অসম লাইভ২৪ঃ মুঠ ১০টা কাউণ্টাৰ খোলা হৈছিল দান গ্ৰহণৰ বাবে। ইয়াৰোপৰি ব্যৱস্থা কৰা হৈছিল ‘অনলাইন অনুদানৰো। অযোধ্যাত উপস্থিত হোৱা প্ৰতিজন ভক্তই মন্দিৰৰ বাবে মুক্তহস্তে দান কৰাৰো সুবিধা ৰখা হৈছিল। সুবিধাৰ সৎ ব্যৱহাৰ কৰি ভক্তই মুক্তহস্তে দান কৰিছে। সোমবাৰে উদ্বোধন কৰা হৈছে ৰাম মন্দিৰ। তাৰ ঠিক এদিন পাছতেই অৰ্থাৎ মঙলবাৰে ভক্তৰ বাবে খুলি দিয়া হৈছে মন্দিৰৰ দুৱাৰ। মন্দিৰৰ এজন সদস্য অনিল মিশ্ৰই এই সন্দৰ্ভত কয়, ‘মঙল আৰু বুধ এই দুটা দিনত ৫লাখ ভক্ত ৰাম মন্দিৰলৈ আহিছে। প্রথম দিনাই কোটি কোটি টকা দানপাত্ৰত জমা হৈছে মন্দিৰৰ।
কেৱল মঙলবাৰৰ দানৰ হিচাপ কৰিছে মন্দিৰ ট্ৰাষ্টে। হিচাপ কৰি তেওঁলোকে জনাই যে সকলো মিলি মুঠ ৩ কোটি ১৭লাখ টকা দান কৰিছে ভক্তই। অনলাইন আৰু মন্দিৰৰ ১০টা কাউণ্টাৰ মিলি এই হিচাপ কৰি উলিয়াইছে ট্ৰাষ্টে। প্রথম দিনাই এই পৰিমাণৰ অৰ্থ দান বক্সত জমা হোৱাত আচৰিত হৈ পৰিছে ৰাম মন্দিৰ ট্ৰাষ্টো। অৱশ্যে কেন্দ্ৰই পূৰ্বে জনোৱা অনুসৰি সমগ্ৰ দেশৰ নাগৰিকে দিয়া দানেৰেহে ৰাম মন্দিৰ তৈয়াৰ হৈছে। কেইবা হাজাৰ কোটি টকা এই মন্দিৰ নিৰ্মাণত খৰচো হৈছে। উদ্বোধনৰ পূৰ্বে বিভিন্ন ৰাজ্যৰ পৰা ৰামৰ বিগ্ৰহৰ পৰা আৰম্ভ কৰি বিভিন্ন দানসামগ্ৰীও আহিছে। ইয়াৰ ফলত প্ৰথম দিনাই কোটি টকাৰ অনুদান লাভ কৰাটো তেনেই স্বাভাৱিক কথা।
উল্লেখ্য যে, দান কোটি কোটি টকা পালেও ৰাম মন্দিৰত সৃষ্টি হোৱা বিচ্ছৃংখল পৰিস্থিতিৰ বাবে মন্দিৰ বন্ধ কৰি দিবলৈকো বাধ্য হৈ পৰিছে মন্দিৰ কৰ্তৃপক্ষই। বৰ্তমানো মন্দিৰ চৌহদত আৰক্ষী মোতায়েন কৰা আছে। ভীৰৰ বাবেই উত্তৰপ্ৰদেশ প্ৰশাসনে নেতা মন্ত্ৰী আৰু তাৰকাসকলক অনুৰোধ জনাইছে যে কোনোৱে যাতে ৰামমন্দিৰলৈ নাহে তাৰ বাবেও আবেদন জনোৱা হৈছে। ভক্তসকলকো ৰাম মন্দিৰ ট্ৰাষ্টৰ অনুৰোধ যে কিছু ধৈৰ্য্য ধৰক। লাহে লাহে ৰাম মন্দিৰ দৰ্শন কৰিবলৈ আহক।
এনেধৰণৰ অন্যান্য বা-বাতৰিৰ বাবে লাইক কৰক অসম লাইভ ২৪ ৰ ফেচবুক পেজ
