ভাৰতীয় এনিমেছন ছবি জগতলৈ সুখবৰ। ইতিমধ্যে বহু চুটি ছবিৰ জৰিয়তে অসমলৈ গৌৰৱ কঢ়িয়াই আনিছে ড° পাৰ্থসাৰথি মহন্তই। এইবাৰ তেওঁৰ কাহিনী আৰু পৰিচালনাত নিৰ্মিত এনিমেটেড চুটি ছবি ‘ছিমি’এ ‘এথেন্স মাৰাথন ফিল্ম এৱাৰ্ডছ’ত শ্ৰেষ্ঠ চুটি ছবি শাখাত ‘অনাৰেব’ল মেনশ্যন’ (Honourable Mention) সন্মান লাভ কৰি আন এক খ্যাতি অৰ্জন কৰিছে।
এই সন্মানে এনিমেটেড চুটি ছবি জগতত “ছিমি”ৰ গৌৰৱময় যাত্ৰাক অধিক শক্তিশালী কৰি তুলিছে। ইতিমধ্যে ছবিখনে আন্তঃৰাষ্ট্ৰীয় পৰ্যায়তো যথেষ্ট সমাদৰ লাভ কৰিছে। ইয়াৰ পূৰ্বে এই চুটি ছবিখনে জয়পুৰ আন্তঃৰাষ্ট্ৰীয় চলচ্চিত্ৰ মহোৎসৱত শ্ৰেষ্ঠ চুটি ছবিৰ বঁটা লাভ কৰাৰ লগতে নিউয়ৰ্ক শ্বৰ্ট এনিমেছন ফেষ্টিভেলতো শ্ৰেষ্ঠ চুটি ছবি হিচাপে সন্মানিত হৈছিল। এনিমেটেড চুটি ছবিখনৰ এই সফলতাই অসমৰ পৰা নিৰ্মিত এক ব্যতিক্ৰমী শিল্পকৰ্মক বিশ্বজুৰি বিশেষ স্বীকৃতি প্ৰদান কৰিছে।
“ছিমি” হৈছে এখন এনিমেটেড চুটি ছবি, য’ত কাহিনী উপস্থাপনৰ কৌশল, অনুভূতি আৰু শিল্পসুলভ কল্পনাৰ এক সন্মোহিনী সমন্বয় পৰিলক্ষিত হয়। ড° পাৰ্থসাৰথি মহন্তৰ কাহিনী, চিত্ৰনাট্য আৰু পৰিচালনাত নিৰ্মিত ছবিখনে এনিমেছনক এক শক্তিশালী মাধ্যম হিচাপে প্ৰতিষ্ঠা কৰিছে । ইয়াৰ জৰিয়তে ভৌগোলিক আৰু সাংস্কৃতিক পৰিসীমা অতিক্ৰম কৰি গভীৰ মানৱীয় কাহিনী উপস্থাপন কৰিছে।
এই চুটি ছবিখনৰ প্ৰযোজনা কৰিছে মীনা মহন্ত আৰু ইন্দ্ৰাণী বৰুৱাই। তেওঁলোকৰ উৎসাহ , সহযোগিতা তথা সৃষ্টিশীল চিন্তাধাৰাৰ ফলশ্ৰুতিতে ‘ছিমি’ আন্তঃৰাষ্ট্ৰীয় মঞ্চত এখন সমাদৃত আৰু সফল চলচ্চিত্ৰ হিচাপে জিলিকি উঠিছে।
এই আন্তৰ্জাতিক স্বীকৃতি সন্দৰ্ভত ‘ছিমি’ৰ পৰিচালক ড° পাৰ্থসাৰথি মহন্তই দৰ্শক, বিচাৰক আৰু ছবিখনৰ সৈতে জড়িত কলা- কুশলী সকললৈ আন্তৰিক কৃতজ্ঞতা জ্ঞাপন কৰিছে। তেওঁ কয় যে, এনে সন্মানে এই চৌদিশে সৃষ্টি হোৱা অৰ্থপূৰ্ণ কাহিনীৰ প্ৰতি বিশ্বব্যাপী আগ্ৰহ আৰু সমাদৰ বৃদ্ধি পোৱাৰ দিশটো পুনৰ নিশ্চিত কৰিছে আৰু চলচ্চিত্ৰ নিৰ্মাতাসকলক নতুন নতুন সৃষ্টিৰ অন্বেষণ কৰিবলৈ উৎসাহিত কৰিছে।
আন্তঃৰাষ্ট্ৰীয় চলচ্চিত্ৰ মহোৎসৱসমূহত “ছিমি”ৰ ধাৰাবাহিক সফলতা কেৱল ছবি নিৰ্মাতাৰ বাবেই নহয়, অসমৰ সৃষ্টিশীল সমাজখনৰ বাবেও গৌৰৱৰ বিষয়। ইয়াৰ জৰিয়তে আঞ্চলিক প্ৰতিভাই নিজৰ মৌলিকতা, সত্যতা আৰু শিল্পগুণৰ বলত বিশ্বমঞ্চত প্ৰতিযোগিতাত নামি সফলতা লাভ কৰাৰ অসীম সম্ভাৱনা প্ৰতিফলিত হৈছে।
ভাৰত, আমেৰিকা যুক্তৰাষ্ট্ৰ আৰু এতিয়া গ্ৰীচত লাভ কৰা সন্মানৰ ধাৰাবাহিকতাৰে “ছিমি”এ আন্তঃৰাষ্ট্ৰীয় চলচ্চিত্ৰ মহোৎসৱসমূহত নিজৰ অনুপ্ৰেৰণাদায়ক যাত্ৰা অব্যাহত ৰাখিছে আৰু লগত কঢ়িয়াই লৈ ফুৰিছে অসমৰ কণ্ঠস্বৰ, কল্পনাশক্তি আৰু কাহিনী এটাক প্ৰক্ষেপ কৰাৰ কৌশল ।
উল্লেখ্য যে, ইয়াৰ পূৰ্বে এই চুটি ছবিখনে জয়পুৰ আন্তঃৰাষ্ট্ৰীয় চলচ্চিত্ৰ মহোৎসৱত শ্ৰেষ্ঠ চুটি ছবি হিচাপে আৰু নিউয়ৰ্ক শ্বৰ্ট এনিমেছন ফেষ্টিভেলত শ্ৰেষ্ঠ চুটি ছবি হিচাপে সন্মান লাভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
