অসম লাইভ২৪ঃ ডিজিটেল পেমেণ্টৰ বিভিন্ন মাধ্যমৰ মাজত সকলোতকৈ জনপ্ৰিয় হৈছে ইউপিআই। টকা পঠিওৱা, বজাৰ কৰা, ফোনৰ ৰিচাৰ্জ কৰা কিংবা বিদ্যুতৰ বিল পৰিশোধ কৰা সকলোতেই এতিয়া ইউনিফায়েড পেমেণ্টছ ইণ্টাৰফেছ বা চমুকৈ ইউপিআইৰ মাধ্যমেৰে লেনদেন বাঢ়িছে। নিজৰ ফোনৰ পৰা গ্ৰাহকৰ ফোনৰ ইউপিআই কোড স্কেন কৰি টকা পঠিওৱা প্ৰক্ৰিয়া একেবাৰেই সহজ। অৱশ্যে এই ক্ষেত্ৰত প্ৰতাৰণাৰ সম্ভাৱনাও বেছি। নিৰাপত্তা বৃদ্ধিৰ বাবে ইউপিআই পেমেণ্টৰ ক্ষেত্ৰত কেইবাটাও পৰিবৰ্তন অনাৰ সিদ্ধান্ত লৈছে ভাৰতীয় ৰিজাৰ্ভ বেংকে। ২০২৪ চনৰ ১ জানুৱাৰীৰ পৰাই এই নিয়ম কাৰ্যকৰী হোৱা বুলি জনাইছে ৰিজাৰ্ভ বেংকে।
ইউপিআই পেমেণ্টৰ ক্ষেত্ৰত কি কি পৰিবৰ্তন আহিব?
১) নেশ্ব্যনেল পেমেণ্ট কৰ্পোৰেশ্ব্যন অফ ইণ্ডিয়াই দিয়া নিৰ্দেশনাত কোৱা হৈছে যে, এবছৰ বা তাতোকৈ বেছি সময় ধৰি নিষ্ক্ৰিয় হৈ থকা ইউপিআই আইডিসমূহ ব্লক কৰি দিয়া হ’ব। অৰ্থাৎ ১ জানুৱাৰী ২০২৩ ৰ পৰা সমগ্ৰ বছৰ ধৰি যিসকলৰ গুগল পে, ফোন পে আৰু পেটিএমৰ দৰে ইউপিআই পেমেণ্ট মেথড বন্ধ হৈ আছে তেওঁলোকৰ পুৰণা আইডিসমূহেৰে নতুন বছৰত আৰু কোনো লেনদেন নহ’ব।
২) ইউপিআইৰ মাধ্যমেৰে টকা লেনদেনৰ ঊৰ্ধসীমা বঢ়াই ১ লাখ টকা কৰা হৈছে। যদিও বিগত ডিচেম্বৰ মাহতেই ভাৰতীয় ৰিজাৰ্ভ বেংকে স্বাস্থ্য আৰু পঢ়াশুনাত ইউপিআই ব্যৱহাৰ কৰাৰ বাবে ধনৰ লেনদেনৰ ঊৰ্ধসীমা ১ লাখ টকাৰ পৰা বঢ়াই ৫ লাখ টকা কৰা হৈছে।
৩) ২০০০ বা তাতকৈ অধিক অংকৰ টকাৰ লেনদেনত ১.১ শতাংশ কৰ ধাৰ্য কৰাৰ কথা পূৰ্বেই জনোৱা হৈছিল। প্ৰিপেইড পেমেণ্ট ইনষ্ট্ৰুমেণ্ট বা অনলাইন ৱালেটত টকা লেনদেনো এই বছৰতেই আৰম্ভ হ’ব।
৪) শীঘ্ৰেই ভাৰতীয় ৰিজাৰ্ভ বেংক, দেশজুৰি ইউপিআই এটিএম খোলাৰ সিদ্ধান্ত লোৱা হৈছে। বিশেষ এটিএমসমূহৰ পৰা টকা তুলিবলৈ গ’লে ক্ৰেডিট বা ডেবিট কাৰ্ড নালাগে। ফোনৰ মাধ্যমেৰে কিউআৰ কোড স্কেন কৰি বেংক একাউণ্টৰ পৰা ধন উঠাব পাৰিব।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
