বিশিষ্ট সংগীত পৰিচালক তথা কণ্ঠশিল্পী এ আৰ ৰহমানৰ পুত্ৰ আৰু প্লেবেক ছিংগাৰ এ আৰ আমিন আজি চেন্নাইৰ গিণ্ডি অঞ্চলত এক পথ দুৰ্ঘটনাৰ সন্মুখীন হয়। আৰক্ষীৰ তথ্য অনুসৰি, অলিম্পিয়া টেক পাৰ্ক ছিগনেলৰ সমীপত এই দুৰ্ঘটনা সংঘটিত হয়। এখন ৱাগন-আৰ আৰু আমিনৰ প’ৰ্চে বাহনৰ সৈতে সংঘৰ্ষ হয়। এই সংঘৰ্ষৰ সময়ত এ আৰ আমিন এজন বন্ধুৰ সৈতে যাত্ৰা কৰি আছিল। দুৰ্ঘটনাটোত আমিন আৰু তেওঁৰ বন্ধুৱে সামান্য আঘাত পায়। দুয়োকে চিকিৎসাৰ বাবে চিকিৎসালয়লৈ লৈ যোৱা হয় আৰু প্ৰাথমিক চিকিৎসাৰ পাছত তেওঁলোকক চিকিৎসালয়ৰ পৰা ঘৰলৈ যাবলৈ দিয়া হয়। ঘটনাটোৰ প্ৰকৃত কাৰণ জানিবলৈ আৰক্ষীয়ে তদন্ত আৰম্ভ কৰিছে।
দুৰ্ঘটনাৰ খবৰ বিয়পি পৰাৰ পাছত অনুৰাগীসকলৰ মাজত এ আৰ আমিনৰ স্বাস্থ্যক লৈ উদ্বেগ সৃষ্টি হয়। ইয়াৰ পাছতে তেওঁৰ ভগ্নী খতিজা ৰহমানে ছ’চিয়েল মিডিয়াৰ জৰিয়তে আমিনৰ স্বাস্থ্যৰ বিষয়ে অৱগত কৰে। খতিজাই ইনষ্টাগ্ৰাম ষ্ট’ৰীত অনুৰাগীসকলক তেওঁলোকৰ চিন্তা আৰু শুভকামনাৰ বাবে ধন্যবাদ জনাই কয় যে আমিন এতিয়া সুস্থ আছে। সকলোকে পৃথকে পৃথকে উত্তৰ দিব নোৱাৰাৰ বাবেও তেওঁ ক্ষমা বিচাৰে। অৱশ্যে এতিয়ালৈকে এ আৰ ৰহমান বা এ আৰ আমিনে নিজে এই দুৰ্ঘটনাৰ সন্দৰ্ভত কোনো আনুষ্ঠানিক মন্তব্য কৰা নাই।
এ আৰ আমিন এগৰাকী প্ৰতিভাৱান প্লেবেক ছিংগাৰ হিচাপে ইতিমধ্যে নিজৰ পৰিচয় গঢ়ি তুলিছে। নিজৰ স্বতন্ত্ৰ সংগীত প্ৰকল্পতো আমিনে কাম কৰি আছে। শেহতীয়াকৈ তেওঁ ৰাম চৰণ অভিনীত ছবি ‘পেদ্দি’ৰ জনপ্ৰিয় গান ‘চিকিৰি চিকিৰি’ৰ তামিল সংস্কৰণত কণ্ঠদান কৰিছে। ইয়াৰ উপৰি জাছলিন ৰয়েলৰ সৈতে তেওঁ ‘ভীগি ভীগি’ নামৰ এটা স্বতন্ত্ৰ ট্ৰেকতো কাম কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
