ব্ৰিগেডত শপত ল’লে মুখ্যমন্ত্ৰী শুভেন্দু অধিকাৰীয়ে৷ মুখ্যমন্ত্ৰীক শপতবাক্য পাঠ কৰোৱালে ৰাজ্যপাল আৰ এন ৰবিয়ে৷ শুভেন্দুৰ সৈতে শপতবাক্য পাঠ কৰে দিলীপ ঘোষ, অগ্নিমিত্ৰা পাল, নিশীথ প্ৰামাণিক, ক্ষুজিৰাম টুডু, অশোক কীৰ্তনিয়াই৷ অৱশ্যে এতিয়াও মন্ত্ৰীসকলক দপ্তৰ ভাগ কৰা হোৱা নাই৷
এই মন্ত্ৰিসভাত মহিলা প্ৰতিনিধি হিচাপে আছে অগ্নিমিত্ৰা পাল, উত্তৰবংগৰ প্ৰতিনিধি হিচাপে শপত লৈছে নিশীথ প্ৰামাণিকে৷ আদিবাসী মুখ হিচাপে এই অনুষ্ঠানত আছিল ক্ষুদিৰাম টুডু, মতুয়াসকলৰ প্ৰতিনিধি হিচাপে আছিল অশোক কীৰ্তনিয়া৷ শপতগ্ৰহণ অনুষ্ঠানত গেৰুৱা পাঞ্জাৱীত দেখা গৈছে শুভেন্দুক৷
শুভেন্দু অধিকাৰীৰ শপতগ্ৰহণ অনুষ্ঠানত ২১ ৰাজ্যৰ মুখ্যমন্ত্ৰী আৰু একাধিক ৰাজ্যৰ উপমুখ্যমন্ত্ৰী আৰু কেন্দ্ৰীয় শাসিত অঞ্চলৰ মুখ্যমন্ত্ৰীসহ বহু বিশিষ্ট নেতাও আহিছে৷ শুভেন্দু অধিকাৰী পশ্চিমবংগৰ নৱম মুখ্যমন্ত্ৰী হিচাপে শপতগ্ৰহণ কৰিছে৷
উল্লেখ্য যে শুকুৰবাৰে নিউটাউনত বিজেপিৰ পৰিষদীয় দলৰ সভাত শুভেন্দুকেই পৰিষদীয় দলনেতা হিচাপে বাচি লোৱা হয়৷ সেইদিনা কেন্দ্ৰীয় গৃহমন্ত্ৰী অমিত শ্বাহৰ উপস্থিতিত বিজেপিৰ নিৰ্বাচিত বিধায়কসকলক লৈ পৰিষদীয় দলনেতা হিচাপে শুভেন্দু অধিকাৰীক বাচি লোৱা হয়৷ নন্দীগ্ৰামৰ ওপৰিও ভৱানীপুৰৰ পৰা বিদায়ী মুখ্যমন্ত্ৰী মমতা বেনাৰ্জীক পৰাজিত কৰিছে শুভেন্দু অধিকাৰীয়ে৷ তাৰপিছৰে পৰাই বংগত বিজেপি চৰকাৰৰ প্ৰথম মুখ্যমন্ত্ৰী হিচাপে শুভেন্দু অধিকাৰীৰ নাম চৰ্চালৈ আহে৷
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
