অসম লাইভ২৪ঃ ৰাজনীতিবিদ মানেই ব্যস্ততাপূৰ্ণ দৌৰ নতুবা কেৱল মাইকৰ সন্মুখত একোটা দিঘলীয়া ভাষণেই নহয়। ৰাজনীতিবিদৰ সংজ্ঞা সলনি কৰি ভূপেন বৰাই লিখিছে এটাৰ পাছত আনটো কবিতা। অৰিয়াঅৰি, খং ইত্যাদি আঁতৰাই কবিতাই বিৰোধীক প্ৰত্যুত্ত্বৰ দিয়া আৰম্ভ কৰিছে অসম প্ৰদেশ কংগ্ৰেছ কমিটিৰ সভাপতি ভূপেন বৰাই। নতুন কবিতাটোত ভূপেন বৰাই লিখিছে-
হয়, মই শিল-বালিৰ স’তে খোজ কাঢ়িছোঁ!
মই কেৱল পদব্ৰজে অহা নাই, চুঁচৰি ফুৰিছোঁ।
আঁঠুকাঢ়ি সেৱা কৰি মাতৃভূমিৰ চৰণ চুমিছোঁ৷
সত্ৰ, নামঘৰ, গুৰুদ্ধাৰ, মছজিদ, গীর্জা, মন্দিৰত
তীৰ্থ স্নান কৰি মই তপস্যাত বহিছোঁ।
মই শংকৰ-আজান-চ্যুকাফা-চিলাৰায়, গান্ধী-নেতাজীৰ
বাণীও কাণ থিয় কৰি শুনিবলৈ চেষ্টা কৰিছোঁ।
হয়, মই শিল-বালিৰ স’তে খোজ কাঢ়িছো…
পদাতিকৰ খোজৰ পথৰ ধূলি ওপৰলৈ উৰি
মোৰ শিৰত পৰাও দেখিছোঁ,
সেই পদধূলিৰেই মই কঁপালৰ তিলক আঁকিছোঁ।
শিলৰ গুড়িবোৰ আছুতীয়াকৈ থৈ
সমন্বয়ৰ সেঁতু গঢ়িবলৈ খনিকৰ বিচাৰি ফুৰিছোঁ।
মই ধুবুৰীৰ পৰা শদিয়ালৈ গৈ আছো,
নানা ৰঙৰ মণি-মুকুতা বুটলি
মাতৃৰ বাবে গহনা সজাৰ প্ৰস্তুতি কৰিছোঁ।
জাতি, জনজাতি, উপজাতিৰ তেজৰ ৰং,
হাঁহি আৰু কান্দোনৰ সাদৃশ্য দেখিছোঁ।
পকা ধাননিৰ মাজত সোমাই
নবৌৰ কাঁচিখনতো সান দিছোঁ।
মই বাগৰুম্বা নাচিবলৈ শিকিছোঁ,
ঝুমুৰৰ পাকত ঘূৰিছোঁ,
আইদেউক লগ পাই চলচিত্ৰৰ বুৰঞ্জী পঢ়িছোঁ।
মই কাৰ্বিক কাদম, মিছিঙক কুমনাং, ডিমাচাক যুঠাই
দেউৰীক আগঞ্জুমা, নেপালীক নমস্তে, আদিবাসীক জহাৰ
তিৱাক চেৱা ক’বলৈ শিকিছোঁ।
ব্ৰহ্মপুত্ৰ আৰু বৰাকৰ খহনীয়াৰ প্ৰকোপ একেই দেখিছোঁ,
মই কেঁচা পাত ছিঙোতে চাহৰ সুগন্ধ পাইছোঁ।
ছাই আৰু সাঁজেৰে সজোৱা বানবাটিত ওঁঠ লগাই
পৰম্পৰাৰ বুনিয়াদ সুদৃঢ় কৰিছোঁ।
ধৰিবও নোৱৰা, এৰিবও নোৱৰা
আঁঠুৱাৰ ভিতৰৰ মহটো ময়ো দেখিছোঁ,
আঁঠুৱাৰ বাহিৰত বহি মই উজাগৰী নিশা কটাইছোঁ,
খল-নায়কক নায়ক সজাবলৈ চলা ষড়যন্ত্র
ফাদিল কৰাৰ মই আজি পণ লৈছোঁ।
সৰ্বানন্দ সিংহ, ৰাঘৱ মৰাণৰ পদূলিৰে পাৰ হৈ
কৃষ্ণৰ পদৰেণুৰে ধূসৰিত শদিয়াৰ পৰা
প্ৰগতিৰ জখলা সজাৰ মানস কৰিছোঁ।
হয়, মই শিল-বালিৰ স’তে খোজ কাঢ়িছোঁ…
-ভূপেন কুমাৰ বৰা ৯ ডিচেম্বৰ, ডিমৌ, শিৱসাগৰ
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
