‘অচিৰেই গ্ৰেপ্তাৰ হ’ব কেজৰিৱাল!’ EDয়ে অচিৰেই গ্ৰেপ্তাৰ কৰিব পাৰে হেমন্ত তেজস্বী, বিজয়ন, ষ্টেলিনকো

অসম লাইভ২৪ঃ আবকাৰী দুৰ্নীতিৰ গোচৰত দিল্লীৰ মুখ্যমন্ত্ৰী তথা আম আদমী পাৰ্টীৰ নেতা অৰবিন্দ কেজৰীৱালক গ্ৰেপ্তাৰ কৰিব পাৰে এনফোৰ্ছমেণ্ট ডাইৰেক্টৰে। মঙলবাৰে এই অভিযোগ আনিছে দিল্লীৰ মন্ত্ৰী তথা আপ নেতা অতিশীয়ে। মন্ত্ৰী অতিশীয়ে এই সন্দৰ্ভত কয়, ‘আমাৰ সৈতে ৰাজনৈতিক যুঁজত বিজেপি জয়ী হ’ব পৰা নাই। অৰবিন্দ কেজৰীৱালক প্ৰধানমন্ত্ৰী নৰেন্দ্ৰ মোদীয়ে ভয় খাইছে। সেয়ে কেন্দ্ৰীয় সংস্থাসমূহক লগাই কেজৰিৱালক ভুৱা গোচৰতেই জে’লত ভৰাব খুজিছে বিজেপিয়ে।’

আগন্তুক বৃহস্পতিবাৰে দিল্লীৰ আৱকাৰী দুৰ্নীতি সংক্ৰান্তীয় গোচৰত সোধপোচ কৰিবৰ বাবে EDৰ সদৰ দপ্তৰৰ পৰা নটিছ প্ৰেৰণ কৰি হাজিৰ হ’বলৈ নিৰ্দেশ দিয়া হৈছে কেজৰিৱালক। অতিশীয়ে এই বিষয়টোৰ বাবেই আশংকা ব্যক্ত কৰিছে যে অতিশীঘ্ৰেই গ্ৰেপ্তাৰ হ’ব পাৰে দিল্লীৰ মুখ্যমন্ত্ৰী কেজৰিৱালো। আৱকাৰী দুৰ্নীতিৰ গোচৰত প্ৰাক্তন উপমুখ্যমন্ত্ৰী মনীশ ছিচোডিয়া আৰু আপ সাংসদ সঞ্জয় সিংহক গ্ৰেপ্তাৰ কৰিছে EDয়ে। লিষ্টত আছে কেজৰিৱালৰ নামো। কেজৰীৱালৰ ভৱিষ্যতক লৈ সেয়ে শংকাত ভুগিছে আপৰ কৰ্মকৰ্তাসকল।

কেজৰিৱালৰ ওপৰিও নৰেন্দ্ৰ মোদী চৰকাৰৰ টাৰ্গেটত আছে ঝাৰখণ্ডৰ মুখ্যমন্ত্ৰী তথা জেএমএম প্ৰধান হেমন্ত চুৰেণ, বিহাৰৰ উপমুখ্যমন্ত্ৰী তথা আৰ জে ডি প্ৰধান লালুপ্ৰসাদৰ পুত্ৰ তেজস্বী যাদৱ আৰু কেৰালাৰ মুখ্যমন্ত্ৰী তথা চিপিআইএমৰ নেতা পিনাৰাই বিজয়ন, তামিলনাডুৰ মুখ্যমন্ত্ৰী তথা ডি এম কেৰ সভাপতি এম কে ষ্টেলিনো। আপ নেত্ৰী তথা মন্ত্ৰী অতিশীয়ে এই সন্দৰ্ভত কয়, ‘দিল্লীৰ দৰেই এই ৰাজ্যসমূহতো ধাৰাবাহিকভাৱে বিজেপিৰ পৰাজয় হৈছে। সেয়ে এইবাৰ এই কৌশল প্ৰয়োগ কৰি বিজেপিয়ে নিজকে শক্তিশালী কৰাব খুজিছে।’ এই প্ৰসংগত আদালতত জমা দিয়া দ্বিতীয় চাৰ্জশ্বিটত দিল্লীৰ মুখ্যমন্ত্ৰীৰ নাম উল্লেখ কৰিছে EDয়ে। এই চাৰ্জশ্বিট ভাইৰেল হোৱা মাত্ৰকেই একাংশৰ ধাৰণা যে ক্ৰমশ ‘বৃত্ত’ সৰু কৰি আনিছে কেন্দ্ৰীয় তদন্তকাৰী সংস্থা ED।

বিগত ১৬ এপ্ৰিলত আৱকাৰী দুৰ্নীতিৰ গোচৰত কেজৰিৱালক প্ৰয় ৯ঘণ্টা ৩০ মিনিট সময় সোধপোছ অব্যাহত ৰাখিছিল EDয়ে। তাৰপিছতেই এই গোচৰত বেআইনী আৰ্থিক লেনদেনৰ সন্ধানত তদন্ত আৰম্ভ কৰিছিল EDয়ে। প্ৰসংগত আপ চৰকাৰৰ আমোলত আবকাৰী নীতি সলনি কৰি কেইবাটাও সংস্থাক বেআইনীভাৱে সুযোগ দিয়া বুলি অভিযোগ উত্থাপিত হৈছে। বিগত বৰ্ষতেই বিতৰ্কিত এই আৱকাৰী নীতি বাতিল কৰাৰ কথা ঘোষণা কৰিছিল দিল্লীৰ আপ চৰকাৰে। ইয়াৰ পূৰ্বে চিবিআই তদন্তৰ নিৰ্দেশ দিছিল দিল্লীৰ লেফ্টেনেন্ট গভৰ্নৰ ভি কে ছাক্সেনাই। এই গোচৰৰ অন্যতম অভিযুক্ত হিচাপে নাম আছে দিল্লীৰ তৎকালীন উপমুখ্যমন্ত্ৰী মনিশ ছিচোদিয়া আৰু সাংসদ সঞ্জয়কো। এই গোচৰত বিগত ফেব্ৰুৱাৰীত ছিচোডিয়া আৰু চলিত মাহত সাংসদ সঞ্জয়ক গ্ৰেপ্তাৰ কৰা হৈছে। আম আদমী পাৰ্টীৰ নেতাসকলৰ দাবী যে, বিৰোধীসকলক দমন কৰিবৰ বাবেই মনে সজা অভিযোগ জাপি এটা এটাকৈ বিৰোধীক গ্ৰেপ্তাৰ কৰিছে কেন্দ্ৰৰ বিজেপি চৰকাৰে।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ