পাকিস্তানত আৰক্ষীৰ কাৰ্যকলাপৰ সৈতে জড়িত এনে এটা গোচৰ পোহৰলৈ আহিছে, যিয়ে FIR ত লিপিবদ্ধ কৰা অভিযোগৰ ওপৰত সন্দেহৰ সৃষ্টি কৰিছে। এই বিষয়টো ৫ আগষ্টত ইছলামবাদত অনুষ্ঠিত হোৱা প্ৰতিবাদৰ সৈতে জড়িত, য’ত প্ৰাক্তন প্ৰধানমন্ত্ৰী তথা পিটিআইৰ প্ৰতিষ্ঠাপক ইমৰাণ খানক মুক্তিৰ দাবী জনাইছিল।
প্ৰতিবাদৰ সময়ত আৰক্ষীয়ে কেইবাজনো ব্যক্তিক আটক কৰে। এই কাৰ্যৰ অংশ হিচাপে লতিফ উল্লাহ সাদোজাই নামৰ এজন লোকক গ্ৰেপ্তাৰ কৰা হয়। তেওঁৰ বিৰুদ্ধে কাৰ্পা থানাত এফআইআৰ ৰুজু কৰা হয়। প্ৰতিবাদৰ সময়ত লতিফ উল্লাই আৰক্ষীক শিলগুটি নিক্ষেপ কৰি লাঠিৰে আক্ৰমণ কৰাৰ অভিযোগ উত্থাপন কৰিছে আৰক্ষীয়ে। গ্ৰেপ্তাৰৰ পিছত তেওঁক তিনিদিনৰ বাবে আৰক্ষীৰ জিম্মালৈ প্ৰেৰণ কৰা হয়।
কিন্তু লতিফ উল্লাক আদালতত হাজিৰ কৰোৱাৰ সময়ত তেওঁৰ অধিবক্তা অধিবক্তা চৰ্দাৰ মাৰুফে এফ আই আৰত উত্থাপিত অভিযোগকেই প্ৰত্যাহ্বান জনায়। তেওঁ আদালতক জনাইছিল যে তেওঁৰ ক্লায়েণ্টৰ হাতত কোনো অস্ত্ৰ নাই। তেওঁৰ কোনো হাত নাই, হাত নোহোৱা ব্যক্তিয়ে কেনেকৈ শিলগুটি নিক্ষেপ কৰিলে?
বিষয়টোক গুৰুত্বসহকাৰে লৈ ডিউটি দণ্ডাধীশ ৰিজৱান-উদ-দিনৰ আদালতে অভিযুক্তৰ শাৰীৰিক অৱস্থা পৰীক্ষা কৰাৰ নিৰ্দেশ দিয়ে। আদালতত অনুষ্ঠিত পৰীক্ষাত নিশ্চিত হৈছে যে লতিফ উল্লাৰ দুয়োটা বাহু নাই।
ইয়াৰ পিছত আদালতে তেওঁক গোচৰৰ পৰা মুকলি কৰি দিয়ে। এই ঘটনাই এফআইআৰত লিপিবদ্ধ অভিযোগ আৰু অভিযুক্তৰ প্ৰকৃত শাৰীৰিক অৱস্থাৰ মাজত থকা অমিল সন্দৰ্ভত গুৰুতৰ প্ৰশ্নৰ উত্থাপন কৰিছে। বিষয়টো পোহৰলৈ অহাৰ পাছত পাকিস্তান আৰক্ষীৰ কার্যক লৈও প্রশ্ন উত্থাপন হৈছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
