অসম লাইভ২৪ঃ ২২ জানুৱাৰীত ৰামমন্দিৰৰ উদ্বোধনী অনুষ্ঠানলৈ কংগ্ৰেছৰ ৩জন নেতাই আমন্ত্ৰণ লাভ কৰিছে৷ সেই তালিকাত কিন্তু নাম নাই ৰাহুল গান্ধী আৰু প্ৰিয়ংকা গান্ধীৰ৷ গান্ধী পৰিয়ালৰ ভিতৰত আমন্ত্ৰণ লাভ কৰিছে কেৱল ছোনীয়া গান্ধীয়ে।
ছোনিয়া গান্ধীৰ ওপৰিও উদ্বোধনী অনুষ্ঠানত উপস্থিত থাকিবৰ বাবে আমন্ত্ৰণ লাভ কৰিছে প্ৰাক্তন প্রধানমন্ত্ৰী মনমোহন সিং, কংগ্ৰেথৰ সৰ্বভাৰতীয় সভাপতি মল্লিকাৰ্জুন খাৰ্গে, অধীৰ ৰঞ্জন চৌধুৰীয়ে আমন্ত্ৰণ লাভ কৰিছে। কিন্তু কংগ্ৰেছৰ একেবাৰে শীৰ্ষস্থানৰ নেতা হোৱা সত্ত্বেও ৰাহুল বা প্ৰিয়ংকাই কিন্তু আমন্ত্ৰণ লাভ নকৰিলে। ৰাহুল, প্ৰিয়ংকাই আমন্ত্ৰণ লাভ নকৰা বিষয়টোক লৈ বিৰোধীৰ একাংশই ৰাম মন্দিৰ ট্ৰাষ্টক সমালোচনা কৰিছে।
বহুতেই কৈছে, ইচ্ছাকৃতভাৱেই ৰাহুল, প্ৰিয়ংকাক সেই মহাযজ্ঞলৈ মতা হোৱা নাই। সেই অভিযোগ অৱশ্যে নাকচ কৰিছে ৰাম জন্মভূমি তীৰ্থক্ষেত্ৰ ট্ৰাষ্টে। ট্ৰাষ্টে জনোৱা অনুসৰি, তেওঁলোকে ৰাজনৈতিক চৰ্ত মানি অতিথিক আমন্ত্ৰণ জনাইছে। সেই চৰ্তমতে ৰাহুল, প্ৰিয়ংকা সেই মহাযজ্ঞত আমন্ত্ৰণ লাভ কৰাৰ যোগ্য নহয়। ট্ৰাষ্টৰ সূত্ৰৰ খবৰমতে, ৰামমন্দিৰ উদ্বোধন অনুষ্ঠানত আমন্ত্ৰণ জনোৱা হৈছে কেৱমাত্ৰ স্বীকৃতিপ্ৰাপ্ত প্ৰথম শাৰীৰ ৰাজনৈতিক দলৰ সভাপতি আৰু লোকসভা, ৰাজ্যসভাৰ বিৰোধী দলনেতাসকলক। ইয়াৰ বাহিৰে যিসকলে ৰাম মন্দিৰ আন্দোলনত সক্ৰিয় ভূমিকা লৈছিল তেওঁলোকে আমন্ত্ৰণ লাভ কৰিছে। সেই চৰ্ত অনুসৰি আমন্ত্ৰণ লাভ কৰিছে কংগ্ৰেছ দলপতি মল্লিকাৰ্জূন খৰ্গে। ছোনীয়া গান্ধীক আমন্ত্ৰণ জনোৱা হৈছে কংগ্ৰেছৰ সংসদীয় কমিটিৰ প্ৰধান হিচাপে। অধীৰ চৌধুৰীয়ে আমন্ত্ৰণ পাইছে লোকসভাৰ বিৰোধী দলনেতা হিচাপে। ৰাহুল বা প্ৰিয়ংকাই এই চৰ্তমতে আমন্ত্ৰণ পোৱাৰ যোগ্য নহয়। ট্ৰাষ্টৰ অন্যতম নেতা তথা বিশ্ব হিন্দু পৰিষদৰ কাৰ্যকৰী সভাপতি অলোক কুমাৰে স্পষ্ট কৰিছে যে, যিসকলে ৰাম মন্দিৰ আন্দোলনত সক্ৰিয় আছিল তেওঁলোকে চৰ্ত অবিহনেই এই অনুষ্ঠানলৈ আমন্ত্ৰণ লাভ কৰিছে।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
