কেদাৰনাথৰ পাছতেই খুলিব অমৰনাথো, ২৯ জুনৰ পৰা আৰম্ভ হ’ব যাত্ৰা, যাত্ৰীয়ে কেনেকৈ কৰিব ৰেজিষ্ট্ৰেছন?

NB NEWS- এই বছৰৰ অমৰনাথ যাত্ৰা আৰম্ভ হ’ব আগন্তুক ২৯ জুনত৷ শ্ৰী অমৰনাথ শ্ৰাইন বৰ্ডে অমৰনাথ যাত্ৰাৰ দিন ঘোষণা কৰিছে৷ ২৯ জুনৰ পৰা আৰম্ভ হ’ব এই বছৰৰ অমৰনাথ যাত্ৰা৷ এই যাত্ৰা চলিব ১৯ আগষ্ট পৰ্যন্ত৷ অৰ্থাৎ মুঠ ৫২ দিন ধৰি অমৰনাথ যাত্ৰা চলিব৷ বিগত ১৫ এপ্ৰিলৰ পৰা আৰম্ভ হৈছে অমৰনাথ যাত্ৰাৰ ৰেজিষ্ট্ৰেছন৷

অমৰনাথ যাত্ৰা

প্ৰতি বছৰে অত্যন্ত কাঢ়া নজৰ আৰু নিৰাপত্তাৰ মাজেতে প্ৰতি বছৰে অমৰনাথ যাত্ৰা চলে৷ দুটি পথেৰে অমৰনাথলৈ যাব পাৰি৷ এটা পথ হৈছে অনন্তনাগ জিলাৰ মাজেৰে আৰু আনটো পথ পহেলগাওঁৰ মাজেৰে৷ মুঠ ৪৮ কিঃমিঃ জোৰা দীৰ্ঘ এই পথ বেছি দীঘল হ’লেও এই পথ কিন্তু তুলনামূলকভাৱে যাত্ৰাৰ বাবে সহজ৷ অন্য এটা পথ হৈছে গান্দাৰবাল জিলাৰ মাজেৰে বালতাল হৈ৷ ১৪ কিঃমিঃ দীৰ্ঘ এই পথ কিন্তু কিছু কণ্টকময়৷ ভৌগোলিক কাৰণতেই সমগ্ৰ বছৰৰ মাজত কেইটামান দিনহে অমৰনাথ গুহাত ভক্তই প্ৰৱেশ কৰিব পাৰে৷

অমৰনাথ গুহাৰ অৱস্থান

অমৰনাথৰ পবিত্ৰ গুহা কাশ্মীৰৰ ৰাজধানী শ্ৰীনগৰৰ পৰা ১৪১ কিঃমিঃ দূৰত্বত অৱস্থিত লাদাৰ উপত্যকাত৷ সমুদ্ৰতলৰ পৰা ১২,৭৫৬ ফুট উচ্চতাত এই অমৰনাথ গুহা অৱস্থিত৷ সমুদ্ৰতলৰ পৰা ইমান ওপৰত অৱস্থিত হোৱাৰ বাবেই বছৰৰ বেছিভাগ সময়ে হিমবাহ আৰু বৰফেৰে ঢকা থাকে এই গুহা৷

সৰ্বস্ব ত্যাগ কৰি অমৰনাথত উপস্থিত হৈছিল শিৱ

পুৰাণত উল্লেখ থকা অনুসৰি পাৰ্বতীক অমৰত্বৰ জ্ঞান প্ৰদান কৰাৰ উদ্দেশ্যে শিৱই পাৰ্বতীক লৈ এই গোপন স্থানলৈ আহিছিল৷ গভীৰভাৱে ধ্যানমগ্ন হোৱাৰ বাবে মহাদেৱে কৈলাশ পৰ্বত ত্যাগ কৰি অমৰনাথৰ উদ্দেশ্যে যাত্ৰা কৰিছিল৷ প্ৰচলিত বিশ্বাস অনুসৰি এই স্থানত উপস্থিত হ’বলৈকে শিৱই তেওঁৰ সমস্ত কিছু পৰিত্যাগ কৰিছিল৷ অমৰনাথৰ পথত মহাদেৱে তেওঁৰ বাহন ষাঁড় নন্দীক পহেলগাওঁত ত্যাগ কৰে৷ তাৰপিছতেই তেওঁৰ মূৰত স্থান পোৱা চন্দ্ৰক ত্যাগ কৰে চন্দনৱাৰিত, ডিঙিত থকা সাপ ত্যাগ কৰে শেষনাগ হৃদত৷ ইয়াৰ পাছতেই মহাগণেশ পৰ্বতত তেওঁৰ পুত্ৰক থৈ আহে৷ ইয়াৰোপৰি বায়ু, অগ্নি, পানী আৰু মৃত্তিকাক পঞ্জতৰ্ণীত ত্যাগ কৰে৷ সৰ্বস্ব ত্যাগ কৰি তেওঁ অমৰনাথ গুহাত প্ৰৱেশ কৰি দেৱী পাৰ্বতীক জীৱন আৰু অমৰত্বৰ অৰ্থ বুজোৱাত ব্যস্ত হৈ পৰে মহাদেৱ৷

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ