‘বটৱাৰা-1947’ ছবিখন মুক্তি পোৱাৰ এসপ্তাহো সম্পূৰ্ণ হোৱা নাই। তাৰ মাজতে ছবিখনৰ প্ৰযোজক আমীৰ খান আৰু মুখ্য অভিনেতা ছানী দেউলৰ মাজত OTT অধিকাৰক লৈ মতানৈক্যৰ খবৰ পোহৰলৈ আহিছে। প্ৰতিবেদন অনুসৰি, ছবিখনৰ OTT অধিকাৰৰ বাবে এটা ডাঙৰ OTT প্লেটফৰ্মে প্ৰায় ৬০ কোটি টকাৰ প্ৰস্তাৱ দিছিল। ছানী দেউল আৰু আমীৰ খানে এই চুক্তিৰ পৰা ৫০ শতাংশ লাভ ভাগ-বতৰা কৰাৰ চিন্তা কৰিছিল বুলি দাবী কৰা হৈছে। প্ৰতিবেদনটোত ছানী দেউলে এই চুক্তিৰ প্ৰতি আগ্ৰহী আছিল বুলি কোৱা হৈছে। কিন্তু আমীৰ খানে আন এটা ব্যৱসায়িক মডেলৰ কথা চিন্তা কৰি থকাৰ বাবে ৬০ কোটি টকাৰ প্ৰস্তাৱটো গ্ৰহণ নকৰিলে বুলি প্ৰতিবেদনত উল্লেখ কৰা হৈছে।
ইয়াৰ আঁৰত আমীৰ খানৰ নতুন ধৰণৰ চিন্তা আছিল বুলি কোৱা হৈছে। তেওঁ পৰম্পৰাগত OTT প্লেটফৰ্মৰ সলনি ‘pay per view’ বা ‘ভিডিঅ’-অন-ডিমাণ্ড’ৰ দৰে মডেলৰ জৰিয়তে ছবি দৰ্শকৰ ওচৰলৈ নিয়াৰ পৰিকল্পনা কৰিছিল। ‘চিতাৰে জমিন পাৰ’ ছবিখনৰ ক্ষেত্ৰতো আমীৰ খানে ইউটিউবৰ জৰিয়তে এনে এটা মডেল ব্যৱহাৰ কৰিছিল। কিন্তু ‘বটৱাৰা-1947’ ছবিখনৰ ক্ষেত্ৰত অ’টিটি চুক্তিৰ ৬০ কোটি টকাৰ প্ৰস্তাৱ নাকচ কৰাৰ সিদ্ধান্তই ছানী দেউলক অসন্তুষ্ট কৰিছে বুলি প্ৰতিবেদনটোত দাবী কৰা হৈছে। কাৰণ ছবিখন মুক্তিৰ পিছত বক্স অফিচত আশানুৰূপ ব্যৱসায় নকৰাত ইয়াৰ অ’টিটি অধিকাৰৰ মূল্য কমি যোৱা বুলি প্ৰতিবেদনত উল্লেখ কৰা হৈছে।
এতিয়া ছবিখনৰ অ’টিটি অধিকাৰৰ মূল্য প্ৰায় ৩০ কোটি টকা হ’ব পাৰে বুলি অনুমান কৰা হৈছে। অৰ্থাৎ আগতে লাভ কৰিব পৰা ৬০ কোটি টকাৰ তুলনাত এই মূল্য প্ৰায় আধা। ইয়াৰ ফলত ছানী দেউলৰো যথেষ্ট আৰ্থিক লোকচান হ’ব পাৰে বুলি কোৱা হৈছে। অৱশ্যে এই সমগ্ৰ বিষয়টো এতিয়াও নিশ্চিত হোৱা নাই। আমীৰ খান বা ছানী দেউল—কোনোৱেই এই মতানৈক্যৰ খবৰ সন্দৰ্ভত ৰাজহুৱাভাৱে কোনো প্ৰতিক্ৰিয়া প্ৰকাশ কৰা নাই।
ইফালে ৰাজকুমাৰ সন্তোষীৰ পৰিচালনাত নিৰ্মিত ‘বটৱাৰা-1947’ ১৪ আগষ্টত ছবিগৃহত মুক্তি লাভ কৰে। ছবিখনত ছানী দেউলে মুখ্য চৰিত্ৰত অভিনয় কৰাৰ বিপৰীতে আমীৰ খান প্ৰযোজকৰ ভূমিকাত আছে। প্ৰতিবেদনত উল্লেখ কৰা তথ্য অনুসৰি, ছবিখনে মুক্তিৰ প্ৰথম পাঁচ দিনত ভাৰতত প্ৰায় ৩০.৭৫ কোটি টকা সংগ্ৰহ কৰিছে। বক্স অফিচত ছবিখনৰ গতি লেহেমীয়া হোৱাৰ বাবেই অ’টিটি অধিকাৰৰ মূল্যতো প্ৰভাৱ পৰিব পাৰে বুলি ধাৰণা কৰা হৈছে। সেয়েহে এতিয়া সকলোৰে দৃষ্টি ছবিখনৰ আগন্তুক বক্স অফিচ প্ৰদৰ্শন আৰু অ’টিটি চুক্তিৰ ওপৰত। অৱশ্যে আমীৰ খান আৰু ছানী দেউলৰ মাজত সঁচাকৈয়ে কোনো বিবাদ হৈছে নে নাই, সেই বিষয়ে তেওঁলোকৰ পৰা স্পষ্ট বক্তব্য অহালৈকে নিশ্চিতভাৱে ক’ব পৰা নাযায়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
