‘জীৱনৰ নিৰাপত্তা নাই, শ্বিলঙলৈ কোনেও নাযাব’

শ্বিলঙত অসমৰ পৰ্যটকৰ বাহনত আক্ৰমণৰ ঘটনাক কেন্দ্ৰ কৰি দুয়োখন ৰাজ্যৰ জনসাধাৰণৰ মাজত উত্তেজনা বৃদ্ধি পাইছে। আজি পুৱাৰে পৰা অসম-মেঘালয় সীমান্তত চেপা উত্তেজনাই বিৰাজ কৰিছে। শ্বিলঙত অসমৰ পৰ্যটক আৰু চালকৰ বাহনত শিলগুটি, লাঠি, ৰড আদিৰে আক্ৰমণ কৰা দৃশ্যই সংবাদ মাধ্যমৰ শিৰোনাম দখলৰ পাছতে অসমৰ বিভিন্ন স্থানত তীব্ৰ প্ৰতিক্ৰিয়াৰ সৃষ্টি হৈছে। বিশেষকৈ যোৰাবাটত অসমৰ কেব চালকসকলে প্ৰতিবাদ সাব্যস্ত কৰি মেঘালয়ৰ ব্যক্তিগত, বাণিজ্যিক তথা চৰকাৰী বাহনো অসমত প্ৰৱেশ কৰিবলৈ বাধা দিয়া দেখা হৈছে।

বুধবাৰে বিয়লিৰ পৰা শ্বিলঙৰ পৰিস্থিতি অধিক উত্তপ্ত হৈ পৰে। খাচী ষ্টুডেণ্টছ ইউনিয়ন (KSU)ৰ প্ৰতিবাদকাৰীসকলে ক’লা পতাকা উৰুৱাই প্ৰতিবাদ সাব্যস্ত কৰাৰ লগতে বিভিন্ন দাবীৰে মেঘালয় চৰকাৰৰ বিৰুদ্ধে ক্ষোভ প্ৰকাশ কৰে। খাচী ষ্টুডেণ্টছ ইউনিয়নৰ সদস্যসকলে অগণতান্ত্ৰিকভাৱে প্ৰতিবাদৰ মাজতে ৰাজহুৱা সম্পত্তিৰ ক্ষতিসাধন কৰাৰ উপৰিও, সাধাৰণ নাগৰিক বিশেষকৈ অসমৰ নাগৰিক আৰু বাহনক টাৰ্গেট কৰি লোৱাও পৰিলক্ষিত হয়। KSUৰ সদস্যসকলৰ হাতত আনকি ৩-৪ বছৰীয়া শিশুও বাছি নগ’ল। ছাত্ৰ সংগঠনটোৰ আক্ৰমণত এটি প্ৰায় ৩-৪ বছৰীয়া অসমীয়া শিশুও গুৰুতৰভাৱে আহত হয়। কোনো ছাত্ৰ সংগঠনে হাতত চোকা অস্ত্ৰ লৈ এনে হিংসাত্মক প্ৰতিবাদৰ কাৰ্যসূচী সমগ্ৰ বিশ্বতে বিৰল।

ভুক্তভোগী চালকৰ শিহৰণকাৰী বৰ্ণনা

শ্বিলঙলৈ ফুৰিবলৈ যোৱা অসমৰ পৰ্যটকৰ বাহনক বাছি বাছি আক্ৰমণ কৰা ঘটনা অত্যন্ত চিন্তাজনক। ঘটনাৰ ভুক্তভোগী অসমৰ এজন চালকে ঘটনাৰ ভয়ংকৰ অভিজ্ঞতা বৰ্ণনা কৰি কয় যে-‘প্ৰতিবাদকাৰীৰ হাতত লাঠি, ৰড আদি আছিল। বাহনৰ ভিতৰত মহিলা-শিশু পৰ্যটক থকাৰ পাছতো শিল-ৰডেৰে ভয়ংকৰ আক্ৰমণ কৰে। আমাৰ আগৰ আৰু পিছৰ দুয়োখন গাড়ী মেঘালয়ৰ আছিল। সেই দুয়োখন গাড়ীত তেওঁলোকে একো নকৰি কেৱল আমাৰ গাড়ীখন অসমৰ বাবেই আক্ৰমণ কৰে। গাড়ীখনৰ সন্মুখৰ বনেটত উঠি গচকি গচকি ক্ষতিগ্ৰস্ত কৰে। সমুখৰ আইনাত ৰডেৰে আক্ৰমণ কৰে। আইনাৰ টুকুৰাই ৪ বছৰীয়া শিশুক আঘাত কৰে। সকলোতকৈ দুখলগা আৰু দুৰ্ভাগ্যজনক কথাটো হৈছে এই ঘটনাৰ সময়ত আমাৰ ওচৰতে মেঘালয় আৰক্ষীৰ লোক আছিল কিন্তু তেওঁলোকে একো পদক্ষেপ হাতত নললে। আমাক আক্ৰমণ কৰা ছাত্ৰ সংগঠনটোৰ সদস্যসকলকো আৰক্ষীয়ে নিয়ন্ত্ৰণ কৰাৰ চেষ্টা বা কোনো পদক্ষেপ নললে।’ চালকজনৰ বৰ্ণনা অনুসৰি, প্ৰতিবাদকাৰীয়ে বাহনলৈ শিলগুটি দলিওৱাৰ লগতে ৰডেৰে গাড়ীৰ গ্লাছ ভাঙি দিয়ে। আনকি একাংশ প্ৰতিবাদকাৰীয়ে বাহনৰ ওপৰলৈ উঠি অসমৰ বাহনৰ ব্যাপক ক্ষতিসাধন কৰাৰ দৃশ্যও ইতিমধ্যে Asom Liveত সম্প্ৰচাৰিত হৈছে। খাছী ষ্টুডেণ্টছ ইউনিয়নৰ উন্মাদ সদস্যৰ আক্ৰমণত অসমৰ এটি শিশুকে ধৰি এজন পৰ্যটক আহত হৈ চিকিৎসালয়ত ভৰ্তি হৈছে। অসমৰ পৰ্যটকৰ বাহন ভাঙি পেলোৱা ঘটনাক লৈ মেঘালয় চৰকাৰে ক্ষমা খোজাৰ দাবী উত্থাপিত হৈছে। ক্ষতিগ্ৰস্ত বাহনৰ উচিত ক্ষতিপূৰণ দিয়াৰ দাবীও জনোৱা হৈছে। অন্যথা পৰিস্থিতি অধিক বিষম কৰাৰ হুংকাৰ দিছে অসমৰ কেব চালকসকলে।

KSUৰ তিনি শীৰ্ষ নেতা গ্ৰেপ্তাৰ

এই হিংসাত্মক প্ৰতিবাদৰ পাছতে মেঘালয় আৰক্ষীয়ে KSUৰ তিনি শীৰ্ষ নেতাক গ্ৰেপ্তাৰ কৰে। গ্ৰেপ্তাৰ হোৱা নেতাসকল হৈছে KSUৰ সভাপতি ৰেমন খাৰজানা, উপ-সভাপতি পিনকমেনলাং ছানমিয়েট আৰু সাধাৰণ সম্পাদক ৰুবেন নাজিয়াৰ। ৰাজহুৱা সম্পত্তিৰ ক্ষতিসাধন, সাধাৰণ নাগৰিকক আক্ৰমণ আৰু অন্যান্য অভিযোগৰ ভিত্তিত তিনিওজনৰ বিৰুদ্ধে ভাৰতীয় ন্যায় সংহিতাৰ কেইবাটাও ধাৰাত গোচৰ ৰুজু কৰা হৈছে বুলি জানিব পৰা গৈছে।

শ্বিলঙৰ ঘটনাৰ পাছত যোৰাবাটত ক্ষোভ

শ্বিলঙত অসমৰ চালক আৰু পৰ্যটকৰ ওপৰত আক্ৰমণৰ অভিযোগৰ পাছত অসমত বিশেষকৈ খানাপাৰা আৰু যোৰাবাটত ক্ষোভৰ উদগীৰণ ঘটে। অসমৰ কেব চালকসকলে প্ৰতিবাদ সাব্যস্ত কৰি ৰাষ্ট্ৰীয় ঘাইপথ অৱৰোধ কৰাৰ ফলত যোৰাবাটত বৃহৎ যান-জঁটৰ সৃষ্টি হয়। হাজাৰ হাজাৰ বাহন আৱদ্ধ হৈ পৰাৰ ফলত যাতায়াত ব্যৱস্থা ব্যাহত হয়। প্ৰতিবাদকাৰীসকলে অসমৰ চালক আৰু পৰ্যটকৰ সুৰক্ষা নিশ্চিত কৰাৰ বাবে চৰকাৰক শীঘ্ৰে কঠোৰ পদক্ষেপ গ্ৰহণ কৰিবলৈ দাবী জনায়। মেঘালয়ত অসমৰ বাহনৰ ওপৰত আক্ৰমণৰ ঘটনাৰ বিৰুদ্ধে ক্ষোভ প্ৰকাশ কৰি একাংশ চালকে মেঘালয়ৰ বাহন অসমত প্ৰৱেশতো বাধা দিয়ে।

যোৰাবাটত পৰিস্থিতি ইমানেই উত্তপ্ত হৈ পৰে যে মেঘালয়ৰ চৰকাৰী বাহনকো অসমত প্ৰৱেশ কৰিবলৈ বাধা দিয়া দেখা হৈছে। পশ্চিম গাৰো পাহাৰ জিলাৰ এগৰাকী ASPৰ বাহনো প্ৰতিবাদকাৰীয়ে যোৰাবাটৰ পৰা উভতাই পঠোৱাৰ তথ্য প্ৰকাশ পাইছে। ML 08P 1424 নম্বৰৰ এখন বাহন অসমত প্ৰৱেশ কৰাত বাধা দিয়াৰ কথাও জানিব পৰা গৈছে। প্ৰতিবাদকাৰীসকলে স্পষ্ট কৰি দিয়ে যে-মেঘালয়ৰ ব্যক্তিগত বা বাণিজ্যিক বাহনৰ লগতে চৰকাৰী বাহনো বৰ্তমানৰ পৰিস্থিতিত অসমত প্ৰৱেশ কৰিবলৈ দিয়া নহ’ব। ইয়াৰ উপৰিও অসমৰ প্ৰতিবাদকাৰীসকলে মেঘালয়ৰ সৈতে অৰ্থনৈতিক পথ অৱৰোধ কৰাৰ হুংকাৰো শুনিবলৈ পোৱা গৈছে। অত্যাৱশ্যকীয় সামগ্ৰীৰ চলাচল বন্ধ কৰাৰ দৰে কঠোৰ পদক্ষেপৰ কথাও একাংশ প্ৰতিবাদকাৰীয়ে উল্লেখ কৰিছে। অসম ৰাজ্যিক চালক সন্থাৰ সভাপতিয়েও শ্বিলঙৰ ঘটনাক লৈ তীব্ৰ প্ৰতিক্ৰিয়া প্ৰকাশ কৰি অসমৰ চালক আৰু পৰ্যটকৰ সুৰক্ষাৰ বাবে উপযুক্ত ব্যৱস্থা গ্ৰহণৰ দাবী জনাইছে।

এই প্ৰতিবেদন যুগুতাইছে মানসজ্যোতিয়ে

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ