চিকিৎসকৰ পাছত এইবাৰ নাৰ্চ, অগ্নিগৰ্ভা কলকাতাত পুনৰ নিৰ্লজ্জ কাণ্ড
কি হৈছে কলকাতাত, এইবাৰ চিকিৎসকৰ পাছত এগৰাকী নাৰ্চ। এফালে নাৰী সুৰক্ষাৰ বাবে ৰাজ্যখনৰ প্ৰান্তে প্ৰান্তে আন্দোলন-প্ৰতিবাদ চলি থকাৰ সময়তে আনফালে পুনৰ এগৰাকী নাৰ্চৰ সৈতে নিৰ্লজ্জ কাণ্ড। মহিলা চিকিৎসকৰ ধৰ্ষণ আৰু হত্যাৰ ঘটনা শান্ত নহওতেই পুনৰ হাস্পতালৰ ভিতৰতে এগৰাকী নাৰ্চক নিৰ্যাতনৰ অভিযোগ।
ঘটনা সন্দৰ্ভত জানিব পৰা অনুসৰি, ৩১ আগষ্ট শনিবাৰে নিশা বীৰভূমৰ ইলামবাজাৰ স্বাস্থ্য কেন্দ্ৰত এনে এটা ঘটনা পোহৰলৈ আহে। ইয়াত এগৰাকী ৰোগীয়ে কৰ্তব্যৰত অৱস্থাত এগৰাকী নাৰ্ছক নিৰ্যাতন চলোৱাৰ অভিযোগ উত্থাপন হৈছে। অনুপযুক্ত স্পৰ্শৰ অভিযোগ নাৰ্চৰ।
তথ্য অনুসৰি এজন ৰোগীক চিকিৎসাৰ বাবে স্বাস্থ্যকেন্দ্ৰলৈ অনা হয়। চেলাইন প্ৰয়োগ কৰাৰ সময়ত নাৰ্ছগৰাকীক অনুচিতভাৱে স্পৰ্শ কৰাৰ অভিযোগ তেওঁৰ বিৰুদ্ধে। নাৰ্ছগৰাকীয়ে তেওঁৰ অভিযোগত কয় যে ৰোগীজনক জৰুৰীকালীন বিভাগলৈ অনা হৈছিল আৰু তাতেই তেওঁক কৰ্তব্যত ৰখা হৈছিল। এই সময়ছোৱাত ৰোগীয়ে তেওঁক নিৰ্যাতন চলাইছিল। নাৰ্চে কয় যে এই সময়ছোৱাত ৰোগীৰ পৰিয়ালৰ কিছু সদস্যও তাত উপস্থিত আছিল।
নাৰ্ছগৰাকীয়ে কয় যে ৰোগীগৰাকীয়ে তেওঁৰ ব্যক্তিগত অংগসমূহ অনুচিতভাৱে স্পৰ্শ কৰিছিল আৰু লগতে তেওঁক নিৰ্যাতন চলাইছিল। নিৰাপত্তাৰ অভাৱৰ বাবেই এনে ঘটনা সংঘটিত হয় বুলি উল্লেখ কৰে নাৰ্ছগৰাকীয়ে। অন্যথা এজন ৰোগীয়ে পৰিয়ালৰ সদস্যৰ সান্নিধ্যত এনে কাম কৰিব নোৱাৰে।
এই ঘটনাই স্বাস্থ্যকেন্দ্ৰত উত্তেজনাৰ সৃষ্টি কৰাত চিকিৎসালয় কৰ্তৃপক্ষই আৰক্ষীক ফোন কৰে। বিষয়াসকলে সেই স্থানত উপস্থিত হৈ অভিযুক্ত ৰোগীজনক গ্ৰেপ্তাৰ কৰে। নাৰ্চগৰাকীয়ে এই সন্দৰ্ভত কয় যে, ‘পূৰ্বৰে পৰা আমি সকলো শংকাত ভুগি আছো, তাতে আৰু এনে পৰিস্থিতি। এনে ধৰণৰ পৰিস্থিতিৰ বাবে কাম কৰা কঠিন হৈ পৰে।’
উল্লেখ্য যে, ৯ আগষ্টত আৰ জি কাৰ মেডিকেল কলেজ এণ্ড হস্পিতালত এগৰাকী চিকিৎসকক ধৰ্ষণ কৰি হত্যা কৰা হৈছিল। এই গোচৰৰ পিছত সমগ্ৰ দেশৰ বহু বৃহৎ চিকিৎসালয়ত ধৰ্মঘট হয়। ইয়াৰ পিছত চিকিৎসালয়ত কৰ্তব্যৰত অৱস্থাত মহিলা চিকিৎসকৰ সুৰক্ষা সন্দৰ্ভত বহু প্ৰশ্ন উত্থাপন হৈছে। এই গোচৰৰ পিছতে সমগ্ৰ দেশৰ চিকিৎসালয়ত মহিলা কৰ্মচাৰীক নিৰ্যাতনৰ বহু ঘটনা পোহৰলৈ আহে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
