দিল্লীৰ মাটিৰ পৰা আটলাণ্টিক পাৰ হৈ সুদূৰ আমেৰিকাৰ ছান ফ্ৰান্সিছকোৰ উদ্দেশ্যে যাত্ৰা কৰিছিল বিমানখনে৷ ঘড়ীৰ কাঁটাত সময় আগুৱাইছিল৷ এঘণ্টা, দুঘণ্টাকৈ মুঠ আঁঠ ঘণ্টা সময় বাগৰিছিল৷ যাত্ৰীয়ে যেতিয়া মাজআকাশত আটলাণ্টিক পাৰ হৈ আমেৰিকাৰ মাটিত ভৰি দিয়া বুলি ভাৱিছিল তেতিয়াই ঘটিছিল অবিশ্বাস্য ঘটনা৷ মাজ আকাশৰ পৰা ইউটাৰ্ণ লৈ বিমানখন উভতি আহিছিল আকৌ দিল্লীলৈকে৷ দিল্লীৰ আন্তৰ্জাতিক বিমানবন্দৰত লেণ্ডিং কৰিছিল বিমানখনে৷ ৮ঘণ্টাৰ পাছত নিজকে আকৌ দিল্লীত দেখি আচৰিত হৈছিল যাত্ৰীসকলো৷
২৩০জন যাত্ৰী লৈ এয়াৰ ইণ্ডিয়াৰ বোয়িং ৭৭৭-৩০০ ই আৰ বিমানৰ এনে অদ্ভুত প্ৰত্যাবৰ্তনক লৈ বুধবাৰে সামাজিক মাধ্যমত বিভিন্ন পোষ্ট দেখা গৈছে৷ কিয় ৮ঘণ্টাৰ আকাশত ঘূৰি আকৌ দিল্লীলৈ উভতি আহিল ফ্লাইটখন?
কি ঘটিছিল মাজ আকাশত?
এয়াৰ ইণ্ডিয়াৰ তৰফৰ পৰা বিবৃত্তিত জনোৱা হৈছে যে বিমানখনত এক অত্যন্ত জটিল প্ৰযুক্তিগত বিভ্ৰাট বা যান্ত্ৰিক ত্ৰুটি ধৰা পৰিছিল৷ ঠিক কি ধৰণৰ যান্ত্ৰিক ত্ৰুটি সেয়া স্পষ্ট নহয়৷ এভিয়েছন বিশেষজ্ঞসকলে কৈছে যে দুৰণিবটীয়া আন্তৰ্জাতিক উৰাণৰ ক্ষেত্ৰত মাজআকাশত সামান্য ত্ৰুটি দেখা দিলেও সমুদ্ৰৰ ওপৰেৰে যোৱাৰ ৰিস্ক লোৱা নহয়৷ সুৰক্ষাৰ স্বাৰ্থতেই পাইলটে বিমানখন আকৌ ভাৰতৰ প্ৰধান বিমানবন্দৰলৈ উভতাই অনাৰ সিদ্ধান্ত লয়৷ এয়াৰ ইণ্ডিয়াই জনাইছে যে বিমানখনে নিৰাপদে অৱতৰণ কৰিছে আৰু ২৩০ জন যাত্ৰীক বিকল্প বিমানেৰে ছান ফ্ৰান্সিছকো পঠিওৱাৰ ওপৰিও অপেক্ষাৰ সময়খিনি বিশেষ হোটেলত ৰখাৰ ব্যৱস্থা কৰা হয়৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
