিনীজনীৰ বাবে নিৰ্মাণ কৰা বিশেষ আৱদ্ধ স্থানৰ নিৰাপত্তা ব্যৱস্থাক লৈ নতুনকৈ প্ৰশ্নৰ উত্থাপন কৰিছে। বাঘিনীজনীয়ে বাৰে বাৰে সুৰংগ খান্দি সেই স্থান ত্যাগ কৰাটোৱে বন বিভাগৰ বাবে এক ডাঙৰ প্ৰত্যাহ্বান সৃষ্টি কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
