সন্দীপ বর্মন
এগৰাকী বাতৰি পঢ়োতাৰ উদ্ভত আচৰণে সৃষ্টি কৰা অপ্ৰীতিকৰ পৰিস্থিতিৰ ঘটনা পোহৰলৈ আহিছে আকাশবাণী গুৱাহাটীত৷ অসমীয়া জাতীয় জীৱনত বৰলুইতৰ দৰেই প্ৰৱাহমান এই গৌৰৱোজ্জ্বল অনুষ্ঠানটোত বিগত সপ্তাহত সংঘটিত হৈছে এই ঘটনা৷ আকাশবাণী গুৱাহাটীৰ বাতৰি পঢ়োতা তথা অনুবাদক(News reader cum translator) প্ৰিয়ব্ৰত হাজৰিকাৰ বিৰুদ্ধে উত্থাপিত হৈছে এই অভিযোগ৷ আকাশবাণী গুৱাহাটীৰ এক সূত্ৰই প্ৰকাশ কৰা অনুসৰি প্ৰায়ে ভুল উচ্চাৰণ, ভুল শব্দৰ প্ৰয়োগ, ভুল বাক্যৰে বাতৰি পৰিৱেশন কৰি আহিছিল হাজৰিকাই৷ আনকি মহামাৰী কোভিড-১৯ নিয়ন্ত্ৰণৰ বাবে কেন্দ্ৰীয় চৰকাৰে দিয়া তলাবন্ধ কাৰ্যসূচীক ‘হেঁপাহৰ লকডাউন’ বুলি উল্লেখ কৰি শ্ৰোতাৰ সমালোচনাৰো সম্মুখীন হৈছিল পঢ়ুৱৈগৰাকী৷ এনেবোৰ ধাৰাবাহিক ভুলৰ বাবেই শেহতীয়াকৈ বিভাগীয় তদন্ত আৰম্ভ হৈছিল প্ৰিয়ব্ৰত হাজৰিকাৰ বিৰুদ্ধে৷ এই তদন্তৰ শেষত হাজৰিকাক শাস্তিমূলক বদলি হিচাপে আন্দামানস্থিত আকাশবাণীৰ প’ৰ্টব্লেয়াৰ কেন্দ্ৰলৈ বদলি কৰা হয়৷ কিন্তু বদলিৰ এই নিৰ্দেশনা লাভ কৰাৰ পাছতো ২২জুলাইত বলপূৰ্বক ষ্টুডিঅ’ত প্ৰৱেশ কৰি বাতৰি পঢ়িবলৈ লয় বিতৰ্কিত হাজৰিকাই৷ কৰ্তৃপক্ষই হাজৰিকাক ষ্টুডিঅ’ৰ পৰা ওলাই আহিবলৈ কোৱাৰ পাছতো জোৰজৱৰদস্তি ষ্টুডিঅ’ৰ ভিতৰতে অভব্য আচৰণ আৰম্ভ কৰে হাজৰিকাই৷ পৰিস্থিতিৰ ক্ৰমাৎ অৱনতি ঘটাত কেন্দ্ৰৰ নিৰাপত্তাৰক্ষীৰ দ্বাৰা নিয়ন্ত্ৰণ কৰিবলগীয়া এই অপ্ৰীতিকৰ পৰিস্থিতিৰ৷ আকাশবাণীৰ সূত্ৰটোৱে প্ৰকাশ কৰা মতে, এই পৰিস্থিতিৰ পাছতেই এতিয়া প’ৰ্টব্লেয়াৰলৈ যাবলৈ মান্তি হৈছে প্ৰিয়ব্ৰত হাজৰিকা৷ যিসময়ত আকাশবাণীৰ শব্দ প্ৰয়োগ, উচ্চাৰণ তথা বাক্যৰ গাঁথনিক এক আদৰ্শ আৰ্হি হিচাপে অসমীয়া সমাজ জীৱনত গ্ৰহণ কৰি অহা হৈছে এনে সময়তেই বাতৰি পঢ়োতাগৰাকীৰ এই কাণ্ডত স্বাভাৱিকতে ভিতৰমহলত সৃষ্টি হৈছে এক অস্বস্তিকৰ পৰিৱেশৰ৷
ইতিমধ্যে অল ইণ্ডিয়া ৰেডিঅ’ গুৱাহাটীয়েও এক স্পষ্টীকৰণত বাতৰি পৰিৱেশকগৰাকীৰ বিৰুদ্ধে দীর্ঘদিন ধৰি উত্থাপিত হৈ অহা অভিযোগৰ সত্যাসত্য স্বীকাৰ কৰিছে। স্পষ্টীকৰণটোত পৰিৱেশকগৰাকীৰ বদলিৰ সৈতে আকাশবাণীৰ আঞ্চলিক বাতৰি বন্ধ কৰা, অসমীয়া ভাষাক এলাগী কৰা অথবা অসমীয়া যুৱক-যুৱতীক এই ৰাজহুৱা মাধ্যমত কাম কৰাৰ পৰা বঞ্চিত কৰা ধৰণৰ কোনো কল্পনাশ্ৰয়ী ‘প্ৰতিষ্ঠানিক নীতি’ সংপৃক্ত হৈ থকা নাই বুলি দোহৰা হৈছে। বৰং অসমীয়াভাষী যুৱক-যুৱতীক বাতৰি বিভাগত নিয়োজিত কৰাৰ বাটহে প্ৰশস্ত কৰা হৈছে আৰু অতীশীঘ্ৰে আকাশবাণী গুৱাহাটীৰ বাতৰি বিভাগত কিছুসংখ্যক দক্ষ, নিপুণ আৰু আপোন মাতৃভাষাটো শুদ্ধকৈ কোৱা আৰু লিখিব পৰা যুৱক-যুৱতীক নিয়োজিত কৰা হ’ব। ইয়াৰ লগতে একাংশ সংবাদ মাধ্যমত বাতৰি পৰিৱেশক হাজৰিকাৰ বদলিক লৈ বিভ্ৰান্তিকৰ বাতৰি প্ৰকাশ হোৱা বুলিও অল ইণ্ডিয়া ৰেডিঅ’ গুৱাহাটী কর্তৃপক্ষই প্ৰতিক্ৰিয়া প্ৰকাশ কৰিছে।
(বর্মনৰ এই অভিমত নিজা। ‘অসম লাইভ ২৪’ এই অভিমতৰ বাবে জগৰীয়া নহয়)
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
