চৰকাৰে অটোৰিক্সাৰ ভাড়া সংশোধন কৰি নতুন হাৰ নিৰ্ধাৰণ কৰিছে। এই নতুন নিয়ম অনুসৰি, প্ৰথম ১.৮ কিলোমিটাৰ যাত্ৰাৰ বাবে যাত্ৰীয়ে নূন্যতম ৫০ টকা ভাড়া দিব লাগিব। ইয়াৰ পিছত প্ৰতি কিলোমিটাৰৰ বাবে ভাড়া হ’ব ২৫ টকা। তামিলনাডু চৰকাৰে অটোৰিক্সাৰ বাবে নিৰ্ধাৰণ কৰিছে এই নতুন নিৰিখ। যদি আপুনি চেন্নাই বা তামিলনাডুৰ আন কোনো চহৰলৈ যোৱাৰ পৰিকল্পনা কৰিছে, তেন্তে অটোৰিক্সাৰ ভাড়াৰ এই নতুন নিয়মৰ বিষয়ে জানি লোৱাটো আপোনাৰ বাবে জৰুৰী।
কেৱল সেয়াই নহয়, অটো ৰৈ থাকিলে অপেক্ষাৰ সময়ৰ বাবেও যাত্ৰীয়ে অতিৰিক্ত ধন দিব লাগিব। নতুন নিৰ্ধাৰিত হাৰ অনুসৰি, অপেক্ষাৰ বাবে প্ৰতি মিনিটত এক টকাকৈ দিব লাগিব। আনহাতে, নিশাৰ সময়ত অটোৰিক্সাত যাত্ৰা কৰিলে সাধাৰণ ভাড়াতকৈ ৫০ শতাংশ অধিক ধন ভৰিব লাগিব।
তামিলনাডু চৰকাৰে চেন্নাই মহানগৰ এলেকাৰ লগতে ৰাজ্যখনৰ অন্যান্য অঞ্চলৰ বাবেও অটোৰিক্সাৰ ভাড়া সংশোধন কৰিছে। মটৰ গাড়ী আইন, ১৯৮৮ৰ ৬৭ নং ধাৰাৰ অধীনত জাৰি কৰা গেজেট অধিসূচনা অনুসৰি, সাধাৰণ অঞ্চলত প্ৰথম ১.৮ কিলোমিটাৰৰ বাবে নূন্যতম ভাড়া ৫০ টকা নিৰ্ধাৰণ কৰা হৈছে। ইয়াৰ পিছত প্ৰতি কিলোমিটাৰত ২৫ টকাকৈ ভাড়া দিব লাগিব।
অটোৰিক্সা ৰৈ থাকিলে অপেক্ষাৰ বাবে প্ৰতি মিনিটত এক টকাকৈ অতিৰিক্ত ধন দিব লাগিব। আনহাতে, নিশা ১০ বজাৰ পৰা পুৱা ৫ বজালৈ অটোৰিক্সাৰ ভাড়া সাধাৰণ ভাড়াতকৈ ৫০ শতাংশ বৃদ্ধি পাব। উদাহৰণস্বৰূপে, কোনো যাত্ৰাৰ সাধাৰণ ভাড়া ১০০ টকা হ’লে নিশাৰ সময়ত যাত্ৰীগৰাকীয়ে ১৫০ টকা দিব লাগিব।
আনহাতে সাধাৰণ অঞ্চলৰ তুলনাত পাহাৰীয়া পথত অটোৰিক্সাত যাত্ৰা কৰাটো অধিক ব্যয়বহুল হ’ব। নতুন নিৰ্ধাৰিত হাৰ অনুসৰি, পাহাৰীয়া অঞ্চলত অটোৰিক্সাৰ নূন্যতম ভাড়া ৬০ টকা কৰা হৈছে। ইয়াৰ পিছত প্ৰতি কিলোমিটাৰৰ বাবে ৩০ টকাকৈ ভাড়া দিব লাগিব। অৰ্থাৎ, সাধাৰণ অঞ্চলত প্ৰতি কিলোমিটাৰৰ বাবে ২৫ টকা ভাড়া দিব লাগিলেও পাহাৰীয়া পথত একে দূৰত্বৰ বাবে ৩০ টকা দিব লাগিব। পাহাৰীয়া অঞ্চলৰ নূন্যতম ভাড়া আৰু প্ৰতি কিলোমিটাৰৰ ভাড়া সাধাৰণ অঞ্চলতকৈ ২০ শতাংশ অধিক।
চৰকাৰৰ অধিসূচনা অনুসৰি, নতুন ভাড়াৰ হাৰ কাৰ্যকৰী কৰাৰ দায়িত্ব ৰাজ্যিক পৰিবহণ কৰ্তৃপক্ষ আৰু সংশ্লিষ্ট আঞ্চলিক পৰিবহণ কৰ্তৃপক্ষক দিয়া হৈছে। সেয়েহে, তামিলনাডুলৈ যাত্ৰা কৰিবলৈ পৰিকল্পনা কৰা লোকসকলে অটোৰিক্সাত উঠাৰ আগতে নতুন ভাড়াৰ হাৰ জানি লোৱাটো ভাল। বিশেষকৈ নিশাৰ সময়ত আৰু পাহাৰীয়া পথত যাত্ৰা কৰিলে সাধাৰণ ভাড়াতকৈ অধিক ধন খৰচ হ’ব পাৰে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
