প্ৰশান্ত মহাসাগৰৰ এটি সৰু দ্বীপ ৰাষ্ট্ৰ নাউৰুৱে চলিত কমনৱেলথ গেমছত পুনৰবাৰ ইতিহাস ৰচনা কৰিছে। ১২ হাজাৰতকৈও কম জনসংখ্যাৰ ১৭ বছৰীয়া ভাৰোত্তোলক ক্ৰীষ্টি নটে মহিলাৰ ৬৩ কেজি শাখাত প্ৰশংসনীয় প্ৰদৰ্শনেৰে ব্ৰঞ্জৰ পদক লাভ কৰে। ১৭ বছৰীয়া ক্ৰীষ্টি ন’টে মুঠ ২১৬ কিলোগ্ৰাম ওজন দাঙি পদক নিশ্চিত কৰাৰ লগতে নিজৰ দেশলৈ গৌৰৱ কঢ়িয়াই আনে।
২০২৬ চনৰ কমনৱেলথ গেমছত নাউৰুৰ এয়া দ্বিতীয়টো পদক। ভাৰোত্তোলনত আন এক ব্ৰঞ্জৰ পদকও লাভ কৰে দেশখনে। গ্লাছগোত অনুষ্ঠিত হ’বলগীয়া ২০২৬ চনৰ কমনৱেলথ গেমছত নাউৰুৰ ১৪ জনীয়া দলটোৱে এথলেটিকছ, বক্সিং, জুডো আৰু ভাৰোত্তোলনত অংশগ্ৰহণ কৰিছে। ক্ৰীষ্টিৰ এই পদক বৰ্তমান ২০২৬ চনৰ গেমছত নাউৰুৰ দ্বিতীয়টো পদক। ইয়াৰ ফলত কমনৱেলথ গেমছৰ ইতিহাসত নাউৰুৰ মুঠ পদকৰ সংখ্যা ৩৩লৈ বৃদ্ধি পাইছে।
১২ হাজাৰতকৈও কম জনসংখ্যাৰ দেশ নাউৰুৱে এই পৰ্যন্ত চলিত কমনৱেলথ গেমছত দুটাকৈ পদক লাভ কৰি বিশ্বজুৰি বিশেষভাৱে স্বীকৃতি লাভ কৰে। ২০০২ চনৰ লোকপিয়লত দেশখনৰ জনসংখ্যা মাত্ৰ ৯,৮৭২ গৰাকী আছিল। বৰ্তমানৰ দেশখনৰ জনসংখ্যা ১২,০০০ তকৈও কম।
১৯৯০ চনত নাউৰুৱে কমনৱেলথ গেমছত অভিষেক ঘটাইছিল।তেতিয়াৰ পৰা নাউৰুৱে প্ৰতিখন কমনৱেলথ গেমছত কমেও এটাকৈ পদক লাভ কৰিছে। কমনৱেলথ গেমছৰ ইতিহাসত দেশখনে এই পৰ্যন্ত ১০ টা স্বৰ্ণ, ১১টা ৰূপ আৰু ১০টাকৈ ব্ৰঞ্জৰ পদক লাভ কৰিছে। নাউৰুৰ হৈ কমনৱেলথ গেমছত প্ৰথমটো স্বৰ্ণ আৰু ৰূপ একেজন খেলুৱৈয়ে লাভ কৰিছিল আৰু তেওঁৰ নাম হৈছে মাৰ্কুছ ষ্টিফেন। ১৯৯০ত ভাৰোত্তলনৰ দুটা শাখাত স্বৰ্ণ আৰু ৰূপৰ পদক লাভ কৰিছিল ষ্টিফেনে। সেই বছৰত নাউৰুৰ পৰা কমনৱেলথলৈ যোৱা একমাত্ৰ খেলুৱৈ আছিল ষ্টিফেন। নাউৰুৰ আটাইতকৈ আমোদজনক দিশটো হ’ল দেশখনৰ কমনৱেলথ গেমছৰ সকলো পদক ভাৰোত্তোলনৰ পৰাই আহিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
