উপ-নিৰ্বাচন, কংগ্ৰেছৰ প্ৰাৰ্থী তালিকা প্ৰকাশ, বিজেপিৰ কোন কোন…!
ৰাজ্যত উপ-নিৰ্বাচন সমাগত। অহা নৱেম্বৰ মাহৰ ১৩ তাৰিখে অসমত অনুষ্ঠিত হব উপ-নিৰ্বাচন। অসমৰ চামগুৰি, ধলাই, বঙাইগাঁও, বিহালী আৰু ছিদলী সমষ্টিত অনুষ্ঠিত হ’ব উপ-নিৰ্বাচন।
সেই উদ্দেশ্যে ইতিমধ্যে বিজেপিয়ে ঘোষণা কৰিছে দলটোৰ প্ৰাৰ্থী তালিকা। দেওবাৰে সকলো জল্পনা-কল্পনাৰ ওৰ পেলাই অসম প্ৰদেশ কংগ্ৰেছ কমিটীয়ে ঘোষণা কৰিলে দলটোৰ প্ৰাৰ্থী তালিকা।
ৰাজ্যৰ ৫টা সমষ্টিত অনুষ্ঠিত হ’ব উপ-নিৰ্বাচন। কিন্তু, দেওবাৰে ৪টা সমষ্টিৰ বাবে কংগ্ৰেছে ঘোষণা কৰিলে প্ৰাৰ্থীৰ নাম।
চামগুৰিত তানজিল হুছেইনক প্ৰাৰ্থিত্ব প্ৰদান কৰিছে কংগ্ৰেছে। সাংসদ ৰকিবুল হুছেইনৰ পুত্ৰ তানজিল হুছেইন।
একেদৰে, বঙাইগাঁও সমষ্টিত প্ৰাৰ্থিত্ব দিয়া হৈছে ব্ৰজেনজিৎ সিনহাক। প্ৰাক্তন আৰক্ষী বিষয়া সিনহাই কিছুমাহপূৰ্বে যোগদান কৰিছিল ভাৰতীয় জাতীয় কংগ্ৰেছত। একেদৰে, ধলাইত ধ্ৰুৱজ্যোতি পুৰকায়স্থক প্ৰাৰ্থিত্ব প্ৰদান কৰিলে কংগ্ৰেছে। আৰু ছিদলী সমষ্টিৰ দলীয় টিকট প্ৰদান কৰা হৈছে সঞ্জীৱ ৱাৰীক।
পাছে দেওবাৰে ঘোষণা নহ’ল বিহালী সমষ্টিৰ প্ৰাৰ্থীৰ নাম। বিহালী সমষ্টিত কোন হ’ব বিৰোধী দলৰ প্ৰাৰ্থী? এই বিষয়টোক লৈ অব্যাহত আছে চৰ্চা। ইতিমধ্যে, বিহালী সমষ্টিৰ প্ৰাৰ্থিত্বক কেন্দ্ৰ কৰি ‘অসম সন্মিলিত মৰ্চা’ত সৃষ্টি হৈছে মতানৈক্য।
আনহাতে বিজেপিৰ ফালৰ পৰা ঘোষণা প্ৰাৰ্থী সকল হৈছে- চামগুৰিৰ পৰা ডিপ্লু ৰঞ্জন শৰ্মা, নিহাৰ ৰঞ্জন দাস ধলাই সমষ্টি , দিগন্ত ঘাটোৱাৰ বিহালী সমষ্টিৰ পৰা। আনহাতে বঙাইগাঁও আৰু ছিদলী সমষ্টিৰ পৰা বিজেপিয়ে প্ৰাৰ্থী দিয়া নাই, এই দুটা সমষ্টিত বিজেপিৰ মিত্ৰ দল এজিপি আৰু ইউ পি পি এলৰ পৰা প্ৰাৰ্থী দিয়া হব।
বৰ্তমানে বঙাইগাঁৱৰ পৰা এজিপিৰ নেতা ফণী ভূষণ চৌধুৰিৰ পত্নী দিপ্তীময়ী চৌধুৰীক টিকক দিয়াৰ সম্ভাৱনা। ছিদলি সমষ্টিৰ পৰা এতিয়ালৈকে কোনো ঠাৱৰ হোৱা নাই ইউ পি পি এলৰ ফালৰ পৰা ।
উল্লেখ্য যে, ২৩ নৱেম্বৰ তাৰিখে নিৰ্বাচনৰ ভোটগণনা তথা ফলাফল ঘোষণা কৰা হ’ব। মনোনয়ন দাখিলৰ অন্তিম তাৰিখ ২৫ অক্টোবৰ।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
