বিহাৰত সুৰা নিষিদ্ধ। কিন্তু তাৰ পাছতো ৰাজ্যখনলৈ অবৈধভাৱে সুৰা সৰবৰাহৰ ঘটনা প্ৰায়ে পোহৰলৈ আহে। এইবাৰ তেনে এক ঘটনাই আৰক্ষীৰ লগতে ছ’চিয়েল মিডিয়াতো ব্যাপক চৰ্চা লাভ কৰিছে। এগৰাকী যুৱতী, চিকিৎসা প্ৰতিনিধিৰ পৰিচয়, AC ফাৰ্ষ্ট ক্লাছৰ যাত্ৰা আৰু হাৰিয়ানাৰ পৰা বিহাৰলৈ সুৰা সৰবৰাহৰ অভিযোগে এই ঘটনাক লৈ বহু প্ৰশ্নৰ সৃষ্টি কৰিছে। ঘটনাটো সংঘটিত হৈছে সমস্তীপুৰ ৰে’ল ষ্টেচনত। আৰক্ষীয়ে নতুন দিল্লীৰ পৰা জয়নগৰ অভিমুখী স্বতন্ত্ৰতা সেনানী এক্সপ্ৰেছৰ এচি ফাৰ্ষ্ট ক্লাছৰ ডবাৰ পৰা প্ৰায় ৭৫ লিটাৰ ব্ৰেণ্ডেড বিদেশী সুৰা উদ্ধাৰ কৰে। এই ঘটনাৰ সৈতে জড়িত থকাৰ অভিযোগত নেহা ঝা নামৰ এগৰাকী যুৱতীক গ্ৰেপ্তাৰ কৰা হৈছে। নেহাৰ ঘৰ সমস্তীপুৰৰ সিংহিয়া থানা এলেকাৰ ১২ নম্বৰ ৱাৰ্ডৰ বাৰিগাঁৱত বুলি জানিব পৰা গৈছে।
তদন্তকাৰী দলটোৱে বাৰাণসী ৰে’ল ষ্টেচনৰ পৰা তথ্য লাভ কৰিছিল যে এগৰাকী যুৱতীয়ে AC ফাৰ্ষ্ট ক্লাছত সুৰাৰ চালান লৈ যাত্ৰা কৰি আছে। এই তথ্যৰ ভিত্তিত আৰক্ষীয়ে ৰে’লখনৰ এইচ-১ ডবাৰ ৭ নম্বৰ কম্পাৰ্টমেণ্টত তালাচী চলায়। কম্পাৰ্টমেণ্টটোৰ দুৱাৰ ভিতৰৰ পৰা বন্ধ কৰি থোৱা আছিল। আৰক্ষীয়ে দুৱাৰ খুলিবলৈ কোৱাৰ পাছত ভিতৰত এগৰাকী যুৱতী আৰু এজন যুৱকক উদ্ধাৰ কৰে। ইয়াৰ পাছত তালাচী চলোৱাত বৃহৎ পৰিমাণৰ বিদেশী সুৰা উদ্ধাৰ হয়। আৰক্ষীয়ে নেহাক আটক কৰি জেৰা আৰম্ভ কৰে। জেৰাত তেওঁ হাৰিয়ানাৰ পৰা সুৰা ক্ৰয় কৰি এখন বিৱাহ অনুষ্ঠানলৈ লৈ যোৱা বুলি কৈছিল বুলি তদন্তকাৰী সূত্ৰৰ উদ্ধৃতিৰে প্ৰকাশ পাইছে।
তদন্তত আৰক্ষীয়ে নেহাই চিকিৎসা প্ৰতিনিধি হিচাপে পৰিচয় দিছিল বুলি জানিব পৰা গৈছে। অভিযোগ অনুসৰি, এই পৰিচয়ৰ সুযোগ লৈ তেওঁ দৰভংগাৰ একাংশ চিকিৎসক আৰু প্ৰভাৱশালী লোকৰ সৈতে যোগাযোগ স্থাপন কৰিছিল। আৰক্ষীৰ সন্দেহ, চিকিৎসা প্ৰতিনিধি হিচাপে নিয়মীয়াকৈ বিভিন্ন স্থানলৈ অহা-যোৱা কৰাৰ বাবে তেওঁৰ ওপৰত সহজে সন্দেহ নপৰিছিল। এই সুযোগ ব্যৱহাৰ কৰিয়েই সুৰাৰ সৰবৰাহ চলোৱা হৈছিল নেকি, সেই বিষয়েও তদন্ত চলি আছে।
তদন্তৰ সময়ত নেহাৰ কথিত গ্ৰাহকৰ বিষয়ে কিছুমান তথ্য পোহৰলৈ অহা বুলি জানিব পৰা গৈছে। ইয়াৰ ভিতৰত অধিক মূল্যত সুৰা ক্ৰয় কৰা একাংশ চিকিৎসকৰ নামো আহিছে বুলি দাবী কৰা হৈছে। অৱশ্যে এই অভিযোগসমূহৰ সত্যতা আৰক্ষীৰ তদন্ত আৰু পৰৱৰ্তী আইনী প্ৰক্ৰিয়াৰ জৰিয়তেহে নিশ্চিত হ’ব। কেৱল অভিযোগৰ ভিত্তিত কোনো ব্যক্তিক দোষী বুলি গণ্য কৰিব নোৱাৰি।
তদন্তত আন এটা গুৰুত্বপূৰ্ণ তথ্য পোহৰলৈ অহাৰ দাবী কৰা হৈছে। অভিযোগ অনুসৰি, হাৰিয়ানাৰ পৰা প্ৰতিমাহে প্ৰায় ১.৫ লাখৰ পৰা ২ লাখ টকা মূল্যৰ সুৰা বিহাৰলৈ অনা হৈছিল। ইয়াৰ পাছত সমস্তীপুৰ আৰু দৰভংগাত সেই সুৰা অধিক মূল্যত বিক্ৰী কৰাৰ চেষ্টা চলোৱা হৈছিল বুলি অভিযোগ উঠিছে। নেহাক গ্ৰেপ্তাৰ কৰাৰ পাছত আৰক্ষীয়ে এতিয়া কেৱল ৭৫ লিটাৰ সুৰা উদ্ধাৰৰ ঘটনাটোতেই সীমাবদ্ধ নথকাকৈ এই কথিত যোগান নেটৱৰ্কৰ আঁৰত আৰু কোন কোন ব্যক্তি জড়িত আছে, সেই বিষয়েও তদন্ত আৰম্ভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
