ক্ৰিকেট খেলিবলৈ আহি চিনেমাৰ জনপ্ৰিয় ভিলেইন হৈ পৰিছিল ৰবীনা টেণ্ডনৰ মামা
ভাৰতীয় চিনেমাত কাম কৰাৰ হেঁপাহ কাৰ নো নাথাকে। পাছে তাৰে মাজতে এনে বহু আছে, যি মুম্বাইলৈ অন্য সপোন লৈ আহে, কিন্তু ভাগ্যই টানি নিয়ে অভিনয় জগতলৈ। তাৰেই মাজৰ এগৰাকী হৈছে ৰবীনা টেণ্ডনৰ মোমায়েক। যিয়ে ক্ৰিকেটাৰ হোৱাৰ সপোনেৰে লক্ষ্নৌৰ পৰা আহিছিল মুম্বাইলৈ।
কিন্তু ক্ৰিকেটাৰ হোৱাৰ সলনি হৈ পৰিছিল ভাৰতীয় ছবি জগতৰ এগৰাকী জনপ্ৰিয় ভিলেইন। যি পাছলৈ নিজৰ নামৰ সলনি এটা বিশেষ চৰিত্ৰৰ নামেৰেহে অধিক জনপ্ৰিয় হৈছিল।
সেই লোকগৰাকীয়ে হৈছে মেক মোহন। যাক বহু লোকেই শ্বোলেৰ ‘চাম্বা’ বুলি জানে। শ্বোলে ছবিত কৰা এটা সৰু চৰিত্ৰৰ জৰিয়তেই বলীউডত খোপনি পোতা মেক মোহনে তেখেতৰ জীৱন কালত ২০০ ৰো অধিক ছবিত কাম কৰিছে।
মুম্বাইলৈ ক্ৰিকেট খেলিবলৈ আহি মাজে মাজে থিয়েটাৰৰ কাম কৰিছিল খৰচ উলিয়াবৰ বাবে। কিন্তু সেই থিয়েটাৰতেই শ্বাবনা আজমীৰ মাতৃ শৌকত কেফীক মেক মোহনৰ অভিনয় ভাল লাগে। আৰু তেখেতেই মেক মোহনক অভিনয়ৰ ফালেই গৈ ভালকৈ কাম কৰিবলৈ কয়।
সেই মতেই অভিনয়ত সোমাই পৰে মেক মোহন। ১৯৬১ চনৰ পৰা ২০১০ লৈ অভিনয় কৰি যায় মেক। কিন্তু কেঞ্চাৰত আক্ৰান্ত হৈ ২০১০ চনত ৭২ বছৰ বয়সত মৃত্যু হয়।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
