অসম লাইভ২৪ঃ দীৰ্ঘ ৯ঘণ্টা সময় চিবিআইৰ কাৰ্যালয়ৰ পৰা ওলাল দিল্লীৰ মুখ্যমন্ত্ৰী অৰবিন্দ কেজৰিৱাল। আৱকাৰী বিভাগৰ দুৰ্নীতিৰ অভিযোগত দেওবাৰে আম আদমী পাৰ্টীৰ মুখ্য তথা দিল্লীৰ মুখ্যমন্ত্ৰী কেজৰিৱালক সোধপোছৰ বাবে মাতিছিল কেন্দ্ৰীয় তদন্তকাৰী সংস্থা। দেওবাৰে পুৱা ১১ বজাৰ পৰা নিশা ৮ বজালৈ চিবিআইয়ে জেৰা চলাই কেজৰিৱালক। চিবিআইৰ জেৰাৰ পৰা ওলাই দিল্লীৰ নিজা বাসগৃহত এখন সংবাদমেলো আয়োজন কৰে কেজৰিৱালে।
তেওঁ সংবাদমেল যোগে কয়, ‘সততাৰ সৈতে কোনো আপোচ নকৰো। সমগ্ৰ দেশৰ জনতাই মোৰ সৈতে আছে। মোক মুঠ ৫৬ টা প্ৰশ্ন সোধা হৈছিল। ২০২০ চনৰ পৰা কি কি উন্নয়ন কৰিছো সোধা হৈছিল। চিবিআইৰ অফিচাৰসকলেও মোৰ সৈতে সন্মানজনকভাৱেই কথা পাতিছে।’ ইপিনে আৱকাৰী বিভাগৰ দুৰ্নীতিৰ সম্পৰ্কত তেওঁ কয়, ‘আৱকাৰী বিভাগৰ দুৰ্নীতিৰ কথা একেবাৰেই মিছা। এয়া সম্পূৰ্ণৰূপে তেওঁলোকে নিজেই সৃষ্টি কৰি লোৱা এক বিষয়। আমি সৎ। সদায়ে জনতাৰ হৈয়ে কাম কৰিছো।’
সম্প্ৰতি জাতীয় দলত পৰিণত হৈছে আপ। এই সফলতাৰ মাত্ৰ ২টা দিন পাছতেই আৱকাৰী দুৰ্নীতিৰ বিষয়ত কেজৰিৱালক সোধপোছ কৰিছে চিবিআইয়ে। একেই গোচৰত বিগত ২৬ ফেব্ৰুৱাৰীত গ্ৰেপ্তাৰ কৰা হৈছে দিল্লীৰ প্ৰাক্তন উপমুখ্যমন্ত্ৰী মনীষ চিছোডিয়াক। সেইদিনটোও আছিল দেওবাৰেই। আৰু কালিৰ দিনটোত কেজৰীৱালক তলব কৰিছে আৰক্ষীয়ে। কেজৰীৱালক তলব কৰাৰ পাছতেই শংকিতও হৈ পৰিছিল দলটোৰ বিষয়ববীয়াসকল। কেজৰীৱালক তলৱ কৰাৰ পাছতেই চিবিআই কাৰ্যালয়ৰ সন্মুখত আপ নেতাই সাব্যস্ত কৰিছিল প্ৰতিবাদো। তাৰপাছতেই এলেকাটোত জাৰি কৰা হৈছিল ১৪৪ ধাৰা।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
