অসম লাইভ২৪ঃ ব্ৰিটেইনৰ মছনদত শনিবাৰে ৰজা তৃতীয় চাৰ্লছৰ ৰাজঅভিষেক। অনুষ্ঠানৰ যাৱতীয় ব্যৱস্থাপনা ইতিমধ্যে আৰম্ভ হৈছে। আনুষ্ঠানিকভাৱে ‘কুইন কনছৰ্ট’ হিচাপে ঘোষণা কৰা হ’ব চাৰ্লছৰ পত্নী কেমিলাক। এই ৰাজকীয় অনুষ্ঠানৰ বাবে কেমিলাৰ পোছাকৰ নক্সা কিন্তু তৈয়াৰ হৈছে প্ৰান্তীয় এখন গাঁৱত। হুগলীৰ প্ৰান্তীয় এখন গাওঁ। এই ড্ৰেছৰ নক্সা তৈয়াৰ কৰিছে প্ৰিয়ংকা মল্লিক নামৰ এজন লোকে। প্ৰিয়ংকাই নিজ চকুৰে কাহানিও বাকিংহাম পেলেছ দেখা নাই। লণ্ডনৰ পৰিসীমাও কাহানিও গৰকা নাই প্ৰিয়ংকাই। হাজাৰ হাজাৰ কিঃমিঃ দূৰত্বত থাকিয়েই ৰাজপৰিয়ালৰ বাবে কাম কৰিছে প্ৰিয়ংকাই।
হুগলীৰ যোগাযোগ ব্যৱস্থা পূৰ্বতকৈ কিছু উন্নত হ’লেও প্ৰায় সময়তে ফোনৰ নেটৱৰ্ক নাথাকে। ষ্টেচনৰ পৰা নামি প্ৰথমে অটো তাৰপিছত খোজকাঢ়ি প্ৰিয়ংকাৰ গাঁৱলৈ যাত্ৰা কৰিব লাগে। কিন্তু প্ৰিয়ংকাৰ হাতৰ কাম কোনো বাধা নোপোৱাকৈয়ে লণ্ডন পায়গৈ। দেশ-বিদেশৰ নানান জ্ঞানী-গুণী পোছাকশিল্পীৰ ভীৰত প্ৰিয়ংকাই তৈয়াৰ কৰা নক্সাহে নিৰ্বাচিত কৰিছে কেমিলাৰ দলে। ‘ইটাৰনেল ৰোজ’ থিমৰ এই পোছাক দেখা মাত্ৰকেই ৰাণীয়ে প্ৰিয়ংকাৰ প্রশংসাত পঞ্চমুখ হৈ পৰিছে। প্ৰিয়ংকাই এই সন্দৰ্ভত কয়, ‘মই ৰাণীৰ বাবে নিৰ্মাণ কৰা ড্ৰেছযোৰ ৰঙা আছিল। কান্ধৰ ওচৰত আছিল পখিলাৰ এটা ডিজাইন। গোটেই পোছাকযোৰতেই গোলাপৰ পাপৰিৰ দৰে ডিজাইন কৰিছো। লগতে আছে এটা বিশেষ ডিজাইনৰ টুপিও। ৰঙা গোলাপ ইংলেণ্ডৰ প্ৰতীক। সেয়ে এই নক্সাত গোলাপ আছে।’
কেৱল পোছাকেই নহয়, ৰাণীয়ে পিন্ধা জোতাও ডিজাইন কৰিছে প্ৰিয়ংকাই। ৰাণীয়ে প্ৰিয়ংকাই ডিজাইন কৰা জোতাযোৰৰো বিশেষ প্ৰশংসা কৰিছে। ৰাজ পৰিয়ালৰ তৰফৰ পৰা প্ৰিয়ংকাক ধন্যবাদ জনাই চিঠিও পঠিয়াইছে। সেই বিশেষ চিঠিত লিখা হৈছে, ‘তুমি অত্যন্ত গুণী শিল্পী। তুমি তৈয়াৰ কৰা পোছাকৰ নক্সা দেখি ৰাণী নথৈ আনন্দিত। সময় লৈ তুমি যি নক্সা তৈয়াৰ কৰিছা তাৰ বাবে তোমাক অশেষ ধন্যবাদ।’
ইপিনে ৰজা তৃতীয় চাৰ্লছৰ পোছাকত শোভা বঢ়াব ‘দ্যা কছমেটিক বাটাৰফ্লাই ব্ৰুছ’য়ে। প্ৰিয়ংকাই এই সন্দৰ্ভত কয়, ‘ বিশ্বব্ৰহ্মাণ্ডত থকা বিভিন্ন ৰঙৰ সমাহাৰ আছে পখিলাৰ আকাৰৰ সেই পিনটোত। সেই পিনটোৱেই ৰজাৰ ব্যক্তিত্বক বিশেষত্ব প্ৰদান কৰিছে। কুইন কনছাৰ্টৰ ব্যক্তিগত সচিবেও প্ৰিয়ংকাক পত্ৰযোগে ধন্যবাদ জনাইছে। মূল অনুষ্ঠানত নহলেও অভিষেকৰ কোনো এক অনুষ্ঠানত ৰজা তৃতীয় চাৰ্লছ আৰু ৰাণী কেমিলাক এই পোছাকত দেখা যাব। ৰাণী দ্বিতীয় এলিজাবেথৰ ৰাজত্বৰ ৭০ বছৰ পূৰ্তি অনুষ্ঠানত ৰাণীৰ বাবে পোছাক আৰু মুকুটৰ নক্সা পঠিয়াইছিল প্ৰিয়ংকাই। ৰাজপৰিয়ালে সেই নক্সা দেখি খুবেই অভিভূতও হৈছিল। সেয়াই আৰম্ভণি। তাৰপাছতেই লণ্ডনৰ ৰাজপৰিয়ালে লগ এৰা নাই প্ৰিয়ংকাৰ।
সো শৰীৰে প্ৰিয়ংকাই লণ্ডন নগ’লেও গাঁৱত থাকিয়েই ৰাজপৰিয়ালৰ বাবে কাপোৰ ডিজাইন কৰিছে প্ৰিয়ংকাই। প্ৰিয়ংকাৰ ঘৰ গাঁৱত হ’লেও চিন্তা কিন্তু আন্তৰ্জাতিক। পিতৃয়ে চৰকাৰী চাকৰি কৰিছিল। বৰ্তমান অৱসৰপ্ৰাপ্ত। মাতৃ গৃহিনী। ভাতৃৰ সৈতে ৪গৰাকী ভাইটী-ভণ্টিৰে মধ্যবিত্ত সংসাৰ। সৰুতেই আঁক-বাক কৰি ভালপোৱা প্ৰিয়ংকাই ডিজাইনিঙত ডিপ্লমা ল’বৰ বাবে অনলাইনযোগে ইটালীৰ মিলানৰ এক সংস্থাৰ অধীনত ফেশ্বন ডিজাইনিঙৰ ক’ৰ্চ কৰে। তাৰপাছতেই আমেৰিকাৰ হাৰ্ভাৰ্ড বিশ্ববিদ্যালয়ত অনলাইন ক্লাছ লয়। হাৰ্ভাৰ্ড বিশ্ববিদ্যালয়ত ‘চাছটেইনেবল বিজনেছ’ত ডিগ্ৰী লয়।
ৰজাৰ অভিষেক অনুষ্ঠানত আমন্ত্ৰিত অতিথিৰ তালিকাত নাম আছে প্ৰিয়ংকাৰো। শাৰীৰিকভাৱে উপস্থিত থাকিব নোৱাৰিলেও বাকিংহাম পেলেছত ৰজাৰ অভিষেকত ভাৰ্ছুৱেলী যোগ দিব প্ৰিয়ংকাই। কিন্তু পৰিস্থিতি অনুকূল হ’লে কোনো বাধা বিঘিনি নাহিলে সাত সাগৰ তেৰ নদী পাৰ হৈ ৰাজদৰবাৰত উপস্থিত হ’বও পাৰে বুলি প্ৰিয়ংকাৰ আত্মীয়ই প্ৰকাশ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
