স্বৰ্ণ পদক বিজয়ী জেভলিন থ্ৰোৱাৰ নীৰজ যাদৱ আৰু নাই

ভাৰতীয় পেৰা এথলীট নীৰজ যাদৱৰ মৃত্যুৰ খবৰে ক্ৰীড়া জগতত শোকৰ ছাঁ পেলাইছে। ৪২ বছৰীয়া খেলুৱৈগৰাকীয়ে নিজৰ ঘৰত বিষাক্ত পদাৰ্থ সেৱন কৰি চৰম সিদ্ধান্ত গ্ৰহণ কৰা বুলি খবৰ প্ৰকাশ পাইছে। ভাৰতীয় পেৰা এথলেটিকছ দলৰ মুখ্য প্ৰশিক্ষক এছ সত্যনাৰায়ণে এই মৰ্মান্তিক ঘটনাৰ বিষয়ে অৱগত কৰে। নীৰজ যাদৱে কিয় এনে চৰম সিদ্ধান্ত গ্ৰহণ কৰিলে, সেই বিষয়ে এতিয়াও স্পষ্ট তথ্য পোহৰলৈ অহা নাই।

কিয় এই সিদ্ধান্ত ল’লে নীৰজ যাদৱে?

নীৰজ যাদৱৰ মৃত্যুৰ কাৰণ এতিয়াও জানিব পৰা হোৱা নাই। ভাৰতীয় পেৰা এথলেটিকছ দলৰ মুখ্য প্ৰশিক্ষক এছ সত্যনাৰায়ণে কয় যে খেলুৱৈগৰাকীৰ এনে পদক্ষেপ অত্যন্ত দুৰ্ভাগ্যজনক। উল্লেখযোগ্য যে ড’পিং সংক্ৰান্তীয় নিষেধাজ্ঞাৰ বাবে নীৰজ যাদৱে এইবাৰ জাপানৰ নাগোয়াত অনুষ্ঠিত এছিয়ান পেৰা গেমছত অংশগ্ৰহণ কৰিব পৰা নাছিল। এই নিষেধাজ্ঞাৰ ফলত তেওঁ মানসিক চাপত আছিল বুলিও কোৱা হৈছে। অৱশ্যে, এই ঘটনাৰ সৈতে নিষেধাজ্ঞাৰ কোনো প্ৰত্যক্ষ সম্পৰ্ক আছে নে নাই, সেয়া এতিয়াও নিশ্চিত হোৱা নাই।

প্ৰশিক্ষক এছ সত্যনাৰায়ণে কয় যে নীৰজে কিয় এনে সিদ্ধান্ত ল’লে, সেই বিষয়ে তেওঁ অৱগত নহয়। তেওঁৰ মতে, এজন খেলুৱৈয়ে জীৱনত অহা উত্থান-পতন ধৈৰ্যৰে মোকাবিলা কৰিব লাগে। নীৰজে ইমান কঠোৰ সিদ্ধান্ত লোৱাটো অত্যন্ত দুখজনক বুলিও তেওঁ মন্তব্য কৰে।

এছিয়ান পেৰা গেমছত লাভ কৰিছিল তিনিটাকৈ স্বৰ্ণ পদক

নীৰজ যাদৱ ভাৰতৰ এগৰাকী প্ৰতিভাৱান পেৰা এথলীট আছিল। এছিয়ান পেৰা গেমছত তেওঁ তিনিটাকৈ স্বৰ্ণ পদক লাভ কৰি দেশলৈ গৌৰৱ কঢ়িয়াই আনিছিল। ২০১৮ চনত ইণ্ডোনেছিয়াৰ জাকাৰ্টাত অনুষ্ঠিত এছিয়ান পেৰা গেমছত তেওঁ জেভেলিন থ্ৰ’ত স্বৰ্ণ পদক লাভ কৰিছিল। ইয়াৰ পিছত ২০২৩ চনত চীনৰ হাংঝুত অনুষ্ঠিত এছিয়ান পেৰা গেমছত জেভেলিন থ্ৰ’ আৰু ডিস্কাছ থ্ৰ’ত স্বৰ্ণ পদক অৰ্জন কৰিবলৈ সক্ষম হৈছিল। তেওঁ F55 শাখাত প্ৰতিদ্বন্দ্বিতা কৰিছিল। এই শাখাত শ্বট পুট, ডিস্কাছ থ্ৰ’ আৰু জেভেলিন থ্ৰ’ৰ দৰে খেল অন্তৰ্ভুক্ত।

সাত বছৰ বয়সতে আক্ৰান্ত হৈছিল পলিঅ’ত

নীৰজ যাদৱৰ জীৱন সংগ্ৰাম আৰু সফলতাৰ কাহিনীও আছিল অনুপ্ৰেৰণাদায়ক। মাত্ৰ সাত বছৰ বয়সতে তেওঁ পলিঅ’ ৰোগত আক্ৰান্ত হৈছিল। শাৰীৰিক প্ৰত্যাহ্বানৰ সন্মুখীন হোৱাৰ পিছতো তেওঁ খেলৰ প্ৰতি থকা আগ্ৰহ এৰি দিয়া নাছিল। প্ৰথমে তেওঁ হুইল চেয়াৰত টেনিছ খেলিবলৈ আৰম্ভ কৰিছিল। পৰৱৰ্তী সময়ত পেৰা এথলেটিকছৰ সৈতে জড়িত হৈ আন্তঃৰাষ্ট্ৰীয় পৰ্যায়ত নিজৰ প্ৰতিভা প্ৰদৰ্শন কৰে। কঠোৰ পৰিশ্ৰম আৰু অধ্যৱসায়ৰ জৰিয়তে তেওঁ এছিয়ান পেৰা গেমছত তিনিটাকৈ স্বৰ্ণ পদক লাভ কৰিবলৈ সক্ষম হৈছিল।

ক্ৰীড়া জগতত নিজৰ প্ৰতিভাৰে বিশেষ স্থান দখল কৰা নীৰজ যাদৱৰ মৃত্যুৰ খবৰে তেওঁৰ অনুৰাগী আৰু ক্ৰীড়াপ্ৰেমীসকলক শোকস্তব্ধ কৰি তুলিছে। অৱশ্যে, তেওঁৰ মৃত্যুৰ প্ৰকৃত কাৰণ জানিবলৈ তদন্ত আৰু মৰণোত্তৰ পৰীক্ষাৰ প্ৰতিবেদনৰ বাবে অপেক্ষা কৰিব লাগিব।

এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ