এদিন দুদিনকৈ ২৫টা দিন বাগৰিল৷ আজিও ৰাজ্যজুৰি সকলোৱে জুবিন গাৰ্গৰ ন্যায় বিচাৰি লিখিব লগা হৈছে #justiceforZubeenGarg, জুবিন গাৰ্গৰ বাবে এনেদৰে ন্যায় বিচাৰিবলগীয়া হোৱাটো খুবেই দুখঃজনক বিষয় বুলিও সচেতন নাগৰিকে মন্তব্য কৰিছে৷ ইতিমধ্যে জুবিন পত্নী গৰিমা গাৰ্গেও দেওবাৰে নিশা সামাজিক মাধ্যমত খুবেই দুখেৰে লিখিছে- ‘আৰু ১০ দিন আমি ন্যায়ৰ বাবে অপেক্ষা কৰিম৷ ১০ দিনৰ ভিতৰত আমি ন্যায় পাব লাগিব৷ জুবিন গাৰ্গে ন্যায় পাব লাগিব৷’
জুবিন গাৰ্গৰ সমাধিতো দেওবাৰে নিশা শ শ মানুহ উপস্থিত হৈ জুবিন গাৰ্গৰ ন্যায় বিচাৰি আন্দোলন সদৃশ পৰিবেশ গঢ়ি তুলিছে৷ সকলোৰে এটাই দাবী, কথাটো একদম সাধাৰণ৷ অসমৰ মানুহে কেৱল এটা কথাই জানিব খুজিছে, ছিংগাপুৰত সেইদিনা কি হৈছিল? কেনেকৈ জুবিন গাৰ্গৰ মৃত্যু হ’ল৷ সঁচা তথ্য কেৱল জানিব বিচাৰিছে অসমৰ জনতাই৷ সেই সাধাৰণ কথাটোক কিয় ইমান মেৰপেছ দি থকা হৈছে সেই কথা জানিব খুজিছে অসমৰ জনতাই৷
দেওবাৰে নিশা সমাধিক্ষেত্ৰৰ পৰা জুবিন গাৰ্গৰ ন্যায় বিচাৰি ওলাই অহা যুৱকৰ স্পষ্ট মত, ‘জুবিন গাৰ্গক আমি ঘূৰাই নাপাও৷ কিন্তু জুবিন গাৰ্গৰ মৃত্যু কেনেকৈ হ’ল সেই তথ্য আমাক লাগে৷ মুখ্যমন্ত্ৰীয়ে ২৬ত পুনৰ বিজেপি চৰকাৰ আহিলে ফ্ৰি মিঠাতেল দিয়াৰ কথা কৈছিল৷ আমাক সেই মিঠাতেল নালাগে৷ আমাৰ মাটি আছে সৰিয়হ খেতি কৰি আমি মিঠাতেল নিজেই উলিয়াই লম৷ আমাক কেৱল জুবিন গাৰ্গৰ ন্যায় লাগে৷ জুবিন গাৰ্গৰ ন্যায় দিব নোৱাৰিলে ৰাইজে আপোনাক কেতিয়াও ক্ষমা কৰিব নোৱাৰিব৷ অসমৰ মানুহক মিঠাতেলৰ প্ৰয়োজন নাই৷ আমাৰ এটাই অনুৰোধ জুবিন গাৰ্গৰ হত্যাকাৰীয়ে উচিত শাস্তি পাব লাগিব৷ আমাক চৰকাৰ নালাগে৷ কংগ্ৰেছ বিজেপি আমাৰ মতলব নাই আমাক জুবিন দাৰ ন্যায় লাগে৷ জুবিন গাৰ্গ সকলোতকৈ ঊৰ্ধত তেওঁক ন্যায় নিদিয়ালৈকে আমি ক্ষান্ত নহও৷ জুবিন দা অমৰ হওক৷’
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
