চামগুৰিত বিদ্যুত বিভাগৰ আজৱ কাণ্ড। ১৫বছৰৰ আগতেই মৃত্যু হোৱা এগৰাকী মহিলাৰ নামত বিদ্যুত বিভাগৰ পৰা আহিল প্ৰায় ১০ হাজাৰ টকাৰ বিল পৰিশোধ কৰিবলৈ দিয়াৰ এখন চমন। এই আজৱ ঘটনা সংঘটিত হৈছে চামগুৰিৰ গেন্ধালী আদৰ্শ গাঁৱত।
১৫বছৰৰ আগতেই মৃত্যু হোৱা মহিলা গৰাকীৰ নাম প্ৰমীলা দাস। মৃত মহিলাগৰাকীৰ মৃত্যুৰ পাছত তেঁওৰ জীয়ৰী ৰেনুমাই দাসে পৰিশোধ কৰি আহিছিল বিল। পাঁচ বছৰ পূৰ্বে মৃত্যু হৈছে মৃত প্ৰমীলা দাসৰ জীয়ৰি ৰেনুমাই দাসৰো। ৰেনুমাই দাসৰ মৃত্যুৰ পাছতেই পৰিয়ালটোত আৰু কোনো নথকাৰ বাবেই বিদ্যুত বিভাগৰ ফালৰ পৰা মহিলা গৰাকীৰ ঘৰৰ বৈদ্যুতিক সংযোগ সম্পূৰ্ণৰূপে বিচ্ছিন্ন কৰা হৈছিল।
ঘৰৰ বিদ্যুতৰ মিটাৰ জৰাজীৰ্ণ অৱস্থা। নাই কোনো বৈদ্যুতিক সংযোগ। আৰ্চয্যজনকভাৱে এতিয়া বিগত বহু বছৰৰ পাছত কাষৰে প্ৰতিবেশীৰ বাসগৃহলৈ মৃত মহিলাগৰাকীৰ নামত বিদ্যুত বিভাগে প্ৰেৰণ কৰিছে এখন চমন। চমনখনত উল্লেখিত প্ৰায় ১০হাজাৰ টকাৰ বিল পৰিশোধ কৰিবলৈ প্ৰতিবেশীৰ পৰিয়ালটোক হাৰাশাস্তি বিদ্যুত বিভাগৰ কৰ্মচাৰীৰ।
অতি সোনকালে বিদ্যুতৰ মাছুল পৰিশোধ নকৰিলে প্ৰতিবশী ঘৰৰ বৈদ্যুতিক সংযোগ কৰ্তন কৰিব বুলি ভয়-ভাবুকি প্ৰদান কৰা বুলি বিদ্যুত বিভাগৰ বিৰুদ্ধে অভিযোগ পৰিয়ালটোৰ। বিদ্যুত বিভাগৰ এনে কাণ্ড-জ্ঞানহীনতাৰ আজৱ কাণ্ড দেখি হতবাক স্থানীয় ৰাইজ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
