আধাৰ কাৰ্ডৰ নতুন আপডেট। যদি আপোনাৰ ঘৰত সৰু ল’ৰা-ছোৱালী আছে আৰু তেওঁলোকৰ বাবে আধাৰ কাৰ্ড বনাইছে, তেন্তে আপোনাৰ বাবে এইটো গুৰুত্বপূৰ্ণ খবৰ। আধাৰৰ নিয়ন্ত্ৰক সংস্থা ভাৰতীয় ইউনিক আইডেন্টিফিকেশন অথৰিটি (ইউআইডিএআই)য়ে শিশুৰ বায়’মেট্ৰিক আপডেট সন্দৰ্ভত ডাঙৰ নিৰ্দেশনা দিছে।
ইউআইডিএআইয়ে জনোৱা মতে, পাঁচ বছৰ বয়স সম্পূৰ্ণ কৰাৰ পিছত শিশুৱে বায়’মেট্ৰিক আপডেট কৰিব লাগিব। তাৰ পিছত আকৌ এবাৰ ১৫ বছৰ বয়সত তেওঁলোকৰ বায়’মেট্ৰিক আপডেট কৰাটো বাধ্যতামূলক হ’ব। বায়’মেট্ৰিক আপডেটৰ সময়ত আধাৰ কাৰ্ডত শিশুটিৰ ফটো, আঙুলিৰ ছাপ আৰু আইৰিছ তথ্য সংগ্ৰহ কৰা হ’ব।
বিনামূলীয়া আপডেটৰ সুযোগ-
ইউআইডিএআইয়ে জনোৱা মতে, ৫ৰ পৰা ৭ বছৰ বয়সৰ শিশু আৰু ১৫ৰ পৰা ১৭ বছৰ বয়সৰ কিশোৰ-কিশোৰীক বায়’মেট্ৰিক আপডেট সম্পূৰ্ণ বিনামূলীয়াকৈ কৰাৰ সুযোগ দিয়া হৈছে। ৭ৰ পৰা ১৫ বছৰ বয়সৰ সকলেও আধাৰ কাৰ্ডত বিনামূলীয়াকৈ বায়’মেট্ৰিক আপডেট কৰিব পাৰিব। অৱশ্যে এই সুযোগ সীমিত সময়ৰ বাবে। এই আপডেট ৩০ ছেপ্টেম্বৰলৈকে বিনামূলীয়াকৈ কৰিব পাৰিব। তাৰ পিছত যদি আপডেট কৰিব বিচাৰে তেন্তে মাচুল লোৱা হ’ব।
যদি আপোনাৰ সন্তানৰ বায়’মেট্ৰিক্স এতিয়াও তেওঁলোকৰ আধাৰ কাৰ্ডত আপডেট কৰা হোৱা নাই তেন্তে এই এমাহৰ ভিতৰত আপডেট কৰিব পাৰিব।
কিয় ৫ বছৰ আৰু ১৫ বছৰৰ পিছত আধাৰ কাৰ্ড আপডেট কৰাটো প্ৰয়োজন?
শৈশৱত যেতিয়া আধাৰ কাৰ্ড প্ৰথম প্ৰদান কৰা হয় তেতিয়া শিশুটিৰ ফটো আৰু অন্যান্য সবিশেষ কাৰ্ডত লিপিবদ্ধ কৰা হয়। সেই সময়ত বায়’মেট্ৰিক তথ্য সংগ্ৰহ কৰা নহয়। যেতিয়া শিশুটিয়ে ৫ বছৰ সম্পূৰ্ণ কৰে তেতিয়া বায়’মেট্ৰিক তথ্য যেনে আঙুলিৰ ছাপ, আইৰিছ স্কেন আৰু এখন নতুন ফটো ৰেকৰ্ড কৰা হয়। তাৰ পিছত ১৫ বছৰ বয়সত পুনৰ আপডেট কৰা হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
